Scripture Library

Mahabharata · Chapter 13.89

13.89.1

tataḥ sa rājā rātryante pratibuddho mahāmanāḥ /
kṛtapūrvāhṇikaḥ prāyātsabhāryastadvanaṃ prati //

13.89.2

tato dadarśa nṛpatiḥ prāsādaṃ sarvakāñcanam / maṇistambhasahasrāḍhyaṃ gandharvanagaropamam /
tatra divyānabhiprāyāndadarśa kuśikastadā //

13.89.3

parvatānrūpyasānūṃśca nalinīśca sapaṅkajāḥ / citraśālāśca vividhāstoraṇāni ca bhārata /
śādvalopacitāṃ bhūmiṃ tathā kāñcanakuṭṭimām //

13.89.4

sahakārānpraphullāṃśca ketakoddālakānvarān /
aśokānsahakundāṃśca phullāṃścaivātimuktakān //

13.89.5

campakāṃstilakānbhavyānpanasānvañjulānapi /
puṣpitānkarṇikārāṃśca tatratatra dadarśa ha //

13.89.6

śyāmānvāraṇapuṣpāṃśca tathā'ṣṭapadikā latāḥ /
tatratatra pariklṛptā dadarśa sa mahīpatiḥ //

13.89.7

ramyānpadmotpaladharānsarvartukusumāṃstathā /
vimānapratimāṃścāpi prāsādāñśailasannibhān //

13.89.8

śītalāni ca toyāni kvaciduṣṇāni bhārata /
āsanāni vicitrāṇi śayanapravarāṇi ca //

13.89.9

paryaṅkānratnasauvarṇānparārdhyāstaraṇāstṛtān /
bhakṣyaṃ bhojyamanantaṃ ca tatratatropakalpitam //

13.89.10

vāṇīvādāñchukāṃścaiva śārikā bhṛṅgarājakān /
kokilāñchatapatrāṃśca sakoyaṣṭikakukkubhān //

13.89.11

mayūrānkukkuṭāṃścāpi dātyūhāñjīvajīvakān /
cakorānvānarānhaṃsānsārasāṃścakrasāhvayān //

13.89.12

samantataḥ praṇadato dadarśa sumanoharān /
kvacidapsarasāṃ saṅghāngandharvāṇāṃ ca pārthiva //

13.89.13

kāntābhiraparāṃstatra pariṣvakrāndadarśa ha /
na dadarśa ca tānbhūyo dadarśa ca punarnṛpaḥ //

13.89.14

gītadhvaniṃ sumadhuraṃ tathaivādhyayanadhvanim /
haṃsānasumadhurāṃścāpi tatra śuśrāva pārthivaḥ //

13.89.15

taṃ dṛṣṭvā'tyadbhutaṃ rājā manasā'cintayattadā /
svapno'yaṃ cittavibhraṃśa utāho satyameva tu //

13.89.16

aho saha śarīreṇa prāptosmi paramāṃ gatim /
uttarānvā kurūnpuṇyānathavā'pyamarāvatīm //

13.89.17

kiñcedaṃ mahadāścaryaṃ sampaśyāmītyacintayat /
evaṃ sañcintayanneva dadarśa munipuṅgavam //

13.89.18

tasminvimāne sauvarṇe maṇistambhasamākule /
mahārhe śayane divye śayānaṃ bhṛgunandanam //

13.89.19

tamabhyayātpraharṣeṇa narendraḥ saha bhāryayā /
antarhitastato bhūyaścyavanaḥ śayanaṃ va tat //

13.89.20

tato'nyasminvanoddeśe punareva dadarśa tam /
kauśyāṃ bṛsyāṃ samāsīnaṃ japamānaṃ mahāvratam //

13.89.21

evaṃ yogabalādvipro mohayāmāsa pārthivam //

13.89.22

kṣaṇena tadvanaṃ caiva te caivāpsarasāṃ gaṇāḥ /
gandharvāḥ pādapāścaiva sarvamantaradhīyata //

13.89.23

niḥśabdamabhavaccāpi gaṅgākūlaṃ punarnṛpa /
kuśavalmīkabhūyiṣṭhaṃ babhūva ca yathā purā //

13.89.24

tataḥ sa rājā kuśikaḥ sabhāryastena karmaṇā /
vismayaṃ paramaṃ prāptastaddṛṣṭvā mahadadbhutam //

13.89.25

tataḥ provāca kuśiko bhāryā harṣasamanvitaḥ / paśya bhadre yathābhāvāścitrā dṛṣṭāḥ sudurlabhāḥ /
prasādādbhṛgumukhyasya kimanyatra tapobalāt //

13.89.26

tapasā tadavāpyaṃ hi yanna śakyaṃ manorathaiḥ /
trailokyarājyādapi hi tapa eva viśiṣyate //

13.89.27

tapasā hi sutapteni krīḍatyeṣa tapodhanaḥ /
aho prabhāvo brahmarṣeścyavanasya mahātmanaḥ //

13.89.28

icchayaiṣa tapovīryādanyām̐llokānsṛjedapi /
brāhmaṇā eva jāyeranpuṇyavāgbuddhikarmaṇā //

13.89.29

utsahediha kṛtvaiva ko'nyo vai cyavanādṛte /
brāhmaṇyaṃ durlabhaṃ loke rājyaṃ hi sulabhaṃ naraiḥ //

13.89.30

brāhmaṇyasya prabhāvāddhi rathe yuktau svadhuryavat /
ityevaṃ cintayānaḥ sa viditaścyavanasya vai //

13.89.31

samprekṣyovāca nṛpatiṃ kṣipramāgamyatāmiti /
ityuktaḥ sahabhāryastu sobhyagacchanmahāmunim //

13.89.32

śirasā vandanīyaṃ tamavandata ca pārthivaḥ / tasyāśiṣaḥ prayujyātha sa munistaṃ narādhipam /
niṣīdetyabravīddhīmānsāntvayanpuruṣarṣabhaḥ //

13.89.33

tataḥ prakṛtimāpanno bhārgavo nṛpate nṛpam /
uvāca ślakṣṇayā vācā tarpayanniva bhārata //

13.89.34

rājansamyagjitānīha pañcapañca svayaṃ tvayā /
manaḥṣaṣṭhānīndriyāṇi kṛcchrānmuktosi tena vai //

13.89.35

samyagārādhitaḥ putra tvayā'haṃ vadatāṃvara /
na hi te vṛjitaṃ kiñcitsusūkṣmamapi dṛśyate //

13.89.36

anujānīhi māṃ rājangamiṣyāmi yathāgatam /
prītosmi tava rājendra varaśca pratigṛhyatām //
kuśika uvāca /

13.89.37

agnimadhye gateneva bhagavansannidhau mayā /
vartitaṃ bhṛguśārdūla yanna dagdhosmi tadbahu //

13.89.38

eṣa eva varo mukhyaḥ prāpto me bhṛgunandana /
yatprītosi mamācāraiḥ kulaṃ trātaṃ ca me'nagha //

13.89.39

etha me'ndragraho vipra jīvite ca prayojanam /
etadrājyaphalaṃ caiva tapasaśca phalaṃ mama //

13.89.40

yadi tvaṃ prītimānvipra mayi vai bhṛgunandana /
asti me saṃśayaḥ kaścittanme vyākhyātumarhasi //

Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0