Mahabharata · Chapter 14.27

ekaḥ śāstā na dvitīyosti śāstā yo hṛcchayastamahamanu bravīmi /
tenaiva yuktaḥ pravaṇādivodakaṃ yathā niyuktosmi tathā vahāmi //

eko gururnāsti tato dvitīyo yo hṛcchayastamahamanu bravīmi /
tenānuśiṣṭā guruṇā sadaiva purā hatā dānavāḥ sarva eva //

eko bandhurnāsti tato dvitīyo yo hṛcchayastamahamanu bravīmi /
tenānuśiṣṭā bāndhavā bandhumantaḥ saptarṣayaḥ pārtha divi prabhānti //

ekaḥ śrotā nāsti tato dvitīyo yo hṛcchayastamahamanu bravīmi /
tasmingurau guruvāsaṃ niruṣyaṭa śakro gataḥ sarvalokāmaratvam //

eko dveṣṭā nāsti tato dvitīyo yo hṛcchayastamahamanu bravīmi /
tenānuśiṣṭā guruṇā sadaiva loke dviṣṭāḥ pannagāḥ sarva eva //

atrāpyudāharantīmamitihāsaṃ purātanam /
prajāpatau pannagānāṃ devarṣīṇāṃ ca saṃvidam //

devarṣayaśca nāgāścāpyasurāśca prajāpatim /
paryapṛcchannupāsīnaṃ śreyoḥ naḥ procyatāmiti //

teṣāṃ provāca bhagavāñśreyaḥ samanupṛcchatām /
omityekākṣaraṃ brahma te śrutvā prādravandiśaḥ //

teṣāṃ pradravamāṇānāmupadeśaṃ ca śṛṇvatām /
sarpāṇāṃ daṃśane bhāvaḥ pravṛttaḥ pūrvame tu //

asurāṇāṃ pravṛttastu dambhabhāvaḥ svabhāvajaḥ /
dānaṃ devā vyavasitā damameva maharṣayaḥ //

ekaṃ śāstāramāsādya śabdenaikena saṃskṛtāḥ /
nānāvyavasitāḥ sarve sarpadevarṣidānavāḥ //

śṛṇotyayaṃ procyamānaṃ gṛhṇāti ca yathātatham /
pṛcchatastadato bhūyo gururanyo na vidyate //

tasya cānumate karma tataḥ paścātpravartate /
gururbandhuśca śāstā ca dveṣṭā ca hṛdi saṃśritāḥ //

pāpena vicaram̐lloke pāpacārī bhavatyayam /
śubhena vicaram̐lloke śubhacārī bhavatyuta //

kāmacārī tu kāmena ya handriyasukhe rataḥ /
brahmacārī sadaivaiṣa ya indriyajaye rataḥ //

apetavratakarmā tu kevalaṃ brahmaṇi sthitaḥ /
brahmabhūtaścaram̐lloke brahmacārī bhavatyayam //

brahmaiva samidhastasya brahmāgnirbrahmasaṃstaraḥ /
āpo brahma gururbrahma sa brahmaṇi samāhitaḥ //

etadevedṛśaṃ sūkṣmaṃ brahmacaryaṃ vidurbudhāḥ /
viditvā cānvapadyanta kṣetrajñenānudarśitāḥ //