Mahabharata · Chapter 14.34
nāhaṃ tathā bhūru carāmi loke yathā tvaṃ māṃ tarjayase svabuddhyā /
viprosmiṃ muktosmi vanecarosmi gṛhasthadharmā vratavāṃstathā'smi //
nāhamasmi yatā māṃ tvaṃ paśyase ca śubhāśubhe /
mayā vyāptamidaṃ sarvaṃ yatkiñcijjagatīgatam //
ye kecijjantavo loke jaṅgamāḥ sthāvarāśca ha /
teṣāṃ māmantakaṃ viddhi dāruṇāmiva pāvakam //
rājye pṛthivyāṃ sarvasyāmathavāpi triviṣṭape /
tathā buddhiriyaṃ vetti buddhireva dhanaṃ mama //
ekaḥ panthā brāhmaṇānāṃ yena gacchanti tadvidaḥ /
gṛheṣu vanavāseṣu guruvāseṣu bhikṣuṣu //
liṅgairbahubhiravyagrairekā buddhirupāsyate /
nānāliṅgāśramasthānāṃ yeṣāṃ buddhiḥ śamātmikā //
te bhāvamekamāyānti saritaḥ sāgaraṃ yathā / buddhyā'yaṃ gamyate mārgaḥ śarīreṇi na gamyate /
ādyantavanti karmāṇi śarīraṃ karmabandhanam //
tasmānme subhage nāsti paralokakṛtaṃ bhayam /
tadbhāvabhāvaniratā mamaivātmānameṣyasi //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0