Mahabharata · Chapter 14.63

śrutvaitadvacanaṃ brahmanvyāsenoktaṃ mahātmanā /
aśvamedhaṃ prati tadā kiṃ bhūyaḥ pracakāra ha //

ratnaṃ ca yanmarutteni nihitaṃ vasudhātale /
tadavāpa kathaṃ ceti tanme brūhi dvijottama //
vaiśampāyana uvāca /

śrutvā dvaipāyanavaco dharmirājo yudhiṣṭhiraḥ /
bhrātṝnsarvānsamānāyya kāle vacanamabravīt //

arjunaṃ bhīmasenaṃ ca mādrīputrau yamāvapi /
śrutaṃ vo vacanaṃ vīrāḥ sauhṛdādyanmahātmanā //

kurūṇāṃ hitakāmena proktaṃ kṛṣṇena dhīmatā /
tapovṛddheni mahatā suhṛdāṃ bhūtimicchatā //

guruṇā dharmaśīlena vyāsenādbhutakarmaṇā /
bhīṣmeṇa ca mahāprājña govindeni ca dhīmatā //

saṃsmṛtya tadahaṃ samyakkartumicchāmi pāṇḍavāḥ /
āyatyāṃ ca tadātve ca sarveṣāṃ taddhi no hitam //

anubandhe ca kalyāṇaṃ yadvaco brahmavādinaḥ /
iyaṃ hi vasudhā sarvā kṣīṇaratnā kurūdvahāḥ //

taccācaṣṭa tadā vyāso maruttasya dhanaṃ nṛpāḥ / yadyetadvo bahumataṃ manyadhvaṃ vā kṣamaṃ yadi /
tadānayāmahe sarve kataṃ vā bhīma manyase //

ityuktavākye nṛpatau tadā kurukulodvaha /
bhīmaseno nṛpaśreṣṭhaṃ prāñjalirvākyamabravīt //

rocate me mahābāho yadidaṃ bhāṣitaṃ tvayā /
vyāsākhyātasya vittasya samupānayanaṃ prati //

tatprāpnuyāmahe dharmādyaddhanaṃ kāṅkṣitaṃ prabho /
kṛtameva mahārāja bhavediti matirmama //

te vayaṃ praṇipātena girīśasya mahātmanaḥ /
tadānayāmi bhadraṃ te samabhyarcya kapardinam //

taṃ vibhuṃ devadeveśaṃ śūlapāṇiṃ trilocanam / anādinidhanaṃ śambhuṃ namasyāmi maheśvaram //

lokanāthaṃ gaṇādhyakṣaṃ tasyaivānucarāṃści tān /
prasādyārthamavāpsyāmo nūnaṃ vāgbuddhikarmabhiḥ //

rakṣante ye ca taddravyaṃ kinnarā raudradarśanāḥ /
te ca vaśyā bhaviṣyanti prasanne vṛṣabhadhvaje //

sa hi devaḥ prasannātmā bhaktānāṃ parameśvaraḥ /
dadātyamaratāṃ cāpi kiṃ punaḥ kāñcanaṃ prabhuḥ //

vanasthāsya purā jiṣṇorastraṃ pāśupataṃ mahat /
raudraṃ brahmasiraścādātprasannaḥ kiṃ punardhanam //

vayaṃ sarve hi tadbhaktāḥ sa cāsmākaṃ prasīdati /
tatprasādādidaṃ rājyaṃ prāptaṃ kauravanandana //

abhimanyorvadhe vṛtte pratijñāte dhanañjaye / jayadrathavadhārthāya svapne lokagururniśi /
prasādya labdhavānastramarjunaḥ sahakeśavaḥ //

tatra prabhātāṃ rajanīṃ phalgunasyāgrataḥ prabhuḥ /
jaghāna sainyaṃ śūlena pratyakṣaṃ savyasācinaḥ //

kastāṃ senāṃ mahārāja manasā'pi pradharṣayet / droṇikarṇabalairyuktāṃ maheṣvāsaiḥ prahāribhiḥ /
ṛte devānmaheṣvāsādbahurūpānmaheśvarāt //

tasyaiva ca prasādeva nihatāstava śatravaḥ / aśvamedhasya saṃsiddhiṃ tava sampādayiṣyati /

śrutvaivaṃ vadatastasya vākyaṃ bhīmasya bhārata / prīto dharmātmajo rājā babhūvātīva bhārata /
arjunapramukhāścāpi tathetyevābruvanvacaḥ //

kṛtvā tu pāṇḍavāḥ sarve ratnāharaṇaniścayam /
senāmājñāpayāmāsurnakṣatre'hani ca dhruve //

tato yayuḥ pāṇḍusutā brāhmaṇānsvasti vācya ca /
arcayitvā suraśreṣṭhaṃ pūrvameva maheśvaram //

modakaiḥ pāyasenātha māṃsāpūpaistathaiva ca /
āśāsya ca mahātmānaṃ prayayurmuditā bhṛśam //

teṣāṃ prayāsyatāṃ tatra maṅgalāni śubhānyatha /
prāhuḥ prahṛṣṭamanaso dvijāgryā nāgarāśca te //

tataḥ pradakṣiṇīkṛtya śirobhiḥ praṇipatya ca /
brāhmaṇānagnisahitānprayayuḥ pāṇḍunandanāḥ //

samanujñāpya rājānaṃ putraśokasamāhatam /
dhṛtarāṣṭraṃ sabhāryaṃ vai pṛthāṃ ca pṛthulocanām //

mūle nikṣipya kauravyaṃ yuyutsuṃ dhṛtarāṣṭrajam / sampūjyamānāḥ pauraiśca brāhmaṇaiśca manīṣibhiḥ /
prayayuḥ pāṇḍavā vīrā niyamasthāḥ śucivratāḥ //