Mahabharata · Chapter 14.35

nedamalpātmanā śakyaṃ vedituṃ vā'kṛtātmanā /
bahu cālpaṃ ca sankṣiptaṃ vistṛtaṃ ca mataṃ mama //

upāyaṃ taṃ mama brūhi yenaiṣā labhyate matiḥ /
tanmanye kāraṇaṃ karma yata eṣā pravartate //
brāhmaṇa uvāca /

araṇīṃ brāhmaṇīṃ viddhi gururasyottarāraṇiḥ /
tapaḥśrutebhimathinī jñānāgnirjāyate tataḥ //
brāhmaṇayuvāca /

yadidaṃ brahmaṇo liṅgaṃ kṣetrajña iti sañjñitam /
grahītuṃ yena yacchakyaṃ lakṣaṇaṃ tasya tadvada //
brāhmaṇa uvāca /

aliṅgo nirguṇaścaiva kāraṇaṃ nāsya vigrahe /
upāyameva vakṣyāmi yena gṛhyeta bhāvanā //

samyagapyupadiṣṭasya hyamṛtasyeva tṛpyase / karmabuddhirabuddhitvājjñānaliṅgānnipātitaḥ /

idaṃ kāryamidaṃ neti na mokṣeṣūpadiśyate /
paśyataḥ śṛṇvato buddhirātmanaivopajāyate //

yāvanta iha śakyeraṃstāvatoṃ'sānprakalpayet /
avyaktānvyaktarūpāṃśca śataśo'tha sahasraśaḥ //

sarvānumānayuktāṃśca sarvānpratyakṣahetukān /
yataḥ paraṃ na vidyeta tato'bhyāse bhaviṣyati //
śrībhagavānuvāca /

tatastu tasyā brāhmaṇyā matiḥ kṣetrajñasaṃśaye /
kṣetrajñānena parataḥ kṣetrajño'nyaḥ pravartate //
arjuna uvāca /

kva nu sā brāhmaṇi kṛṣṇa kva cāsau brāhmaṇarṣabhaḥ /
yābhyāṃ siddhiriyaṃ prāptā tāvubhau vada me'cyuta //
śrībhagavānuvāca /

mano me brāhmaṇaṃ viddhi buddhiṃ me viddhi brāhmaṇīm /
kṣetrajña iti yaścoktaḥ so'hameva dhanañjaya //