Mahabharata · Chapter 14.111

svabhaktasya hṛṣīkeśa dharmādharmamajānataḥ /
dharmaṃ puṇyatamaṃ deva pṛcchataḥ kathayasva me //
bhagavānuvāca /

yadetadagnihotraṃ vai sṛṣṭaṃ varṇatrayasya tu / mantravadyaddhutaṃ samyagvidhinā cāpyupāsitam /
āhitāgniṃ nayatyūrdhvaṃ sapatnīkaṃ sabāndhavam //
yudhiṣṭhira uvāca /

kathaṃ tadbrāhmaṇairdeva hotavyaṃ kṣatriyaiḥ katham /
vaiśyairvā devadeveśa kathaṃ vā suhutaṃ bhavet //

kasminkāle kataṃ kasya ādheyo'gniḥ surottama /
āhitasya kathaṃ vā'pi samyagācaraṇaṃ bhavet //

katyagnayaḥ kimātmānaḥ sthānaṃ kiṃ kasya vā vibho /
katarasminhute sthāne kaṃ vrajedāgnihotrikaḥ //

agnihotranimittaṃ ca kimutpannaṃ purā'nagha /
kathamevātha hūyante prīyante ca surāḥ katham //

vidhivanmantravatkṛtvā pūjitāstvagnayaḥ katham /
kāṃ gatiṃ vadatāṃśreṣṭha nayanti hyagnihotriṇaḥ //

durhutāścāpi bhagavannavijñātāstrayo'gnayaḥ /
kimāhitāgneḥ kurvanti duścīrṇā vā'pi keśava //

utsannāgnistu pāpātmā kāṃ yoniṃ deva gacchati / etatsarvaṃ samāsena bhaktyā hyupagatasya me /
vaktumarhasi sarvajña sarvādhikaṃ namostu te //
bhagavānuvāca /

śṛṇu rājanmahāpuṇyamidaṃ dharmāmṛtaṃ param /
yattu tārayate yuktānbrāhmaṇānagnihotriṇaḥ //

brhamitvenāsṛjaṃ lokānahamādau mahādyute /
sṛṣṭo'gnirmukhataḥ pūrvaṃ lokānāṃ hitakāmyayā //

yasmādagre sa bhūtānāṃ sarveṣāṃ nirmito mayā /
tasmādagnītyabhihitaḥ purāṇajñairmanīṣibhiḥ //

yasmāttu sarvakṛtyeṣu pūrvamasmai pradīyate /
āhutirdīpyamānāya tasmādagnīti kathyate //

yasmācca tu nayatyagrāṃ gatiṃ viprānsupūjitaḥ /
yasmācca nayanādrājandeveṣvagnīti kathyate //

tasmācca durhutaḥ soyamalaṃ bhakṣayituṃ kṣaṇāt /
yajamānaṃ naraśreṣṭha kravyādo'gnistataḥ smṛtaḥ //

sarvabhūtātmako rājandevānāmeṣa vai mukham /
prathamaṃ manmukhātsṛṣṭo lokārthe pacanaḥ prabhuḥ //

sṛṣṭamātro jagatsarvamattumaicchatpurā khalu /
tataḥ praśamitaḥ sognirūpāsyaiva mayā purā //

satatopāsanātsoyamaupāsana iti smṛtaḥ //

āhutiḥ sarvamākhyāti tasminvasati sonalaḥ /
āvasathya iti khyātastenāsau brahmavādibhiḥ //

tasmātpañca mahāyajñā vartante yasya dharmataḥ /
somamaṇḍalamadhyena gatistasya dvijanmanaḥ //

te ca saptarṣayaḥ siddhāḥ saṃyatendriyabuddhayaḥ /
gatā hyamarasāyujyaṃ te hyagnyarcanatatparāḥ //

apare cāvasathyaṃ ca pacanāgniṃ pracakṣate /
tasminpañca mahāyajñā vaiśvadevaśca vartate //

sthalīpākaṃ ca gārhaṃ ca sarve cāsminpratiṣṭhitāḥ /
gṛhyakarmavaho yasmāttasmādgṛhapatistu saḥ //

aupāsanaṃ cāvasathyaṃ sabhyaṃ pacanapāvakam /
āhurbrahmavidaḥ kecinmatametanmamāpi ca //

agnihotraprakāraṃ ca śṛṇu rājansamāhitaḥ /
trayāṇāṃ guṇanāmānāṃ vahnīnāmucyate mayā //

gṛhāṇāṃ hi patitvaṃ hi gṛhapatyamiti smṛtam /
gṛhapatyaṃ tu yasyāsīttattasmādgārhapatyatā //

yajamānaṃ tu yasmāttu dakṣiṇāṃ tu gatiṃ nayet /
dakṣiṇāgniṃ tamāhuste dakṣiṇāyatanaṃ dvijāḥ //

āhutiḥ sarvamākhyāti havyaṃ vai vahanaṃ smṛtam /
sarvahavyavaho vahnirgataścāhavanīyatām //

yaṃ cāksathyaṃ juhuyānmūlāgniṃ vidhivaddvijaḥ /
āvasathyaṃ tu taṃ cāgniṃ pacanāgniṃ pracakṣate //

teṣāṃ sa bhāgato vahniḥ sabhya ityabhidhīyate /
āvatathyastu yo vahniḥ prathamaḥ sa prajāpatiḥ //

brahmā ca gārhapatyo'gnistasminneva hi sobhavat /
dakṣiṇāgnistvayaṃ rudraḥ krodhātmā caṇḍa eva saḥ //

ahamāhavanīyo'gnirāhomādyasya vai mukhe /
sabhyo'gniḥ pañcamo yastu skanda eva narādhipa //

pṛthivī gārhapatyo'gnirantarikṣaṃ ca dakṣiṇaḥ /
svargamāhavanīyo'gnirevamagnitrayaṃ smṛtam //

vṛttaśca gārhapatyo'gniryasmādvṛttā ca medinī /
ardhacandrākṛtistaṃ vai dakṣiṇāgnistathā bhavet //

caturaśraṃ tataḥ svargaṃ nirmalaṃ tu nirāmayam /
tasmādāhavanīyo'gniścaturaśro bhavennṛpa //

juhuyādgārhapatyaṃ yo bhuvaṃ jayati sa dvijaḥ /
juhoti dakṣiṇaṃ yastu sa jayatyantarikṣakam //

pṛthivīmantarikṣaṃ ca divaṃ ṛṣigaṇaiḥ saha /
jayatyāhavanīyaṃ yo juhuyādbhaktimānnaraḥ //

ābhimukhyena homastu yasya yajñeṣu vartate /
tenāpyāhavanīyatvaṃ gato vahnirmahādyutiḥ //

āhomādagnihotreṣu yajñairvā yatra sarvaśaḥ /
yasmāttasmātpravartante tato hyāhavanīyatā //

yastvāvasathyaṃ juhuyānmūlāgniṃ vidhivaddvijaḥ /
sa tu saptarṣilokeṣu sapatnīkaḥ pramodate //

iṣṭo bhavati sarvāgneragnihotraṃ ca tadbhavet /
trāṇādvai yajamānasya hyagnihotramiti smṛtam //

hoijyeṣu viṣādo vai viṣādo duḥkhamucyate /
duḥkhaṃ tāpatrayaṃ proktaṃ tāpaṃ hi narakaṃ viduḥ //

ādhyātmikaṃ cādhidaivamādhibhautikameva ca /
etattāpatrayaṃ proktamātmavidbhirnarādhipa //

yasmādvai trāyate duḥkhādyajamānaṃ huto'nalaḥ /
tasmāttu vidhivatproktamagnihotramiti śrutau //

tadagnihotraṃ sṛṣṭaṃ vai brahmaṇā lokakartṛṇā /
vedāścāpyagnihotraṃ tu jajñire svayameva tu //

agnihotraphalā dārā dattabhuktaphalaṃ dhanam //
ratiputraphalā dārā dattabhuktaphalaṃ dhanam //

trivedamantrasaṃyogādagnihotraṃ pravartate /
ṛgyajuḥsāmabhiḥ puṇyaiḥ sthāpyate sūtrasaṃyutaiḥ //

vasante brāhmaṇasya syādādheyo'gnirnarādhipa /
vasanto brāhmaṇo jñeyo vedayoniḥ sa ucyate //

agnyādheyaṃ tu yenātha vasante kriyate'nagha /
tasya śrīrbahmavṛddhiśca brāhmaṇasya vivardhate //

kṣatriyasyāgnirādheyo grīṣme śreṣṭhaḥ sa vai nṛpa / yenādhānaṃ tu vai grīṣme kriyate tasya vardhate /
śrīḥ prajāḥka paśavaścaiva vittaṃ tejo balaṃ yaśaḥ //

śaradṛtau tu vaiśyasya hyādhānīyo hutāśanaḥ /
śaradrātraṃ svayaṃ vaiśyo vaiśyayoniḥ sa ucyate //

śaradyādhānamevaṃ vai kriyate yena pāṇḍava /
tasyāpi śrīḥ prajā'yuśca paśavo'rthaśca vardhate //

paśavaḥ sarva evaite tribhiḥ sarvairalaṅkṛtāḥ /
agnihotrā hyavartante taireva dhriyate jagat //

grāmyāraṇyāśca paśavo pṛkṣāścaiva tṛṇāni ca /
phalānyoṣadhayaścāpi agnihotrakṛte haviḥ //

rasāḥ snehāstathā gandhā ratnāni maṇayastathā /
kāñcanāni ca lohāni hyagnihotrakṛte'bhavan //

āyurvedo dhanurvedo mīmāṃsā nyāyavistaraḥ /
dharmaśāstraṃ ca tatsarvamagnihotrakṛte kṛtam //

chandaḥ śikṣā ca kalpaśca tathā vyākaraṇāni ca /
śāstraṃ jyotirniruktaṃ cāpyagnihotrakṛte kṛtam //

itihāsapurāṇaṃ ca gāthāścopaniṣattathā /
ātharvaṇāni karmāṇi cāgnihotrakṛte kṛtam //

yaccaitasyāṃ pṛthivyāṃ vai kiñcidasti carācaram /
tatsarvamagnihotrasya kṛte sṛṣṭaṃ svayambhuvā //

agnihotrasya darśasya pūrṇamāsasya cāpyatha /
yupeṣṭipaśubandhānāṃ somapānakriyāvatām //

tithinakṣatrayogānāṃ muhūrtakaraṇātmakam /
kālasya vedanārthaṃ tu jyotirjñānaṃ purā'nagha //

ṛgyajuḥ sāmamantrāṇāṃ ślokatatvārthacintanāt /
pratyāpattivikalpānāṃ chandojñānaṃ pralpitam //

varṇākṣarapadārthānāṃ sandhiliṅgaṃ prakīrtitam /
nāmadhātuvivekārthaṃ purā vyākaraṇaṃ smṛtam //

yūpavedyadhvarārthaṃ tu prokṣaṇaśravaṇāya tu /
yajñadaivatayogārthaṃ śikṣājñānaṃ prakalpitam //

yajñapātrapavitrārthaṃ dravyasambhāraṇāya ca /
sarvayajñavikalpāya purākalpaṃ prakalpitam //

nāmadhātuvikalpānāṃ tatvārthaniyamāya ca /
sarvavedaniruktānāṃ niruktamṛṣibhiḥ kṛtam //

vedyarthaṃ pṛthivī sṛṣṭā sambhārārtha tathaiva ca /
idhmārthamatha yūpārthaṃ brahmā cakre vanaspatim //

grāmyāraṇyāśca paśavo jāyante yajñakāraṇāt /
mantrāṇāṃ viniyogaṃ ca prokṣitaṃ śrapaṇaṃ tathā //

anuyājaprayājāśca marutāṃ śaṃsinastathā /
audgātraṃ caiva sāmnāṃ vai pratiprasthānameva ca //

viṣṇukramāṇāṃ kramaṇaṃ dakṣiṇāvabhṛthaṃ tathā /
trikāsamarcanaṃ caiva syāneṣūpahṛtaṃ tathā //

devatāgrahaṇaṃ mokṣaṃ haviṣāṃ śrapaṇaṃ tathā / nāvabuddhyanti ye viprā nindanti ca paśorvadham /
te yānti narakaṃ ghoraṃ rauravaṃ tamasā'vṛtam //

śatavarṣasahasrāṇi tatra sthitvā narādhamāḥ /
kṛmirbhirbhakṣyamāṇāśca tiṣṭheyuḥ pūyaśoṇite //

vṛkṣā yūpatvamicchanti paśutvaṃ paśavastathā /
tṛṇānīcchanti barhiṣṭvamoṣadhyaśca haviṣyatām / somatvaṃ ca latāḥ sarvā veditvaṃ ca vasundhara //

yasmātpaśutvamicchanti paśavaḥ svargalipsayā /
tasmātpaśuvadhe hiṃsā nāsti yajñeṣu pāṇḍava //

yūpāstanmantrasaṃskārairdarbhāśca paśavastathā /
yajamānena sahitāḥ svargaṃ yānti nareśvara //

yāvatkālaṃ hi yajvā vai svargaloke mahīyate /
tāvatkālaṃ pramodante paśavo hyadhvare hatāḥ //

ahiṃsā vaidikaṃ karma brahmakarmeti tatkṛtam / vedoktaṃ ye na kurvanti hiṃsābuddhyā kratūndvijāḥ /
sadyaḥ śūdratvāmāyānti pretya caṇḍālatāmapi //

gāvo yajñārthamutpannā dakṣiṇārthaṃ tathaiva ca /
suvarṇaṃ rajataṃ caiva pātrakrubhārthameva ca //

darbhāḥ saṃstaraṇārtaṃ tu rakṣasāṃ rakṣaṇāya ca /
pajanārthaṃ dvijāḥ sṛṣṭāstārakā divi devatāḥ //

kṣatriyā rakṣaṇārthaṃ tu vaiśyā vārtānimittataḥ /
śuśrūṣārthaṃ trayāṇāṃ vai śūdrāḥ sṛṣṭāḥ svayambhuvā //

evametajjagatsarvamagnihotrakṛte kṛtam /
nāvabudhyanti ye caiva narāstu tamasā vṛtāḥ //

te yānti narakaṃ ghoraṃ rauravaṃ nāma viśrutam /
rauravādviprayuktāstu kṛmiyoniṃ vrajanti te //

yathoktamagnihotrāṇāṃ śuśrūṣanti ca ye dvijāḥ /
tairdattaṃ sahutaṃ ceṣṭaṃ dattamadhyāpitaṃ bhavet //

evamiṣṭaṃ ca pūrtaṃ ca yadvipraiḥ kriyate nṛpa /
tatsarvaṃ samyagāhṛtya cāditye sthāpayāmyaham //

mayā sthāpitamāditye lokasya sukṛtaṃ hi tat /
dhārayedyatsahasrāṃśuḥ sukṛtaṃ hyagnihotriṇām //

yāvatkālaṃ tu tiṣṭhanti loke cāpyagnihotriṇaḥ /
tāvadeva hi puṇyena dīpyate raviṇā'mbare //

svarge svargaṃ gatānāṃ tu vīryādbhavati vīryavān / tatra te hyupabhuñjanti hyagnihotrasya tatphalam /
samānarūpā devānāṃ tiṣṭhantyābūtasamplavam //

vṛthā'gninā ca ye keciddahyante hyagnihotriṇaḥ /
na te'gnihotriṇāṃ loke mānasā'pi vrajanti te //

vīraghrāstu durācārā daridrāstu narādhamāḥ /
vikalā vyādhitāścāpi jāyante śūdrayoniṣu //

tasmādaproṣitairnityamagnihotraṃ dvijātibhiḥ /
hotavyaṃ vidhivadrājannūrdhvāmicchanti ye gatim //

ātmavannāvamantavyamagnihotraṃ yudhiṣṭira /
na tyājyaṃ kṣaṇimapyetadagnihotraṃ yudhiṣṭhira //

vṛddhatve'pyagnihotraṃ ye gṛhṇanti vidhivaddvijāḥ /
śūdrānnādviratā dāntāḥ saṃyatendriyabuddhayaḥ //

pañcayajñaparā nityaṃ lobhakrodhavivarjitāḥ /
dvikālamatithīṃścaiva pūjayanti ca bhaktitaḥ //

te'pi sūryodayaprakhyairvimānairvāyuvegibhiḥ /
mama loke pramodante dṛṣṭvā māṃ ca yudhiṣṭhira //

manvantaraṃ ca tatraikaṃ moditā dvijasattamāḥ /
iha mānuṣyake loke jāyante dvijasattamāḥ //

bālāhitāgrayo ye ca śūdrānnādviratāḥ sadā / krodhalobhavinirmuktāḥ prātassnānaparāyaṇāḥ /
yathoktamagnihotraṃ vai juhvate vijitendriyāḥ //

ātitheyāḥ sadā saumyā dvikālaṃ matparāyaṇāḥ /
te yāntyapunarāvṛttiṃ bhittvā cādityamaṇḍalam //

mama lokaṃ sapatnīkā yānaiḥ sūryodayaprabhaiḥ /
tatra bālārkasaṅkāśāḥ kāmagāḥ kāmarūpiṇaḥ //

aiśvaryaguṇasampannāḥ krīḍanti ca yathāsukham /
ityeṣāmāhitāgnīnāṃ vibhūtiḥ pāṇḍunandana //

śrutiṃ kecinnindamānāḥ śrutiṃ dūṣyantyabuddhayaḥ / pramāṇaṃ na ca kurvanti ye yāntīhāpi durgatim /

pramāṇamitihāsaṃ ca vedānkurvati ye dvijāḥ /
te yāntyamarasāyujyaṃ nityamāstikyabuddhayaḥ //