Mahabharata · Chapter 14.4

śuśrūṣe tasya dharmajña rājarṣeḥ parikīrtanam /
dvaipāyana maruttasya kathāṃ prabrūhi me'nagha //
vyāsa uvāca /

āsītkṛtayuge tāta manurdaṇḍidharaḥ prabhuḥ /
tasya putro mahoṣvāsaḥ prajātirabhavannṛpaḥ //

prajāterabhavatputraḥ kṣuta ityabhiviśrutaḥ /
kṣutasya putra ikṣvākurmahīpālo'bhavatprabhuḥ //

tasya putraśataṃ rājannāsītparamadhārmikam /
tāṃstu sarvānmahīpālānikṣvākurakarotprabhuḥ //

teṣāṃ jyeṣṭhastu viṃśo'bhūtpratimānaṃ dhanuṣmatām /
viṃśasya putraḥ kalyāṇo viviṃśo nāma bhārata //

viviṃśasya sutā rājanbabhūvurdaśa pañca ca /
sarve dhanuṣi vikrāntā brahmaṇyāḥ satyavādinaḥ //

dānadharmaratāḥ śāntāḥ satataṃ priyavādinaḥ /
teṣāṃ jyeṣṭhaḥ khanīnetraḥ sa tānsarvānapīḍayat //

khanīnetrastu vikrānto jitvā rājyamakaṇṭakam /
nāśakadrakṣituṃ rājyaṃ nānvarajyanta taṃ prajāḥ //

tamapāsya ca tadrājye tasya putraṃ suvarcasam /
abhyaṣiñcanta rājendra muditā hyabhavaṃstadā //

sa piturvikriyāṃ dṛṣṭvā rājyānnirasanaṃ ca tat /
niyato vartayāmāsa prajāhitacikīrṣayā //

brahmaṇyaḥ satyavādī ca śuciḥ śamadamānvitaḥ /
prajāstaṃ cānvarajyanta dharmanityaṃ manasvinam //

tasya dharmapravṛttasya vyaśīryatkośavāhanam /
taṃ kṣīṇakośaṃ sāmantāḥ samantātparyapīḍayan //

sa pīḍyamāno bahubhiḥ kṣīṇakośāśvavāhanaḥ /
ārtimārcchatparāṃ rājā saha bhṛtyaiḥ pureṇa ca //

na cainamabhihantuṃ te śaknuvanti balakṣaye /
samyagvṛtto hi rājā sa dharmanityo yudhiṣṭhira //

yadā tu paramāmārtiṃ gato'sau sapuro nṛpaḥ /
tataḥ pradadhmau sa karaṃ prādurāsīttato balam //

tatastānajayatsarvānprātisīmānnarādhipān /
etasmātkāraṇādrājanviśrutaḥ sa karandhamaḥ //

āvīkṣittasya putro'bhūttretāyugamukhe purā /
indrādanavaraḥ śrīmāndevairapi sudurjayaḥ //

kārandhama iti khyāto babhūva jagatīpatiḥ / tasya sarve mahīpālā vartante sma vaśe tadā /
sa hi samrāḍabhūtteṣāṃ vṛttena ca balena ca //

avikṣinnāma dharmātmā śauryeṇendrasamo'bhavat /
yajñaśīlo dharmaratirdhṛtimānsaṃyatendriyaḥ //

tejasā'dityasadṛśaḥ kṣamayā pṛthivīsamaḥ /
bṛhaspatisamo buddhyā himavāniva susthiraḥ //

karmaṇā manasā vācā damena praśamena ca /
manāṃsyārādhayāmāsa prajānāṃ sa mahīpatiḥ //

ya īje hayamedhānāṃ śatena vidhivatprabhuḥ /
yājayāmāsa yaṃ vidvānsvayamevāṅgirāḥ prabhuḥ //

tasya putro'ticakrāma pitaraṃ guṇavattayā / marutto nāma dharmajñaścakravartī mahāyaśāḥ /
nāgāyutasamaprāṇaḥ sākṣādviṣṇurivāparaḥ //

sa yakṣyamāṇo dharmātmā śātakumbhamayānyuta /
kārayāmāsa śubhrāṇi bhājanāni sahasraśaḥ //

meruṃ parvatamāsādya himavatpārśva uttare /
kāñcanaḥ sumahānpādastatra karma cakāra saḥ //

tataḥ kuṇḍāni pātrīśca piṭharāṇyāsannāni ca /
cakruḥ suvarṇakartāro yeṣāṃ saṅkhyā na vidyate //

tasyaiva ca samīpe tu yajñavāṭo babhūva ha / īje tatra sa dharmātmā vidivatpṛthivīpatiḥ /
maruttaḥ sahitaiḥ sarvaiḥ prajāpālairnarādhipaḥ //