Mahabharata · Chapter 14.29

gandhānna jighrāmi rāsānna vedmi rūpaṃ na paśyāmi na ca spṛśāmi /
na cāpi śabdānvividhāñśṛṇomi na cāpi saṅkalpamupaimi kañcit //

arthāniṣṭānkāmayate svabhāvaḥ sarvāndveṣyānpradviṣate svabhāvaḥ /
kāmadveṣānudbhavataḥ svabhāvā- tprāṇāpānau jantudehānniveśya //

tebhyaścānyāṃsteṣu nityāṃśca bhāvā- nbhūtātmānaṃ akṣaye'haṃ śarīre /
tasmiṃstiṣṭhannāsmi saktaḥ kathañci- tkāmakrodhābhyāṃ jarayā mṛtyunā ca //

akāmayānasya ca sarvakāmā-
navidviṣāṇasya ca sarvadoṣān / na me svabhāveṣu bhavanti lepā-
stoyasya bindoriva puṣkareṣu //

nityasya caitasya bhavanti nityā nirīkṣyamāṇasya bahūnsvabhāvān /
na sajjate karmasu bhogajālaṃ divīva sūryasya mayūkhajālam //

atrāpyudāharantīmamitihāsaṃ purātanam /
adhvaryuyatisaṃvādaṃ taṃ nibodha yaśasvini //

prokṣyamāṇaṃ paśuṃ dṛṣṭvā yajñakarmaṇyathābravīt /
yatiradhvaryumāsīno hiṃsoyamiti kutsayan //

tamadhvaryuḥ pratyuvāca nāyaṃ chāgo vinaśyati /
śreyasā yokṣyate janturyajñācchrutiriyaṃ tathā //

yo hyasya pārthivo bhāgaḥ pṛthivīṃ sa gamiṣyati /
yadasya vārijaṃ kiñcidapastatsampravekṣyati //

sūryaṃ cakṣurdiśaḥ śrotre prāṇo'sya divameva ca /
āgame vartamānasya name doṣosti kaścana //
yatiruvāca /

prāṇairviyoge cchāgasya yadi śreyaḥ prapaśyasi /
chāgārthe vartate yajño bhavataḥ kiṃ prayojanam //

anu tvāṃ manyate mātā anu tvāṃ manyate pitā /
mantravijñānamunnīya parivarte viśeṣataḥ //

evamevānumanyeraṃstānbhavāndraṣṭumarhati /
teṣāmanumatiṃ śrutvā śakyā kartuṃ vicāraṇā //
adhvaryuruvāca /

prāṇā apyasya cchāgasya prāpitāste svayoniṣu /
śarīraṃ kevalaṃ śiṣṭaṃ niśceṣṭamiti me matiḥ //

indhanasya tu tulyena śarīreṇi vicetasā /
hiṃsā hi yaṣṭukāmānāmindhanaṃ paśusañjñitam //

ahiṃsā sarvadharmāṇāmiti vṛddhānuśāsanam /
yadahiṃsraṃ bhavetkarma tatkāryamiti vidmahe //

ahiṃseti pratijñeyaṃ yadi vakṣyāmyataḥ param /
śakyaṃ bahuvidhaṃ vaktuṃ bhavatā kāryadūṣaṇam //

ahiṃsā sarvabhūtānāṃ nityamasmāsu rocate /
pratyakṣataḥ sādhayāmo na parokṣamupāsmahe //
adhvaryaruvāca /

bhūmergandhaguṇānbhuṅkṣva pibasyāpomayānrasān /
jyotiṣāṃ paśyate rūpaṃ spṛśasyanilajānguṇān //

śṛṇoṣyākāśajāñśabdānmanasā manyase matim /
sarvāṇyetāni bhūtāni prāṇā iti ca manyase //

prāṇādāne nivṛttosi hiṃsāyāṃ vartate bhavān /
nāsti ceṣṭā vinā hiṃsāṃ kiṃ vā tvaṃ manyase dvija //
yatiruvāca /

akṣaraṃ ca kṣaraṃ caiva dvaidhībhāvo'yamātmanaḥ /
akṣaraṃ tatra sadbhāvaḥ svabhāvaḥ kṣara ucyate //

prāṇo jihvā manaḥ sattvaṃ sadbhāvo rajasā saha /
bhāvairetairvimuktasya nirdvandvasya nirāśiṣaḥ //

samasya sarvabhūteṣu nirmamasya jitātmanaḥ /
samantātparimuktasya na bhayaṃ vidyate kvacit //
adhvaryuruvāca /

sadbhireveha saṃvādaḥ kāryo matimatāṃvara /
bhavato hi mataṃ śrutvā pratibhāti matirmama //

bhagavanbhagavadbuddhyā pratibuddho bravīmyaham /
vrataṃ mantrakṛtaṃ karturnāparādhosti me dvija //
brāhmaṇa uvāca /

upapattyā yatistūṣṇīṃ vartamānastataḥ param /
adhvaryurapi nirmohaḥ pracacāra mahāmakhe //

evametādṛśaṃ mokṣaṃ susūkṣmaṃ brāhmaṇā viduḥ /
viditvā cānutiṣṭhanti kṣetrajñenārthadarśinā //