Mahabharata · Chapter 14.45

buddhisāraṃ manastambhamindriyagrāmabandhanam /
mahābhūtāraviṣkambhaṃ nimeṣapariveṣṭanam //

jarāśokasamāviṣṭaṃ vyādhivyasanasañcaram /
deśakālavicārīdaṃ śramavyāyāmaniḥsvanam //

ahorātraparikṣepaṃ śītoṣṇaparimaṇḍalam /
sukhaduḥkhāntasaṃśleṣaṃ kṣutpipāsāvakīlakam //

chāyātapavilekhaṃ ca nimeṣonmeṣavihvalam /
śokamohajarākīrṇaṃ vartamānamacetanam //

māsārdhamāsaguṇitaṃ viṣamaṃ lokasañcaram /
tamonicayapaṅkaṃ ca rajovegapravartakam //

sattvālaṅkāradīptaṃ ca guṇasanghātamaṇḍalam /
viratigrahaṇābhīkaṃ śokasaṃhāravartanam //

kriyākāraṇasaṃyuktaṃ rāgavistāramāyatam /
lobhepsāparivikṣobhaṃ viviktajñānasambhavam //

bhayamohaparīvāraṃ bhūtasammohakārakam /
ānandaprīticāraṃ ca kāmakrodhaparigraham //

mahadādiviśeṣāntamavyaktaṃ prabhavāpyayam /
manojavanamaśrāntaṃ kālacakraṃ pravartate //

etaddvandvasamāyuktaṃ kālacakramacetanam /
visṛjetsankṣipeccāpi bodhayetsvāpayejjagam //

kālacakrapravṛttiṃ ca nivṛttiṃ caiva tattvataḥ /
yastu veda naro nityaṃ na sa bhūteṣu muhyati //

vimuktaḥ sarvasaṅkleśaiḥ sarvadvandvātigo muniḥ /
vimuktaḥ sarvapāpebhyaḥ prāpnoti paramāṃ gatim //

gṛhastho brahmacārī ca vānaprastho'tha bhikṣukaḥ /
catvāra āśramāḥ proktāḥ sarve gārhasthyamūlakāḥ //

yaḥ kaścidiha loke'sminnāśramaḥ parikīrtitaḥ /
tasyāntagamanaṃ śreyaḥ kīrtireṣā sanātanī //

saṃskāraiḥ saṃskṛtaḥ pūrvaṃ yathāvaccaritavrataḥ /
jātau guṇaviśiṣṭāyāṃ samāvarteta vedavit //

svadāranirato nityaṃ śiṣṭācāro jitendriyaḥ /
pañcabhiśca mahāyajñaiḥ śraddadhāno yajediha //

devatātithiśiṣṭāśī nirato vedakarmasu /
ijyāpradānayuktaśca yathāśakti yathāvidhi //

na pāṇipādacapalo na netracapalo muniḥ /
na ca vāgaṅgacapala iti śiṣṭasya gocaraḥ //

nityaṃ yajñopavītī syācchuklavāsāḥ śucivrataḥ /
niyato yamadānābhyāṃ sadā śiṣṭaiśca saṃviśet //

jitaśiśnodaro maitraḥ śiṣṭācārasamanvitaḥ /
vaiṇavīṃ dhārayedyaṣṭiṃ sodakaṃ ca kamaṇḍalum //

trīṇi dhārayate nityaṃ kamaṇḍalumatandritaḥ / ekamācamanārthāya ekaṃ vai pādadhāvanam /
ekaṃ śaucavidhānārthamityetattritayaṃ tathā //

adhītyādhyāpanaṃ kuryāttathā yajanayājane /
dānaṃ pratigrahaṃ vā'pi ṣaṅguṇāṃ vṛttimācaret //

trīṇi karmāṇi jānīta brāhmaṇānāṃ tu jīvikāḥ /
yājanādhyāpane cobhe śuddhāccāpi pratigrahaḥ //

atha śeṣāṇi cānyāni trīṇi karmāṇi yāni tu /
dānamadhyayanaṃ yajño dharmayuktāni tāni tu //

teṣvapramādaṃ kurvīta triṣu karmasu dharmavit /
dānto maitraḥ kṣamāyuktaḥ sarvabhūtasamo muniḥ //

sarvametadyathāśakti vipro nirvartayañśuciḥ /
evaṃ yukto jayetsvargaṃ gṛhasthaḥ saṃśitavrataḥ //