Mahabharata · Chapter 14.51

bhūtānāmatha pañcānāmatheṣāmīśvaraṃ manaḥ /
niyame ca visarge ca bhūtānāṃ mana eva ca //

adhiṣṭhātṛmano nityaṃ bhūtānāṃ mahatāṃ tathā /
buddhiraiśvaryamācaṣṭe kṣetrajñaśca sa ucyate //

inadriyāṇi mano yuṅkte sadaśvāniva sārathiḥ /
indriyāṇi mano buddhiḥ kṣetrajñe yujyate sadā //

mahadaśvasamāyuktaṃ buddhisaṃyamanaṃ ratham /
samāruhya sa bhūtātmā samantātparidhāvati //

indriyagrāmasaṃyukto manaḥsārathireva ca /
buddhisaṃyamano nityaṃ mahānbrahmamayo rathaḥ //

evaṃ yo vetti vidvānvai sadā brahmamayaṃ ratham /
sa dhīraḥ sarvalokeṣu na mohamadhigacchati //

avyaktādiviśeṣāntaṃ sahasthāvarajaṅgamam //
sūryacandraprabhālokaṃ grahanakṣatramaṇḍitam //

nadīparvatajālaiśca sarvataḥ paribhūṣitam /
vividhābhistathā cādbhiḥ satataṃ samalankṛtam //

ajitaṃ sarvabhūtānāṃ sarvaprāṇabhṛtāṃ gatiḥ /
etadbrahmavanaṃ nityaṃ tasmiṃścarati kṣetravit //

loke'sminyāni satvāni trasāni sthāvarāṇi ca / tānyevāgre pralīyante paścādbhūtakṛtā guṇāḥ /
guṇebhyaḥ pañca bhūtāni eṣa bhūtasamucchrayaḥ //

devā manuṣyā gandharvāḥ piśācāsurarākṣasāḥ /
sarve svabhāvataḥ sṛṣṭā na kriyābhyo na kāraṇāt //

ete viśvasṛjo viprā jāyantīha punaḥ punaḥ / tebhyaḥ prasūtāsteṣveva mahābhūteṣu pañcasu /
pralīyante yathākālamūrmayaḥ sāgare yathā //

viśvasṛgbhyastu bhūtebhyo mahābhūtāstu sarvaśaḥ /
bhūtebyaścāpi pañcabhyo bhukto gacchetparāṃ gatim //

prajāpatiridaṃ sarvaṃ manasaivāsṛjatprabhuḥ /
tathaiva devānṛṣayastapasā pratipedire //

tapasaścānupūrvyeṇa phalamūlāśinastathā /
trailokyaṃ tapasā siddhāḥ paśyantīha samāhitāḥ //

auṣadhānyagadādīni nānāvidyāśca sarvaśaḥ /
tapasaiva prasiddhyanti tapomūlaṃ hi sādhanam //

yaddurāpaṃ durāmnāyaṃ durādharṣaṃ duranvayam /
tatsarvaṃ tapasā sādhyaṃ tapo hi duratikramam //

surāpo brahmahā steno bhrūṇahāgurutalpagaḥ /
tapasaiva sutaptena mucyate kilbiṣāttataḥ //

manuṣyāḥ pitaro devāḥ paśavo mṛgapakṣiṇaḥ /
yāni cānyāni bhūtāni carāṇi sthāvarāṇi ca //

tapaḥparāyaṇā nityaṃ siddhyante tapasā sadā /
tathaiva tapasā devā mahābhāgā divaṃ gatāḥ //

āśīryuktāni karmāṇi kurvate ye tvatandritāḥ /
ahaṅkārasamāyuktāste sakāśe prajāpateḥ //

dhyānayogena śudvena nirmamā nirahankṛtāḥ /
āpnuvanti mahātmāno mahāntaṃ lokamuttamam //

dhyānayogamupāgamya prasannamatayaḥ sadā /
sukhopacayamavyaktaṃ praviśantyātmavittamāḥ //

dhyānayogādupāgamya nirmamā nirahankṛtāḥ /
avyaktaṃ praviśantīha mahatāṃ lokamuttamam //

avyaktādeva sambhūtāḥ samayajñā gatāḥ punaḥ /
tamorajobhyāṃ nirmuktāḥ satvamāsthāya kevalam //

nirmuktaḥ sarvapāpebhyaḥ sarvaṃ tyajati niṣkalaḥ /
kṣetrajña iti taṃ vidyādyastaṃ veda sa vedavit //

cittaṃ cittādupāgamya munirāsīta saṃyataḥ /
yaccittastanmanā bhūtvā grāhyametatsanātanam //

avyaktādiviśeṣāntamavidyālakṣaṇaṃ smṛtam /
nibodhata tathā jñānaṃ guṇairlakṣaṇamityuta //

dvyakṣarastu bhavenmṛtyustryakṣaraṃ brahma śāśvatam /
mameti ca bhavenmṛtyurna mameti ca śāśvatam //

karma kecitpraśaṃsanti mandabuddhitayā narāḥ /
ye tu vṛddhā mahātmāno na praśaṃsanti karma te //

karmaṇā jāyate janturmūrtimānṣoḍaśātmakaḥ /
puruṣaṃ grasate vidyā tadgrāhyamamṛtāśinam //

tasmātkarmasu niḥsnehā ye kecitpāradarśinaḥ /
vidyāmayo'yaṃ puruṣo na tu karmamayaḥ smṛtaḥ //

ya evamamṛtaṃ nityamagrāhyaṃ śaśvadakṣaram //
vaśyātmānamasaṃśliṣṭaṃ yo veda na mṛto bhavet //

apūrvamakṛtaṃ nityaṃ ya enamavicāriṇam / ya evaṃ vindedātmānamagrāhyamamṛtāśanam /
agrāhyo hyamṛto bhavati sa ebhiḥ kāraṇairdhruvaḥ //

āyojya sarvasaṃskārānsaṃyamyātmānamātmani /
sa tadbrahma śubhaṃ vetti yasmādbhūyo na vidyate //

prasāde caiva satvasya prasādaṃ samavāpnuyāt /
lakṣaṇaṃ hi prasādasya yathā syātsvapnadarśanam //

gatireṣā tu muktānāṃ ye jñānapariniṣṭhitāḥ /
pravṛttayaśca yāḥ sarvāḥ paśyanti pariṇāmajāḥ //

eṣā gatirviraktānāmeṣa dharmaḥ sanātanaḥ /
eṣā jñānavatāṃ prāptiretadvṛttamaninditam //

samena sarvabhūteṣu nispṛheṇa nirāśiṣā /
śakyā gatiriyaṃ gantuṃ sarvatra samadarśinā //

etadvaḥ sarvamākhyātaṃ mayā viprarṣisattamāḥ /
evamācarata kṣipraṃ tataḥ siddhimavāpsyatha //
gururuvāca /

ityuktāste tu munayo guruṇā brahmaṇā tathā /
kṛtavanto mahātmānastato lokamavāpnuvan //

tvamapyetanmahābhāga mayoktaṃ brahmaṇo vacaḥ /
samyagācara śuddhātbhaṃstataḥ siddhimavāpsyasi //
vāsudeva uvāca /

ityuktaḥ sa tadā śiṣyo guruṇā dharmamuttamam /
cakāra sarvaṃ kaunteya tato mokṣamavāptavān //

kṛtakṛtyaśca sa tadā śiṣyaḥ kurukulodvaha /
tatpadaṃ samanuprāpto yatra gatvā na śocati //
arjuna uvāca /

ko nvasau brāhmaṇaḥ kṛṣṇa kaśca śiṣyo janārdana /
śrotavyaṃ cenmayaitadvai tattvamācakṣva me vibho //
vāsudeva uvāca /

ahaṃ gururmahābāho manaḥ śiṣya ca viddhi me /
tvatprītyā guhyametacca kathitaṃ te dhanañjaya //

mayi cedasti te prītirnityaṃ kurukulodvaha /
adhyātmametacchrutvā tvaṃ samyagācara suvrata //

tatastvaṃ samyagācīrṇo dharme'sminnarikarśana /
sarvapāpavinirmukto mokṣaṃ prāpsyasi kevalam //

pūrvamapyetadevoktaṃ yuddhakāla upasthite /
mayā tava mahābāho tasmādatra manaḥ kuru //

mayā tu bharataśreṣṭha ciradṛṣṭaḥ pitā prabhuḥ /
tamahaṃ draṣṭamicchāmi sammate tava phalguna //
vaiśampāyana uvāca /

ityuktavacanaṃ kṛṣṇaṃ pratyuvāca dhanañjayaḥ /
yadiṣṭaṃ kuru sarveṣāmīśvaro'smānprapālaya //

namaste sarvalokātmannārāyaṇa parātpara / manomalāttapośakyaṃ karma cāvidyayā hatam /
dānamapyarthadoṣeṇi nāma tasmātkalau smaret //

yadi gantuṃ kṛtā buddhirvāsudeva namostu te / gacchāvo nagaraṃ kṛṣṇa gajasāhvayamadya vai //

sametya tatri rājānaṃ dharmātmānaṃ yudhiṣṭhiram /
samanujñāpya rājānaṃ svāṃ purīṃ yātumarhasi //