Mahabharata · Chapter 13.90

varaśca gṛhyatāṃ matto yaśca te saṃśayo hṛdi /
taṃ prabrūdi naraśreṣṭha sarvaṃ sampādayāmi te //
kuśika uvāca /

yadi prītosi bhagavaṃstato me vada bhārgava /
kāraṇaṃ śrotusicchami madgṛhe vāsakāritam //

śayanaṃ caikapārśvena divasānekaviṃśatim /
na kiñciduktvā gamanaṃ bahiśca munipuṅgavaḥ //

antardhānamakasmācca punareva ca darśanam /
punaśca śayanaṃ vipra divasānekaviṃśatim //

tailābhyaktasya gamanaṃ bhojanaṃ ca gṛhe mama /
samupānīya vividhaṃ yaddagdhaṃ jātavedasā //

niryāṇāṃ ca rathenāśu sahasā yatkṛtaṃ tvayā /
dhanānāṃ ca visargaśca vanasyāpi ca darśanam //

prāsādānāṃ bahūnāṃ ca kāñcanānāṃ mahāmune /
maṇividrumapādānāṃ paryaṅkāṇāṃ ca darśanam //

punaścādarśanaṃ tasya śrotumicchāmi kāraṇam /
atīva hyatra muhyāmi cintayāno bhṛgūdvaha //

na caivātrādhigacchāmi sarvasyāsya viniścayam /
etadicchāmi kārtsnyena satyaṃ śrotuṃ tapodhana //
cyavana uvāca /

śṛṇu sarvamaśeṣeṇi yadidaṃ yena hetunā /
na hi śakyamanākhyātumevaṃ pṛṣṭena pārthiva //

pitāmahasya vadataḥ purā devasamāgame / śrutavānasmi yadrājaṃstanme nigadataḥ śṛṇu /

brahmakṣatravirodhena bhavitā kulasaṅkaraḥ /
pautraste bhavitā rājaṃstejovīryasamanvitaḥ //

tataḥ svakularakṣārthamahaṃ tvāṃ samupāgataḥ /
cikīrṣankuśikocchedaṃ sandidhakṣuḥ kulaṃ tava //

tato'hamāgamya pure tvāmavocaṃ mahīpate /
niyamaṃ kañcidārapsaye śuśrūṣā kriyatāmiti //

na ca te duṣkṛtaṃ kiñcidahamāsādayaṃ gṛhe /
tena jīvasi rājarṣe na bhavethāstvamanyathā //

evaṃ buddhiṃ samāsthāya divasānekaviṃśatim /
suptosmi yadi māṃ kaścidbodhayediti pārthiva //

yadā tvayā sabhāryeṇa saṃsupto na prabodhitaḥ /
ahaṃ tadaiva te prīto manasā rājasattama //

utthāya cāsmi niṣkrānto yadi māṃ tvaṃ mahīpate /
pṛccheḥ kva yāsyasītyevaṃ śapeyaṃ tvāmiti prabho //

antarhitaḥ punaścāsmi punareva ca te gṛhe /
yogamāsthāya saṃsupto divasānekaviṃśatim //

kṣudhitau māmasūyethāṃ śramādveti narādhipa /
etāṃ buddhiṃ samāsthāya karśitau vāṃ kṣudhā mayā //

na ca te'bhūtsusūkṣmopi manyurmanasi pārthiva /
sabhāryasya naraśreṣṭha tena te prītimānaham //

bhojanaṃ ca samānāyya yattadādīpitaṃ mayā /
krudhyethā yadi mātsaryāditi tanmarṣitaṃ ca me //

tato'haṃ rathamāruhya tvāmavocaṃ narādhipa /
sabhāryo māṃ vahasveti tacca tvaṃ kṛtavāṃstathā //

aviśaṅko narapate prīto'haṃ cāpi tena ha /
dhanotsarge'pi ca kṛte na tvāṃ krodhopyadharṣayat //

tataḥ prītena te rājanpunaretatkṛtaṃ tava /
sabhāryasya vanaṃ bhūyastadviddhi manujādhipa //

prītyarthaṃ tava caitanme svargasandarśanaṃ kṛtam /
yatte vane'sminnṛpate dṛṣṭaṃ divyaṃ sudarśanam //

svargoddeśastvayā rājansaśarīreṇa pārthiva /
muhūrtamanubhūto'sau sabhāryeṇa nṛpottama //

nidarśanārthaṃ tapaso dharmasya ca narādhipa /
tatra nāsītspṛhā rājaṃstaccāpi viditaṃ mayā //

brāhmaṇyaṃ kāṅkṣase hi tvaṃ tapaśca pṛthivīpate /
avamatya narendratvaṃ devendratvaṃ ca pārthiva //

evametadyathātatvaṃ brāhmaṇyaṃ tāta durlabham /
brāhmaṇye sati carṣitvamṛṣitve ca tapasvitā //

bhaviṣyatyeṣa te kāmaḥ kuśikātkauśiko dvijaḥ //

tṛtīyaṃ puruṣaṃ prāpya brāhmaṇatvaṃ gamiṣyati /
vaṃśaste pārthivaśreṣṭha bhṛgūṇāmeva tejasā //

pautraste bhavitā viprastapasvī pāvakadyutiḥ / jamadagnau mahābhāga tapasā bhāvitātmani //

yaḥ sa devamanuṣyāṇaāṃ bhayamutpādayiṣyati /
trayāṇāmeva lokānāṃ satyametadbravīmi te //

varaṃ gṛhāṇa rājarṣe yaste manasi vartate /
tīrthayātrāṃ gamiṣyāmi purā kālo'tivartate //
kuśika uvāca /

eṣa eva varo me'dya yattvaṃ prīto mahāmune /
bhavatvetadyathārthatvaṃ bhavetpautro mamānagha //

brāhmaṇyaṃ me kulasyāstu bhagavanneṣa me varaḥ /
punaścākhyātumicchāmi bhagavanvistareṇa vai //

kathameṣyati vipratvaṃ kulaṃ me bhṛgunandana /
kaścāsau bhavitā bandhurmama kaścāpi sammataḥ //