Mahabharata · Chapter 14.52

tato'bhyanodayatkṛṣṇo yujyatāmiti dārukam /
muhūrtādiva cācaṣṭa yuktamityeva dārukaḥ //

tathaiva cānuyātrāṇi codayāmāsa pāṇḍavaḥ /
sannahyadhvaṃ prayāsyāmo nagara gajasāhvayam //

ityuktāḥ sainikāste tu sajjībhūtā viśāmpate /
ācakhyuḥ sajjamityevaṃ pārthāyāmitatejase //

tatastau rathamāsthāya prayātau kṛṣṇapāṇḍavau /
vikurvāṇau katāścitrāḥ prīyamāṇau viśāmpate //

rathasthaṃ tu mahātejā vāsudevaṃ dhanañjayaḥ /
punarevābravīdvākyamidaṃ bharatasattama //

tvatprasādājjyaḥ prāpto rājñā vṛṣṇikulodvaha /
nihatāḥ śatravaścāpi prāptaṃ rājyamakaṇṭakam //

nāthavantaśca bhavatā pāṇḍavā madhusūdana / bhavantaṃ plavamāsādya tīrṇāḥ sma kurusāgaram /
bhaktāṃstvamāśritānasmānpālayāmutra ceha ca /

viśvakarmannamaste'stu viśvātmanviśvasattama /
tathā tvāmabhijānāmi tathā cāhaṃ bhavānmataḥ //

tvattejaḥsambhavo nityaṃ hutāśo madhusūdana /
ratiḥ krīḍāmayī tubhyaṃ māyā te rodasī vibho //

tvayi sarvamidaṃ viśvaṃ yadidaṃ sthāṇu jaṅgamam /
tvaṃ hi sarvaṃ vikuruṣe bhūtagrāmaṃ caturvidham //

pṛthivīṃ cāntarikṣaṃ ca tathā sthāvarajaṅgamam /
hasintaṃ te'malā jyotsnā ṛtavaścendriyāṇi te //

prāṇo vāyuḥ satatagaḥ krodho mṛtyuḥ sanātanaḥ /
prasāde cāpi padmā śrīrnityaṃ tvayi mahāmate //

ratistuṣṭirdhṛtiḥ kṣāntirmatiḥ kāntiścarācaram /
tvameveha yugānteṣu nidhanaṃ procyase'nadha //

sudīrgheṇāpi kālena na te śakyā guṇā mayā /
ātmā ca paramo vaktuṃ namaste nalinekṣaṇa //

vidito me sudurdharṣa nāradāddevalāttathā /
kṛṣṇadvaipāyanācceva tathā kurupitāmahāt //

tvayi sarvaṃ samāsaktaṃ tvamevaiko janeśvaraḥ /
yaccānugrahasaṃyuktametaduktaṃ tvayā'nagha //

etatsarvamahaṃ samyagācariṣye janārdana /
idaṃ cādbhutamatyantaṃ kṛtamasmatpriyepsayā //

yatpāpo nihataḥ saṅkhye kauravyo dhṛtarāṣṭrajaḥ /
tvayā dagdhaṃ hi tatsainyaṃ mayā vijitamāhave //

bhavatā tatkṛtaṃ karma yenāvāpto jayo mayā /
duryodhanasya saṅgrāme tava buddhiparākramaiḥ //

karṇasya ca vadhopāyo yathāvatsampradarśitaḥ /
saindhavasya ca pāpasya bhūriśravasa eva ca //

tasmāttvameva sañcintya hitaṃ kuru yathā tathā / ahaṃ ca prīyamāṇena tvayā devakinandana /
yaduktastatkariṣyāmi na hi me'tra vicāraṇā //

rājānaṃ ca samāsādya dharmātmānaṃ yudhiṣṭhiram /
codayiṣyāmi dharmajña gamanārthaṃ tavānagha //

āhṛtaṃ hi mamaitatte dvārakāgamanaṃ prabho / acirādeva draṣṭā tvaṃ mātulaṃ me janārdana /
baladevaṃ ca durdharṣaṃ tathā'nyānvṛṣṇipuṅgavān //

evaṃ sambhāṣamāṇau tau prāptau vāraṇasāhvayam /
tathā viviśatuścobhau samprahṛṣṭanarākulam //

tau gatvā dhṛtarāṣṭrasya gṛhaṃ śakragṛhopamam /

dadṛśāte mahārāja dhṛtarāṣṭraṃ janeśvaram //

viduraṃ ca mahābuddhiṃ rājānaṃ ca yudhiṣṭhiram /
bhīmasenaṃ ca durdharṣaṃ mādrīputrau ca pāṇḍavau //

dhṛtarāṣṭramupāsīnaṃ yuyutsuṃ cāparājitam /
gāndhārīṃ ca mahāprajñāṃ pṛthā kṛṣṇāṃ ca bhāminīm //

subhadrādyāśca tāḥ sarvā bharatānāṃ striyastathā /
dadṛśāte striyaḥ sarvā gāndhārīparicārikāḥ //

tataḥ sametya rājānaṃ dhṛtarāṣṭramarindamau /
nivedya nāmadheye sve tasya pādāvagṛhṇatām //

gāndhāryāśca pṛthāyāśca dharmarājasya caiva hi /
bhīmasya ca mahātmānau tathā pādāvagṛhṇatām //

kṣattāraṃ cāpi saṅgṛhya pṛṣṭvā kuśalamavyayam / pariṣvajya mahātmānaṃ veśyāputraṃ mahāratham /
taiḥ sārdhaṃ nṛpatiṃ vṛddhaṃ tatastau paryupāsatām //

tato niśi mahārājo dhṛtarāṣṭraḥ kurūdvahān /
janārdanaṃ ca medhāvī vyasarjayata vai gṛhān //

te'nujñātā nṛpatinā yayuḥ svaṃ svaṃ niveśanam /
dhanañjayagṛhāneva yayau kṛṣṇastu vīryavān //

tatrārcito yathānyāyaṃ sarvakāmairupasthitaḥ /
kṛṣṇaḥ suṣvāpa medhāvī dhanañjayasahāyavān //

prabhātāyāṃ tu śarvaryāṃ kṛtvā paurvāhṇikīṃ kriyām / dharmarājasya bhanaṃ jagmatuḥ paramārcitau /
yatrāste sa sahāmātyo dharmarājo mahābalaḥ //

tau praviśya mahātmānau tadgṛhaṃ paramārcitam /
dharmarājaṃ dadṛśaturdevarājamivāśvinau //

samāsādya tu rājānaṃ vārṣṇeyakurupuṅgavau /
niṣīdaturanujñātau prīyamāṇena tena tau //

tataḥ sa rājā medhāvī vivakṣū prekṣya tāvubhau /
provāca vadatāṃ śreṣṭho vacanaṃ rājasattamaḥ //

vivakṣū hi yuvāṃ manye vīrau yadukurūdvahau /
brūtaṃ kartāsmi sarvaṃ vāṃ nacirānmā vicāryatām //

ityuktaḥ phalgunastatra dharmarājānamabravīt /
vinītavadupāgamya vākyaṃ vākyaviśāradaḥ //

ayaṃ ciroṣito rājanvāsudevaḥ pratāpavān /
bhavantaṃ samanujñāpya pitaraṃ draṣṭumicchati //

sa gacchedabhyanujñāto bhavatā yadi manyase /
ānartanagarīṃ vīrastadanujñātumarhasi //
yudhiṣṭhira uvāca /

puṇḍarīkākṣa bhadraṃ te gaccha tvaṃ madusūdana /
purīṃ dvāravatīmadya draṣṭuṃ śūrasutaṃ prabho //

rocate me mahābāho gamanaṃ tava keśava /
mātulaściradṛṣṭo me tvayā devī ca devakī //

sametyi mātulaṃ gatvā baladevaṃ ca mānada /
pūjayethā mahāprājña madvākyena yathā'rhataḥ //

smarethāścāpi māṃ nityaṃ bhīmaṃ ca balināṃ varam /
phālgunaṃ sahadevaṃ ca nakulaṃ caiva mānada //

ānartānavalokya tvaṃ pitaraṃ ca mahābhujaḥ /
vṛṣṇīṃśca punarāgaccherhayamedhe mamānagha //

sa gaccha ratnānyādāya vividhāni vasūni ca /
yaccapyanyanmanojñaṃ te tadapyādatsva sātvata //

iyaṃ ca vasudhā kṛtsnā prasādāttava keśava /
asmānupāgatā vīra nihatāścāpi śatravaḥ //

svargāpavargaviṣayaṃ tvadbhaktānāṃ na durlabham / saṃsāragahane ceddhapāpāgnipraśamāmbuda //

evaṃ bruvati kauravye dharmarāje yudhiṣṭhire /
vāsudevo varaḥ puṃsāmidaṃ vacanamabravīt //

tavaiva ratnāni dhanaṃ ca kevalaṃ dharā tu kṛtsnā tu mahābhujādya vai /
yadasti cānyaddraviṇaṃ gṛhe mama tvameva tasyeśvara nityamīśvaraḥ //

tathetyathoktaḥ pratipūjitastadā gadāgrajo dharmasutena vīryavān /
pitṛṣvasāraṃ tvavadadyathāvidhi sampūjitaścāpyagamatpradakṣiṇam //

tayā sa samyak pratinanditastata- stathaiva sarvairvidurādibhistathā /
viniryayau nāgapurādgadāgrajo rathena divyena caturbhujaḥ svayam //

rathe subhadrāmadhiropya bhāminīṃ yudhiṣṭhirasyānumate janārdanaḥ /
pitṛṣvasuścāpi tathā mahābhujo viniryayau paurajanābhisaṃvṛtaḥ //

tamanvayādvānaravaryaketanaḥ sasātyakirmādravatīsutāvapi /
agādhabuddhirviduraśca mādhavaṃ svayaṃ ca bhīmo gajarājavikramaḥ //

nivartayitvā kururāṣṭravardhanāṃ- stataḥ sa sarvānviduraṃ ca vīryavān /
janārdano dārukamāha satvaraḥ pracodayāśvāniti sātyakiṃ tathā //

tato yayau śatrugaṇapramardanaḥ śinipravīrānugato janārdanaḥ /
yathā nihatyārigaṇaṃ śatakatu- rdivaṃ tathā'nartapurīṃ pratāpavān //