Mahabharata · Chapter 14.2

evamuktastu rājā'sau dhṛtarāṣṭreṇa dhīmatā /
tūṣṇīmbabhūva medhāvī tamuvācātha keśavaḥ //

atīva manasā śokaḥ kriyamāṇo janādhipa /
santapayati caitasya pūrvapretānpitāmahān //

yajasva vividhairyajñairbahubhiḥ svāptadakṣiṇaiḥ /
devāṃstarpaya somena svadhayā ca pitṝnapi //

atithīnannapānena kāmairanyairakiñcanān / tvadvidhasya mahābuddhe naitadadyopapadyate /
viditaṃ veditavyaṃ te kartavyamapi te kṛtam //

śrutāśca rājadharmāste bhīṣmādbhāgīrathīsutāt /
kṛṣṇadvaipāyanāccaiva nāradādvidurāttathā //

nemāmarhasi mūḍhānāṃ vṛttiṃ tvamanuvartitum /
pitṛpaitāmahaṃ vṛttamāsthāya dhuramudvaha //

yuktaṃ hi yaśasā kṣātraṃ svargaṃ prāptumasaṃśayam /
nahi kaściddhi śūraṇāṃ nihato'tra parāṅmukhaḥ //

tyaja śokaṃ mahārāja bhavitavyaṃ hi tattathā /
na śakyāste punardraṣṭuṃ tvayā ye'sminraṇe hatāḥ //

etāvaduktvā govindo dharmarājaṃ yudhiṣṭhiram /
virarāma mahātejāstamuvāca yudhiṣṭhiraḥ //

govinda mayi yā prītistava sā viditā mama /
sauhṛdena tathā premṇā sadā mayyanukampase //

priyaṃ tu me syātsumahatkṛtaṃ cakragadādhara /
śrīmanprītena manasāka sarvaṃ yādavanandana //

yadi māmanujānīyādbhavāngantuṃ tapovanam /
kṛtakṛtyo bhaviṣyāmi iti me niścitā matiḥ //

na hi śāntiṃ prapaśyāmi pātayitvā pitāmaham / nṛśaṃsaḥ puruṣavyāghraṃ guruṃ vīryabalānvitam /
karṇaṃ ca puruṣavyāghnaṃ saṅgrāmeṣvapalāyinam //

karmaṇā yena mucyeyamasmātkrūrādarindama /
karmaṇā tadvidhatsveha yena śudhyati me manaḥ //

tamevaṃvādinaṃ pārthaṃ vyāsaḥ provāca dharmavit /
sāntvayansumahātejāḥ śubhaṃ vacanamarthavat //

sukṛtā te matistāta punarbālyena muhyase /
kimākāśe vayaṃ sarve pralapāmo muhurmuhuḥ //

viditāḥ kṣatradharmāste yeṣāṃ yuddhena jīvikā /
tathā pravṛtto nṛpatirnādhibandhena yujyase //

mokṣadharmāśca nikhilā yāthātathyena te śrutāḥ / yathā vai kāmajāṃ māyāṃ parityuktaṃ tvamarhasi //

asakṛccāpi sandehāśchinnāste kāmajā mayā /
aśraddadhāno durmedhā luptasmṛtirasi dhruvam //

maivaṃ bhava na te yuktamidamajñānamīdṛśam //

prāyaścittāni sarvāṇi viditāni ca te'nagha /
rājadharmāśca te sarve dānadharmāśca te śrutāḥ //

sa kathaṃ sarvadharmajñaḥ sarvāgamaviśāradaḥ /
parimuhyasi bhūyastvamajñānādiva bhārata //