Mahabharata · Chapter 14.117

kīdṛśānāṃ tu śūdrāṇāṃ nānugṛhṇāsi cārcanam /
udvegastava kasmāddhi tanme brūhi sureśvara //
bhagavānuvāca /

avratenāpyabhaktena spṛṣṭāṃ śūdreṇa cārcanām /
tāṃ varjayāmi rājendra śvapākavihitāmiva //

nanvahaṃ śaṅkaraścāpi gāvo viprāstathaiva ca /
aśvattho'mararūpaṃ hi trayametadyudhiṣṭhira //

etattrayaṃ hi madbhakto nāvamanyeta karhicit /
avamānitametattu dahatyāsaptamaṃ kulam //

aśvattho brāhmaṇā gāvo manmayāstārayanti hi /
tasmādetatprayatnena trayaṃ pūjaya pāṇḍava //
yudhiṣṭhira uvāca /

brāhmaṇenaiva dehena kathaṃ śūdratvamāpnuyāt /
brahma vā naśyati kathaṃ vaktuṃ deva tvamarhasi //
bhagavānuvāca /

kūpasnānaṃ tu yo vipraḥ kuryāddvādaśavārṣikam /
sa tenaiva śarīreṇa śūdratvaṃ yātyasaṃśayam //

yastu rājāśrayeṇaiva jīveddvādaśavārṣikam /
sa śūdratvaṃ vrajedvipro vedānāṃ pāragopi san //

pattane nagare vā'pi yo dvādaśasamā vaset /
sa śūdratvaṃ vrajedvipro nātra kāryā vicāraṇā //

utpādayati yaḥ putraṃ śūdrāyāṃ kāmamohitaḥ /
tasya kāyagataṃ brahma sadya eva vinaśyati //

yaḥ somalatikāṃ vipraḥ kevalaṃ bhakṣayedvṛthā /
tasya kāyagataṃ brahma sadya eva vinaśyati //

maithunaṃ kurute yastu jihvāyāṃ brāhmaṇo nṛpa /
tasya kāyagataṃ brahma sadya eva vinaśyati //

vipratvaṃ durlabhaṃ prāpya durmargairevamādibhiḥ /
vināśayanti ye tattu tāñśocāmi yudhiṣṭhira //

tasmātsarvapratnena matpriyo yo yudhiṣṭhira /
jātibhraṃśakaraṃ karma na kuryādīdṛśaṃ dvijaḥ //