Mahabharata · Chapter 14.53

tathā prayāntaṃ vārṣṇeyaṃ dvārakāṃ bharatarṣabhāḥ /
pariṣvajya nyavartanta sānuyātrāḥ parantapāḥ //

punaḥpunaśca vārṣṇeyaṃ paryaṣvajata phalgunaḥ /
ācakṣurviṣayāccainaṃ sa dadarśa punaḥpunaḥ //

kṛcchreṇaiva tu tāṃ pārto govinde viniveśitām /
sañjahāra tato dṛṣṭiṃ kṛṣṇaścāpyaparājitaḥ //

tasya prayāṇe yānyāsannimittāni mahātmanaḥ /
bahūnyadbhutarūpāṇi tāni me gadataḥ śṛṇu //

vāyurvegena mahatā rathasya purato vavau /
kurvanniḥśarkaraṃ mārgaṃ virajaskamakaṇṭakam //

vavarṣa vāsavaścaiva toyaṃ śuci sugandhi ca /
divyāni caiva puṣpāṇi purataḥ śāṅgadhanvanaḥ //

sa prayāto mahābāhuḥ sameṣu marudhanvasu /
dadarśātha muniśreṣṭhamudaṅkamamitaujasam //

maharṣiṃ siddhatapasaṃ sarvalokāntaviśrutam / sa taṃ sampūjya tejasvī muniṃ pṛthulalocanaḥ /
pūjitastena ca tadā paryapṛcchadanāmayam //

sa pṛṣṭaḥ kuśalaṃ tena sampūjya madhusūdanam /
udaṅko brāhmaṇaśreṣṭhastataḥ papraccha mādhavam //

kaccicchaure tvayā gatvā kurupāṇḍavasadma tat /
kṛtaṃ saubhrātramacalaṃ tanme vyākhyātumarhasi //

api sandhāya tānvīrānupāvṛttosi keśava /
sambandinaḥka svadayitānsatataṃ vṛṣṇipuṅgava //

kaccitpāṇḍusutāḥ pañca dhṛtarāṣṭrasya cātmajāḥ /
lokeṣu vihariṣyanti tvayā saha parantapa //

svarāṣṭre te ca rājānaḥ kaccitprāpsyanti vai sukham /
kauraveṣu praśānteṣu tvayā nāthena keśava //

yā me sambhāvanā tāta tvayi nityamavartata /
api sā saphalā tāta kṛtā te bharatānprati //
śrībhagavānuvāca /

kṛto yatno mayā pūrvaṃ sauśāmye kauravānprati / nāśakyanta yadā sāmye te sthāpayitumañjasā /

na diṣṭamapyatikrāntuṃ śakyaṃ buddhyā balena vā /
maharṣe viditaṃ bhūyaḥ sarvametattavānagha //

te'tyakrāmanmatiṃ mahyaṃ bhīṣmasya vidurasya ca /
tato yamakṣayaṃ jagmuḥ samāsādyetaretaram //

pañcaiva pāṇḍavāḥ śiṣṭā itamitrā hatātmajāḥ /
dhārtarāṣṭrāśca nihatāḥ sarve sasutabāndhavāḥ //

ityuktavacane kṛṣṇe bhṛśaṃ krodhasamanvitaḥ /
udaṅka ityuvācainaṃ roṣādutphullalocanaḥ //

yasmācchaktena te kṛṣṇa na trātāḥ kurupuṅgavāḥ /
sambandhinaḥ priyāstasmācchapsye'haṃ tvāmasaṃśayam //

na ca te prasabhaṃ yasmātte nigṛhya nivāritāḥ /
tasmānmanyuparītastvāṃ śapsyāmi madhusūdana //

tvayā śaktena hi satā mithyācāreṇi mādhava /
te parītāḥ kuruśreṣṭhā naśyantaḥ sma hyupekṣitāḥ //
vāsudeva uvāca /

śṛṇu me vistareṇedaṃ yadvakṣye bhṛgunandana /
gṛhāṇānunayaṃ cāpi tapasvī hyasi bhārgavam //

śrutvā ca me tadadhyātmaṃ muñcethāḥ śāpamadya vai /
na ca māṃ tapasā'lpena śakto'bhibhavituṃ pumān //

na ca te tapaso nāśamicchāmi tapatāṃ vara /
tapaste sumahaddīptaṃ guravaścāpi toṣitāḥ //

kaumāraṃ brahmacaryaṃ te jānāmi dvijasattama /
duḥkhārjitasya tapasastasmānneccāmi te'vyayam //