Mahabharata · Chapter 14.50

hanta vaḥ samprakṣyāmi yanmāṃ pṛcchatha sattamāḥ /
guruṇā śiṣyamāsādya yaduktaṃ tannibodhata //

samastamiha tacchrutvā samyagevāvadhāryatām /
ahiṃsā sarvabhūtānāmetatkṛtyatamaṃ matam //

etatpadamanudvignaṃ variṣṭhaṃ dharmalakṣaṇam / jñānaṃ niḥśreya ityāhurvṛddhā niścitadarśinaḥ /
tasmājjñānena śuddhena mucyate sarvakilbiṣaiḥ //

hiṃsāparāśca ye kecidye ca nāstikavṛttayaḥ /
lobhamohasamāyuktāste vai nirayagāminaḥ //

āśīryuktāni karmāṇi kurvate ye tvatandritāḥ /
te'sminloke pramodante jāyamānāḥ punaḥ punaḥ //

kurvate ye tu karmāṇi śraddhadhānā vipaścitaḥ /
anāśīryogasaṃyuktāste dhīrāḥ sādhudarśinaḥ //

ataḥ paraṃ pravakṣyāmi satvakṣetrajñayoryathā /
saṃyogo viprayogaśca tannibodhata sattamāḥ //

viṣayo viṣayitvaṃ ca sambandho'yamihocyate /
viṣayī puruṣo nityaṃ satvaṃ ca viṣayaḥ smṛtaḥ //

vyākhyātaṃ pūrvakalpeni maśakodumbaraṃ yathā / bhujyamānaṃ na jānīte nityaṃ satvamacetanam /
yastvevaṃ taṃ vijānīte yo bhuṅkte yaśca bhujyate //

anityaṃ dvandvasaṃyuktaṃ satvamāhurmanīṣiṇaḥ /
nirdvandvo niṣkalo nityaḥ kṣetrajño nirguṇātmakaḥ //

samaḥ sañjñānugaścaiva sa sarvatra vyavasthitaḥ /
na sajjate sadā satvamāpaḥ puṣkaraparṇavat //

sarvairapi guṇairvidvānvyatiṣakto na lipyate /
jalabinduryathā lolaḥ padminīpatrasaṃsthitaḥ //

evamevāpyasaṃyuktaḥ puruṣaḥ syānna saṃśayaḥ /
dravyamātramabhūtsatvaṃ puruṣasyeti niścayaḥ //

yathā dravyaṃ ca kartā ca saṃyogo'pyanayostathā / yathā pradīpamādāya kaścittamasi gacchati /
tathā sattvapradīpena gacchanti paramarṣayaḥ //

yāvaddravyaṃ guṇastāvatpradīpaḥ samprakāśate /
kṣīṇe dravye guṇe jyotirantardhānāya gacchati //

vyaktaḥ satvaguṇastvevaṃ puruṣo dravyamucyate /
etadviprā vijānīta hanta bhūyo bravīmi vaḥ //

sahasreṇāpi durmedhā na buddhimadhigacchati /
caturthenāpyathāṃśena buddhimānsukhamedhate //

evaṃ dharmasya vijñeyaṃ saṃsādhanamupāyataḥ /
upāyajño hi medhāvī sukhamatyantamaśnute //

yathā'dhvānamapātheyaḥ prapanno manujaḥ kvacit /
kleśena yāti mahatā vinaśyatyantarā'pi ca //

tathā karmasu vijñeyaṃ phalaṃ bhavati vā na vā /
puruṣasyātmaniḥśreyaḥ śubhāśubhanidarśanam //

yathā ca dīrghamadhvānaṃ padmyāmeva prapadyate /
adṛṣṭapūrvaṃ sahasā tattvadarśanavarjitaḥ //

tameva ca yathā'dhvānaṃ rathenehāśugāminā /
gacchatyaśvaprayuktena tathā buddhimatāṃ gatiḥ //

ūrdhvaṃ parvatamāruhya nānvavekṣeta bhūtalam /
rathena rathinaṃ paśyetkliśyamānamacetanam //

yāvadrathapathastāvadrathena sa tu gacchati /
kṣīṇe rathapade vidvānrathamutsṛjya gacchati //

evaṃ gacchati medhāvī tattvayogavidhānavit /
parijñāya guṇajñaśca uttarāduttarottaram //

yathā'rṇavaṃ mahāghoramaplavaḥ sampragāhate /
bāhubhyāmeva sammohādvadhaṃ vāñchatyasaṃśayam //

nāvā cāpi yathā prājño vibhāgajñaḥ svaritrayā /
aśrāntaḥ salilaṃ gahācchīdhraṃ santarate hradam //

tīrṇo gacchetparaṃ pāraṃ nāvamutsṛjya nirmamaḥ /
vyākhyātaṃ pūrvakalpena yathā rathapadātinoḥ //

snehātsammohamāpanno nāvi dāśo yathā tathā /
mamatvenābhibhūtaḥ saṃstatraiva parivartate //

nāvaṃ na śakyamāruhya sthale viparivartitum /
tathaiva rathamāruhya nāpsu caryā vidhīyate //

evaṃ karma kṛtaṃ vitta viṣayasthaṃ pṛthakpṛthak /
yathā karma kṛtaṃ loke tathā tadupapadyate //

yannaiva gandhi no rasyaṃ na rūpasparsaśabdavat /
manyate na mano buddhyā tatpradhānaṃ pracakṣate //

tatra pradhānamavyaktamavyaktasya guṇo mahān /
mahapradhānabhūtasya guṇo'haṅkāra eva ca //

ahaṅkārāttu sambhūto mahābhūtakṛto guṇaḥ /
pṛthaktvena hi bhūtānāṃ viṣayā vai guṇāḥsmṛtāḥ //

bījadharmaṃ yathā'vyaktaṃ tathaiva prasavātmakam /
bījadharmā mahānātmā prasavaśceti naḥ śrutam //

bījadharmātsāhaṅkārātprasavaśca punaḥpunaḥ /
bījaprasavadharmāṇi mahābhūtāni pañca vai //

bījadharmiṇa ityāhuḥ prasavaṃ ca prakurvate /
viśeṣāḥ pañcabhūtānāṃ teṣāṃ vitta viśeṣaṇam //

tatraikaguṇamākāśaṃ dviguṇo vāyurucyate /
triguṇaṃ jyotirityāhurāpaścāpi caturguṇāḥ //

pṛthvī pañcaguṇā jñeyā carasthāvarasaṅkulā /
sarvabhūtakarī devī śubhāśubhanidarśinī //

śabdaḥ sparśastathā rūpaṃ raso gandhaśca pañcamaḥ /
ete pañcaguṇā bhūmervijñeyā dvijasattamāḥ //

pārthivaśca sadā gandho gandhaśca bahudhā smṛtaḥ /
tasya gandhasya vakṣyāmi vistareṇa bahūnguṇān //

iṣṭaścāniṣṭagandhaśca madhuro'mlaḥ kaṭustathā /
nirhārī saṃhataḥ snigdho rūkṣo viśada eva ca //

evaṃ daśavidho jñeyaḥ pārthivo gandha ityuta /
śabdaḥ sparśastathā rūpaṃ dravaścāpāṃ guṇāḥ smṛtāḥ //

rasajñānaṃ tu vakṣyāmi rasastu bahudhā smṛtaḥ /
madhuro'mlaḥ kaṭustiktaḥ kaṣāyo lavaṇastathā //

evaṃ ṣaḍvidhavistāro raso vārimayaḥ smṛtaḥ /
śabdaḥ sparśastathā rūpaṃ triguṇaṃ jyotirucyate //

jyotiṣaśca guṇo rūpaṃ rūpaṃ ca bahudhā smṛtam /
śuklaṃ kṛṣṇaṃ tathā raktaṃ nīlaṃ pītāruṇaṃ tathā //

hrasvaṃ dīrghaṃ kṛśaṃ sthūlaṃ caturaśrāṇuvṛttakam /
evaṃ dvādaśavistāraṃ tejaso rūpamucyate //

vijñeyaṃ brāhmaṇairvṛddhairdharmajñaiḥ satyavādibhiḥ /
śabdasparśau ca vijñeyau dviguṇo vāyurucyate //

vāyoścāpi guṇaḥ sparśaḥ sparsaśca bahudhā smṛtaḥ /
uṣṇaḥ śītaḥ sukho duḥkhaḥ snigdho viśada eva ca //

kaṭhinaścikvaṇaḥ ślakṣṇaḥ picchilo dāruṇo mṛduḥ /
evaṃ dvādaśavistāro vāyavyo guṇa ucyate //

vidhivadbrāhmaṇaiḥ siddhairmantrajñaistattvadārśibhiḥ //

tatraikaguṇamākāśaṃ śabda ityeva ca smṛtaḥ /
tasya śabdasyi vakṣyāmi vistareṇa bahūnguṇān //

ṣaḍjarṣabhaḥ sagāndhāro madhyamaḥ pañcamastathā / ataḥ paraṃ tu vijñeyo niṣādo dhaivatastathā /
iṣṭaścāniṣṭaśabdaśca saṃhataḥ pratibhānavān //

evaṃ bahuvidho jñeyaḥ śabda ākāśasambhavaḥ /
ākāśamuttamaṃ bhūtamahaṅkārastataḥ paraḥ //

ahaṅkārātparā buddhirbuddherātmā tataḥ paraḥ /
tasmāttu paramavyaktamavyaktātpuruṣaḥ paraḥ //

parāvarajño bhūtānāṃ vidhijñaḥ sarvakarmaṇām /
sarvabhūtātmabhūtātmā yaṃ prāpyānantyamaśnute //