Mahabharata · Chapter 13.76

tataḥ kadāciddevendro divyarūpavapurdharaḥ /
idamantaramityevamabhyagāttamathāśramam //

rūpamapratimaṃ kṛtvā lobhanīyaṃ janādhipaḥ /
darśanīyatamo bhūtvā praviveśa tamāśramam //

sa dadarśa tamāsīnaṃ vipulasya kalebaram /
niśceṣṭaṃ stabdhanayanaṃ yatā'lekhyagataṃ tathā //

ruciṃ ca rucirāpāṅgīṃ pīnaśroṇipayodharām /
padmapatraviśālākṣīṃ sampūrṇendunibhānanām //

sā tamālokya sahasā pratyuttātumiyeṣa ha /
rūpeṇa vismitā ko'sītyatha vaktumivecchatī //

utthātukāmā tu satī viṣṭavdhā vipulena sā /
nigṛhītā manuṣyendra na śaśāka viceṣṭitum //

tāmābabhāṣe devendraḥ sāmnā paramaval******* /
tvadarthamāgataṃ viddhi devendra māṃ śucismite //

kliśyamānamanaṅgena tvatsaṅkalpabhavena ha /
tatparyāpnuhi māṃ subhru purā kālo'tivartate //

tamevaṃvādinaṃ śakraṃ śuśrāva vipulo muniḥ /
gurupatnayāḥ śarīrastho dadarśa tridasādhipam //

na śaśāka ca sā rājanpratyutthātumaninditā /
vaktuṃ ca nāśakadrājanviṣṭabdā vipulena sā //

ākāraṃ gurupatnyāstu sa vijñāya bhṛgūdvahaḥ / nijaynāha mahātejā yogena balavatprabho /
babandha yogabandhaiśca tasyāḥ sarvendriyāṇi saḥ //

tāṃ nirvikārāṃ dṛṣṭvā tu punareva śacīpatiḥ /
uvāca vrīhito rājaṃstāṃ yogabalamohitām //

ehyehīti tataḥ sā tu prativaktumiyeṣa tam /
sa tāṃ vācyaṃ guroḥ patnyā vipulaḥ paryavartayat //

bhoḥ kimāgamane kṛtyamiti tasyāstu niḥsṛtā /
vaktrācchaśāṅkasadṛśādvāṇī saṃskārabhūṣaṇā //

vīḍitā sā tu tadvākyamuktvā paravaśā tadā /
purandaraśca santrasto babhūva vimanā bhṛśam //

sa tadvaikṛtamālakṣya devarājo viśāmpate /
avaikṣata sahasrākṣastadā divyena cakṣuṣā //

sa dadarśa muniṃ tasyāḥ śarīrāntaragocaram /
pratibimbamivādarśe gurupatnyāḥ śarīragam //

sa taṃ ghoreṇa tapasā yuktaṃ dṛṣṭvā purandaraḥ /
prāvepata susantrasto vrīḍitaśca tadā vibho //

vimucya gurupatnīṃ tu vipulaḥ sumahātapāḥ /
svakalebaramāviśya śakraṃ bhītamathābravīt //

ajitendriya durbuddhe pāpātmaka purandara /
na ciraṃ pūjayiṣyanti devāstvāṃ mānuṣāstathā //

kinnu tadvismṛtaṃ śakra na tanmanasi te sthitam /
gautamenāsi yanmukto bhagāṅkaparicihnitaḥ //

jāne tvāṃ bāliśamatimakṛtātmānamasthiram /
mayeyaṃ rakṣyate mūḍha gaccha pāpa yathāgatam //

nāhaṃ tvāmadya mūḍhātmandaheyaṃ hi svatejasā /
kṛpāyamānastu na te dagdhumicchāmi vāsava //

sa ca ghoratamo dhīmāngururme pāpacetasam /
dṛṣṭvā tvāṃ nirdahedadya krodhadīptena cakṣuṣā //

naivaṃ tu śakra kartavyaṃ punarmānyāśca te dvijāḥ /
mā gamaḥ sasutāmātyaḥ kṣayaṃ brahmabalārditaḥ //

amarosmīti yadbuddhiṃ samāsthāya pravartate /
māvamaṃsthā na tapasā na sādhyaṃ nāma kiñcana //
bhīṣma uvāca /

tacchrutvā vacanaṃ śakro vipulasya mahātmanaḥ /
na kiñciduktvā vrīḍārtastatraivāntaradhīyata //

muhūrtayāte tasmiṃstu devaśarmā mahātapāḥ /
kṛtvā yajñaṃ yathākāmamājagāma svamāśramam //

āgate'tha gurau rājanvipulaḥ priyakarmakṛt /
rakṣitāṃ gureva bhāryāṃ nyavedayadaninditām //

abhivādya ca śāntātmā sa guruṃ guruvatsalaḥ /
vipulaḥ paryupātiṣṭhadyathāpūrvamaśaṅkitaḥ //

viśrāntāya tatastasmai sahāsīnāya bhāryayā /
nivedayāmāsa tadā vipulaḥ śakrakarma tat //

tacchutvā sa munistuṣṭoṃ vipulasya pratāpavān /
babhūva śīlavṛttābhyāṃ tapasā niyamena ca //

vipulasya gurau vṛttiṃ bhaktimātmani tatprabhuḥ /
dharme ca sthiratāṃ dṛṣṭvā sādhusādhvityabhāṣata //

pratinandya ca dharmātmā śiṣyaṃ dharmaparāyaṇam /
vareṇa cchandayāmāsa devaśarmā mahāmatiḥ //

sthitiṃ ca dharme jagrāha sa tasmādguruvatsalaḥ /
anujñātaśca guruṇā cacārānuttamaṃ tapaḥ //

tathaiva devaśarmāpi sabhāryaḥ sa mahātapāḥ /
nirbhayo balavṛtraghnāccacāra vijane vane //