Mahabharata · Chapter 14.28

sankalpadaṃśamaśakaṃ śokaharṣahimātapam /
mohāndhakāratimiraṃ lobhavyādhisarīsṛpam //

viṣayaikātyayādhvānaṃ kāmakrodhakirātakam /
tadatītya mahādurgaṃ praviṣṭosmi mahadvanam //
brāhmaṇyuvāca /

kva tadvanaṃ mahāprājña ke vṛkṣāḥ saritaśca kāḥ /
kiyantaḥ parvatāścaiva kiyatyadhyani tadvanam //
brāhmaṇa uvāca /

naitadasti pṛthagbhāvaḥ kiñcinadyattataḥ sukham /
naitadastyapṛthagbhāvaḥ kiñcidduḥkhataraṃ tataḥ //

tasmāddhrasvataraṃ nāsti na tatosti mahattaram /
nāsti tasmādduḥkhataraṃ nāstyanyattatsamaṃ sukham //

na tatrāviśyi śocanti na prahṛṣyanti ca dvijāḥ /
na ca bibhyati kebhyaścinnaibhyo bibhyati kecana //

tasminvane sapta mahādrumāśca phalāni saptātithayaśca sapta /
saptāśramāḥ sapta samādhayaśca dīkṣāśca saptaitadaraṇyarūpam //

pañcavarṇāni divyāni puṣpāṇi ca phalāni ca /
sṛjantaḥ pādapāstatra vyāpya tiṣṭhanti tadvanm //

suvarṇāni dvivarṇāni puṣpāṇi ca phalāni ca /
sṛjantaḥ pādapāstatra vyāpya tiṣṭhanti tadvanam //

śaṅkarāṇi trivarṇāni puṣpāṇi ca phalāni ca / sṛjantaḥ pādapāstatra vyāpya tiṣṭhanti tadvanam

surabhīṇi dvivarṇāni puṣpāṇi ca phalāni ca /
sṛjantaḥ pādapāstatra vyāpya tiṣṭhanti tadvanam //

surabhīṇyekavarṇāni puṣpāṇi ca phalāni ca /
sṛjantaḥ pādapāstatra vyāpya tiṣṭhanti tadvanam //

bahūnyavyaktavarṇāni puṣpāṇi ca phalāni ca /
visṛjantau mahāvṛkṣau tadvanaṃ vyāpya tiṣṭhataḥ //

eko vahniḥ sumanā brāhmaṇotra pañcendriyāṇi samidhaścātra santi /
tebhyo vṛkṣāḥka sapta phalanti dīkṣā guṇāḥ phalānyatithayaḥ phalāśāḥ //

ātithyaṃ pratigṛhṇanti tatra sapta maharṣayaḥ /
arciteṣu pralīneṣu teṣvanyadrocate vanam //

prajñāvṛkṣaṃ mokṣaphalaṃ śānticchāyāsamanvitam /
jñānāśrayaṃ tṛptitoyamantaḥkṣetrajñabhāskaram //

ye'dhigacchanti tatsantasteṣāṃ nāsti punarbhavaḥ /
ūrdhvaṃ cādhaśca tiryakca tasya nānto'dhigamyate //

sapta striyastatra caranti satyā- stvavāṅmukhā bhānumatyo janitryaḥ /
ūrdhvaṃ rasānādadate prajābhyaḥ sarvānyathā nityamanityatā ca //

tatraiva pratitiṣṭhanti punastatrodayanti ca /
sapta saptarṣayaḥ siddhā vasiṣṭhapramukhaiḥ saha //

yaśo varco bhagaścaiva vijayaḥ siddhatejasaḥ /
etamevānuvartante sapta jyotīṃṣi bhāskaram //

ṛṣayaḥ parvatāścaiva santi tatra samāsataḥ /
nadyaśca parito vāri vahantyo brahmisambhavam //

nadīnāṃ saṅgamaścaiva vaitāne samupahare /
svātmatṛptā yato yānti sākṣādeva pitāmaham //

kṛśāśāḥ suvratāḥ śāntāstapasā dagdhakilbiṣāḥ /
ātmanyātmānamāveśya brāhmaṇāstamupāsate //

śamimapyatra śaṃsanti vidyāraṇyavido janāḥ /
tadaraṇyamabhipretya yathātatvamajāyata //

etadevedṛśaṃ puṇyamaraṇyaṃ brāhmaṇā viduḥ /
viditvā cānutiṣṭhanti kṣetrajñenānudarśinā //