Mahabharata · Chapter 14.54

brūhi keśava tattvena tvamadhyātmamaninditam /
śrutvā śreyo'bhidhāsyāmi śāpaṃ vā te janārdana //
vāsudeva uvāca /

tamo rajaśca satvaṃ ca viddhi bhāvānmadāśrayān /
sthitisṛṣṭilayādhyakṣo viṣṇubrahmeśasañjñitaḥ //

kadācittamasā rudro viṣṇuḥ sattvaguṇe sthitaḥ /
rajasyapi tathā brahmā svaguṇānyaguṇānubhau //

praṇavātmā ca śabdādīṃstriguṇātmā carācaram / tathā rudrānvasūnvā'pi viddhi matprabhavāndvija //

mayi sarvāṇi bhūtāni sarvabhūteṣu cāpyaham /
sthita ityabhijānīhi mā te bhūdatra saṃśayaḥ //

tathā daityagaṇānsarvānyakṣagandharvarākṣasān /
nāgānapsarasaścaiva viddhi matprabhavāndvija //

sadasaccaiva yatprāhuravyaktaṃ vyaktameva ca /
akṣaraṃ ca kṣaraṃ caiva sarvametanmadātmakam //

ye cāśrameṣu vai dharmāścaturṣu vihitā mune /
vaidikāni ca karmāṇi viddhi sarvaṃ madātmakam //

asacca saccaiva ca yadviśvaṃ sadasataḥ param /
tataḥ parataraṃ nāsti devadevātsanātanāt //

onkāraprabhavānvedānviddhi māṃ tvaṃ bhṛgūdvaha /
yūpaṃ somaṃ caruṃ homaṃ tridaśāpyāyanaṃ makhe //

hotāramapi havyaṃ ca viddhiṃ māṃ bhṛgunandana /
adhvaryuḥ kalpakṛccāpi haviḥ paramasaṃskṛtam //

udgātā cāpi māṃ stauti gītaghoṣairmahādhvare /
prāyaścitteṣu māṃ brahmañśāntimaṅgalavācakāḥ //

stuvanti viśvakarmāṇaṃ satataṃ dvijasattama /
mama viddhi sutaṃ dharmamagrajaṃ dvijasattama //

mānasaṃ dayitaṃ vipra sarvabhūtadayātmakam /
tatrāhaṃ vartamānaiśca nivṛttaiścaiva mānavaiḥ //

bahvīḥ saṃsaramāṇo vai yonīrvartāmi sattama /
lokasarankṣaṇārthāya dharmasaṃsthāpanāya ca //

taistairveṣaiśca rūpaiśca triṣu lokeṣu bhārgava /
ahaṃ viṣṇurahaṃ brahmā śakro'tha prabhavāpyayaḥ //

bhūtagrāmasya sarvasya sraṣṭā saṃhāra eva ca /
adharme vartamānānāṃ sarveṣāmahamacyutaḥ //

dharmasya setuṃ badhnāmi calite calite yuge /
tāstā yonīḥ praviśyāhaṃ prajānāṃ hitakāmyayā //

yadā tvahaṃ devayonau vartāmi bhṛgunandana /
tadā'haṃ devavatsarvamācarāmi na saṃśayaḥ //

yadā gandharvayonau tu vartāmi bhṛgunandana /
tadā gandharvavacceṣṭā sarvāśceṣṭāmi bhārgava //

nāgayonau yadā caiva tadā vartāmi nāgavat /
yakṣarākṣasayonyostu yathāvadvicarāmyaham //

mānuṣye vartamāne tu kṛpaṇaṃ yācitā mayā /
na ca te jātasammohā vaco'gṛhṇanta mohitāḥ //

bhayaṃ ca mahaduddiśya trāsitāḥ kuravo mayā /
kruddhena bhūtvā tu puryathāvadanudarśitāḥ //

te'dharmeṇeha saṃyuktāḥ parītāḥka kāladharmaṇā /
dharmeṇa nihatā yuddhe gatāḥ svargaṃ na saṃśayaḥ //

lokeṣu pāṇḍavāścaiva gatāḥ khyātiṃ dvijottama /
etatte sarvamākhyātaṃ yanmāṃ tvaṃ paripṛcchasi //