Mahabharata · Chapter 14.62

etacchrutvā tu putrasya vacaḥ śūrātmajastadā /
vihāya śokaṃ dharmātmā dadau śrāddhamanuttamam //

tathaiva vāsudevaśca svastrīyasya mahātmanaḥ /
dayitasyi piturnityamakarodaurdhvadehikam //

ṣaṣṭiṃ śatasahasrāṇi brāhmaṇānāṃ mahaujasām /
vidhivadbhojayāmāsa bhojyaṃ sarvaguṇānvitam //

ācchādya ca mahābāhurdhanatṛṣṇāmapānudat /
brāhmaṇānāṃ tadā kṛṣṇastadabhūdromaharṣaṇam //

suvarṇaṃ caiva gāścaiva śayanācchādanāni ca /
dīyamānaṃ tadā vipraḥ prabhūtamiti cābruvan //

vāsudevo'tha dāśārho baledevaḥ sasātyakiḥ / abhimanyostadā śrāddhamakurvansatyakastadā /
atīva duḥkhasantaptā na śamaṃ copalebhire //

tathaiva pāṇḍavā vīrā nagare nāgasahvaye /
nopāgacchanta vai śāntimabhimanyuvinākṛtāḥ //

subahūni ca rājendra divasāni virāṭajā /
nābhuṅkta patiduḥkhārtā tadabhūtkaruṇaṃ mahat //

dhiyamāṇe tu tasmiṃstu garbhe kukṣistha eva ca /
ājagāma tato vyāso jñātvā divyena cakṣuṣā //

samāgamyābravīmānpṛthāṃ pṛthulalocanām /
uttarāṃ ca mahātejāḥi śokaḥ santyajyatāmayam //

janiṣyate mahātejāḥ putrastava yaśasvini / prabhāvādvāsudevasya mama vyāharaṇādapi /
pāṇḍavānāmayaṃ cānte pālayiṣyati medinīm //

dhanañjayaṃ ca samprekṣya dharmarājasya śṛṇvataḥ /
vyāso vākyamuvācedaṃ harṣayanniva bhārata //

pautrastava mahābhāgo janiṣyati mahāmanāḥ /
pṛthvīṃ sāgaraparyantāṃ pālayiṣyati dharmataḥ //

tasmācchokaṃ kuruśreṣṭha jahi tvamarikarśana /
vicāryamatra na hi te satyametadbhaviṣyati //

yaccāpi vṛṣṇivīreṇi kṛṣṇena kurunandana /
puroktaṃ tattathā bhāvi mā te'trāstu vicāraṇā //

vibudhānāṃ gato lokānakṣayānātmanirjitān /
na sa śocyastvayā vīro na cānyaiḥ kurubhistathā //

evaṃ pitāmahenokto dharmātmā sa dhanañjayaḥ /
tyaktvā śokaṃ mahārāja hṛṣṭarūpo'bhavattadā //

pitā'pi tava dharmejña garbhe tasminmahāmate /
avardhata yathākāmaṃ śuklapakṣe yathā śasī //

tataḥ sañcodayāmāsa vyāso dharmātmajaṃ nṛpam /
aśvamedhaṃ prati tadā tataḥ so'ntarhito'bhavat //

dharmarājopi medhāvī śrutvā vyāsasya tadvacaḥ /
vittopanayane tāta cakāra gamane matim //