Mahabharata · Chapter 13.95

yau ca syātāṃ caraṇenopapannau yau vidyayā sadṛśau janmanā ca /
tābhyāṃ dānaṃ katarasmai viśiṣṭa- mayācamānāya ca yācate ca //
bhīṣma uvāca /

śreyo vai yācataḥ pārtha dānamāhurayācate /
arhattamo vai dhṛtimānkṛpaṇādakṛtātmanaḥ //

kṣatriyo rakṣaṇadhṛtirbrāhmaṇo'narthanādhṛtiḥ /
brāhmaṇo dhṛtimānvidvāndevānprīṇāti tuṣṭimān //

yācyamāhuranīśasya atihāraṃ ca bhārata /
udvejayanti yācanti yadā bhūtāni dasyuvat //

mriyate yācamāno vai tamanu mriyate'dadat /
dadatsañjīvayatyenamātmānaṃ ca yudhiṣṭhira //

ānṛśaṃsyaṃ paro dharmo yācate yatpradīyate /
ayācataḥ sīdamānānsarvopāyairnimantrayet //

yadi vai tādṛśā rāṣṭre vaseyuste dvijottamāḥ /
bhasmacchannānivāgnīṃstānbudhyethāstvaṃ prayatnataḥ //

tapasā dīpyamānāste daheyuḥ pṛthivīmapi /
apūjyamānāḥ kauravya pūjārhāstu tathāvidhāḥ //

pūjyā hi jñānavijñānatapoyogasamanvitāḥ / tebhyaḥ pūjāṃ prayuñjīthā brāhmaṇebhyaḥ parantapaḥ

dadadbahuvidhāndeyānupacchandayate ca tān //

yadagnihotre suhute sāyamprātarbhavetphalam /
vidyāvedavratavati taddānaphalamucyate //

vidyāvedavratasnātā na vyāpāśrayajīvinaḥ /
gūḍhasvādhyāyatapaso brāhmaṇānsaṃśitavratān //

kṛtairāvasathairhṛdyaiḥ sapreṣyaiḥ saparicchadaiḥ /
nimantrayethāḥ kauravya kāmaiścānyairdvijottamān //

api te pratigṛhṇīyuḥ śraddhopetaṃ yudhiṣṭhira /
kāryamityeva manvānā dharmajñāḥ sūkṣmadarśinaḥ //

api te brāhmaṇā bhuktvā gatāḥ soddharaṇāngṛhān /
yeṣāṃ dārāḥ pratīkṣante parjanyamiva karṣakāḥ //

annāni prātaḥsavane niyatā brahmacāriṇaḥ /
brāhmaṇāstāta bhuñjānāstretāgniṃ prīṇayantyuta //

mādhyandinaṃ te savanaṃ dadatastāta vartatām /
gohiraṇyāni vāsāṃsi tenendraḥ prīyatāṃ tava //

tṛtīyaṃ savanaṃ te vai vaiśvadevaṃ yudhiṣṭhira /
yaddevebhyaḥ pitṛbhyaśca viprebhyaśca prayacchasi //

ahiṃsā sarvabhūtebhyaḥ saṃvibhāgaśca sarvaśaḥ /
damastyāgo dhṛtiḥ satyaṃ bhavatyavabhṛthāya te //

etha te citato yajñaḥ śraddhāpūtaḥ sadakṣiṇaḥ /
viśiṣṭaḥ sarvayajñānāṃ nityaṃ tāta pravartatām //