Mahabharata · Chapter 14.3

yudhiṣṭhira tava prajñā na samyagiti me matiḥ /
na hi kaścitsvayaṃ martyaḥ svavaśaḥ kurute kriyām //

īśvareṇa ca yukto'yaṃ sādhvasādhu ca mānavaḥ /
karotyasukaraṃ karma tatrakā paridevanā //

ātmānaṃ manyase cātha pāpakarmāṇamantataḥ /
śṛṇu tatra yathā pāpamapakṛtyeta bhārata //

tapobhiḥ kratubhiścaiva dānena ca yudhiṣṭhira /
taranti nityaṃ puruṣā ye sma pāpāni kurvate //

yajñena tapasā caiva dānena ca narādhipa /
pūyante naraśārdūla narā duṣkṛtakāriṇaḥ //

asurāśca surāścaiva puṇyahetormakhakriyām /
pravartante mahātmānastasmādyajñaḥ parāyaṇam //

yajñaireva mahātmāno babhūvuradhikāḥ surāḥ /
tato devāḥ kriyāvanto dānavānabhyadharṣayan //

rājasūyāśvamedhau ca sarvamedhaṃ ca bhārata /
naramedhaṃ ca nṛpate tvamāhara yudhiṣṭhira //

yajasva vājimedhena vidhivaddakṣiṇāvatā /
bahukāmānnavittena rāmo dāśarathiryathā //

yathā ca bharato rājā dauṣyantiḥ pṛthivīpatiḥ /
śākuntalo mahāvīryastava pūrvapitāmahaḥ //
yudhiṣṭhira uvāca /

asaṃśayaṃ vājimedhaḥ pārayetpṛthivīmapi /
abhiprāyastu me kaścittaṃ tvaṃ śrotumihārhasi //

imaṃ jñātivadhaṃ kṛtvā sumahāntaṃ dvijottama / ahamārādhayiṣyāmi kathaṃ śokaparāyaṇaḥ /
dānamalpaṃ na śaknomi dātuṃ vittaṃ ca nāsti me //

na tu bālānimāndīnānutsahe vasu yācitum /
tathaivādraviṇānkṛcchre vartamānānnṛpātmajān //

svayaṃ vināśya pṛthivīṃ yajñārthaṃ dvijasattama /
karamāhārayiṣyāmi kathaṃ śokaparāyaṇaḥ //

duryodhanāparādheni vasudhāyāṃ narādhipāḥ /
pranaṣṭā yojayitvā'smānakīrtyā munisattama //

duryodhanena pṛthivī kṣapitā jayakāraṇāt /
kośaścāpi viśīrṇosau dhārtarāṣṭrasya durmateḥ //

pṛthivī dakṣiṇā cātra vājimedhe mahākratau /
vidvadbhiḥ paridṛṣṭo'yaṃ śiṣṭo vidhiviparyayaḥ //

na ca pratinidhiṃ kartuṃ cikīrṣāmi tapodhana /
atra me bhagavansamyaksācivyaṃ kartumarhasi //

evamuktastu pārthena kṛṣṇadvaipāyanastadā /
muhūrtamanusañcintya dharmarājānamabravīt //

kośaścāpi viśīrṇo'yaṃ paripūrṇo bhaviṣyati /
vidyate draviṇaṃ pārtha girau himavati sthitam //

utsṛṣṭaṃ brāhmaṇairyajñe maruttasya mahīpate /
tadānayasva kaunteya paryāptaṃ tadbhaviṣyati //
yudhiṣṭhira uvāca /

kathaṃ yajñe maruttasya draviṇaṃ tatsamācitam /
kasmiṃśca kāle sa nṛpo babhūva dadatāṃvara //
vyāsa uvāca /

yadi śuśrūṣase pārtha śṛṇu kārandhamaṃ nṛpam /
yasminkāle mahāvīryaḥ sa rājā'sīnmahādhanaḥ //