Mahabharata · Chapter 14.107

idaṃ me tatvato deva vaktumarhasyaśeṣataḥ /
hiṃsāmakṛtvā yo martyo brahmahatyāmavāpnuyāt //
bhagavānuvāca /

brāhmaṇaṃ svayamāhūya bhikṣārthaṃ vṛttikarśitam /
brūyānnāstīti yaḥ paścāttamāhurbrahmaghātakam //

madhyasthasyeha viprasya yo'nūcānasya bhārata /
vṛttiṃ harati durbuddhaistamāhurbrahmaghātakam //

āśrame vā'laye vā'pi grāme vā nagare'pi vā /
agniṃ yaḥ prakṣipetkruddhastamāhurbrahmaghātakam //

gokulasya tṛṣārtasya jalānte vasudhādhipa /
utpādayati yo vighnaṃ tamāhurbrahmaghātakam //

yaḥ pravṛttāṃ śrutiṃ samyakchāstraṃ vā munibhiḥ kṛtam /
dūṣayatyanabhijñāya tamāhurbrahmaghātakam //

cakṣuṣā vā'pi hīnasya paṅgorvā'pi jaḍasya vā /
haredvai yastu sarvasvaṃ tamāhurbrahmaghātakam //

guruṃ tvankṛtyaṃ hunkṛtya atikramya ca śāsanam /
vartate yastu mūḍhātmā tamāhurbrahmaghātakam //

krodhādvā yadi vā dveṣādākruṣṭastarjitopi vā /
ṛtau striyaṃ vā nopeyāttamāhurbrahmaghātakam //

yāvatsāro bhaveddīnastannāśe yasya duḥsthitiḥ /
tatsarvasvaṃ haredyo vai tamāhurbrahmaghātakam //
yudhiṣṭhira uvāca /

sapveṣāmapi dānānāṃ yattu dānaṃ viśiṣyate /
abhojyānnāśca ye viprāstānbravīhi surottama //
bhagavānuvāca /

annameva praśaṃsanti devā brahmapurassarāḥ /
annena sadṛśaṃ dānaṃ na bhūtaṃ na bhaviṣyati //

annamūrjaskaraṃ loke hyannātprāṇāḥ pratiṣṭhitāḥ /
abojyānnānmayā rājanvakṣyamāṇānnibodha me //

dīkṣitasya kadaryasya kruddhasya nikṛtasya ca /
abhiśaptasya ṣaṇḍasya pākabhedakarasya ca //

cikitsakasya dūtasya tathā cocchiṣṭabhojinaḥ /
ugrānnaṃ sūtakānnaṃ ca śūdroccheṣaṇameva ca //

dviṣadannaṃ na bhoktavyaṃ patitānnaṃ ca yacchrutam /
tathā ca piśunasyānnaṃ yajñavikrayiṇastathā //

śailūṣaṃ tantuvāyānnaṃ kṛtaghnasyānnameva ca /
ambaṣṭhakaniṣādānāṃ raṅgāvatarakasya ca //

suvarṇakarturvaiṇasyi śastravikrayiṇastathā /
sūtānā śauṇḍikānāṃ ca vaidyasya rajakasya ca //

strījitasya nṛśaṃsasya tathā māhiṣikasya ca /
anirdaśānāṃ pretānāṃ gaṇikānāṃ tathaiva ca //

bandino dyūtakartuśca tathā dyūtavidāmapi /
parivittasya yaccānnaṃ parivettustathaiva ca //

yaścāgradidhiṣurvipro didhiṣūpapistathā /
tayorapyubhayorannaṃ rājñāṃ cāpi vivarjayet //

rājānnaṃ teja ādatte śūdrānnaṃ brahmavarcasam /
āyuḥ suvarṇakārānnaṃ yaśaścārmāvakṛntinaḥ //

gaṇānnaṃ gaṇikānnaṃ ca lokebhyaḥ parikīrtitam /
pūyaṃ cikitsakasyānnaṃ śuklaṃ tu vṛṣalīpateḥ //

viṣṭhā vārdhuṣikasyānnaṃ tasmāttatparivarjayet /
teṣāṃ tvagasthiromāṇi bhuṅkte yo'nnaṃ tu bhakṣayet //

amātyānnamathaiteṣāṃ bhuktvā tu triyahaṃ kṣipet /
matyā bhuktvā sakṛdvā'pi prājāpatyaṃ careddvijaḥ //

dānānāṃ ca phalaṃ yadvai śṛṇu pāṇḍava tatvataḥ /
jaladastṛptimāpnoti sukhamakṣayamannadaḥ //

tiladaśca prajāmiṣṭāṃ dīpadaścakṣuruttamam /
bhūmado bhūmimāpnoti dīrghamāyurhiraṇyadaḥ //

gṛhado'gryāṇi veśmāni rūpyado rūpamuttamam /
vāsodaścandrasālokyamaśvisālokyamaśvadaḥ //

anaḍuddaḥ śriyaṃ juṣṭāṃ godo golokamaśnute /
yānaśayyāprado bhāryāmaiśvaryamabhayapradaḥ //

dhānyadaḥ śāśvataṃ saukhyaṃ brahmado brahmasāmyatām /
sarveṣāmeva dānānāṃ brahmadānaṃ viśiṣyate //

hiraṇyabhūgavāśvājavastraśayyāsanādiṣu / yorcitaḥ pratigṛhṇāti dadyāducitameva ca /
tāvubhau gacchataḥ svargaṃ narakaṃ ca viparyaye //

anṛtaṃ na vadedvidvāṃstapastaptvā na vismayet /
nārtopyabhibhavedviprānna dattvā parikīrtayet //

yajño'nṛtena kṣarati tapaḥ kṣarati vismayāt /
āyurviprāvamānena dānaṃ tu parikīrtanāt //

ekaḥ prajāyate jantureka eva pramīyate /
ako'nubhuṅkte sukṛtamekaścāpnoti duṣkṛtam //

mṛtaṃ śarīramutsṛjya kāṣṭhaloṣṭasamaṃ kṣitau /
vimukhā bāndhavā yānti dharmastamanuvartate //

anāgatāni kāryāṇi kartuṃ gaṇayate manaḥ /
śarīrakaṃ samuddiśya smayate nūnamantakaḥ //

tasmāddharmasahāsastu dharmaṃ sañcinuyātsadā /
dharmeṇa hi sahāyena tamastarati dustaram //

yeṣāṃ taṭākāni bahūdakāni sabhāśca kūpāśca śubhāḥ prapāśca /
annapradānaṃ madhurā ca vāṇī yamasya te nirviṣayā bhavanti //