Mahabharata · Chapter 13.77

vipulastvakarottīvraṃ tapaḥ kṛtvā gurorvacaḥ /
tapoyuktamathātmānamamanyata sa vīryavān //

sa tena karmaṇā svargaṃ pṛthivīṃ pṛthivīpate /
cacāra gatabhīḥ prīto labdhakīrtivaro nṛpa //

ubhau lokau jitau cāpi tathaivāmanyata prabhuḥ /
karmaṇā tena kauravya tapasā vipulena ca //

atha kāle vyatikrānte kasmiṃścitkurunandana /
rucyā bhaginyā ādānaṃ prabhūtadanadhānyavat //

etasminneva kāle tu divyā kācidvarāṅganā /
bibhratī paramaṃ rūpaṃ jagāmātha vihāyasā //

tasyāḥ śarīrātpuṣpāṇi patitāni mahītale /
tasyāśramasyāvidūre divyagandhāni bhārata //

tānyagṛhṇāttato rājanrucirlalitalocanā /
tadā nimantrakastasyā aṅgebhyaḥ kṣipramāgamat //

tasyā hi bhaginī tāta jyeṣṭhā nāmnā prabhāvatī /
bhāryā citrarathasyātha babhūvāṅgeśvarasya vai //

pinahya tāni puṣpāṇi keśeṣu varavarṇinī /
āmantritā tato'gacchadruciraṅgapatergṛham //

puṣpāṇi tāni dṛṣṭvā tu tadāṅgendravarāṅganā /
bhaginīṃ codayāmāsa puṣpārthe cārulocanā //

sā bhartre sarvamācaṣṭa ruciḥ surucirānanā /
bhaginyā bhāṣitaṃ sarvamṛṣistaccābhyanandata //

tato vipulamānāyya devaśarmā mahātapāḥ /
puṣpārthe codayāmāsa gacchagaccheti bhārata //

vipulastu gurorvākyamavicārya mahātapāḥ /
sa tathetyabravīdrājaṃstaṃ ca deśaṃ jagāma ha //

yasmindeśe tu tānyāsanpatitāni nabhastalāt /
amlānānyapi tatrāsankusumānyaparāṇyapi //

sa tatastāni jagrāha divyāni rucirāṇi ca /
prāptāni svena tapasā divyagandhāni bhārata //

samprāpya tāni prītātmā gurorvacanakārakaḥ /
tadā jagāma tūrṇaṃ ca campāṃ campakamālinīm //

sa vane nirjane tāta dadarśa mithunaṃ nṛṇām /
cakravatparivartantaṃ gṛhītvā pāṇinā karam //

tatraikastūrṇamagamattatpade ca vivartayan /
ekastu na tadā rājaṃścakratuḥ kalahaṃ tataḥ //

tvaṃ śīghraṃ gacchasītyeko'bravīnneti tathā'paraḥ /
patiteti ca tau rājanparasparamathocatuḥ //

tayorvispardhatorevaṃ śapatho'yamabhūttadā /
sahasoddiśya vipulaṃ tato vākyamathocatuḥ //

āvayoranṛtaṃ prāha yastasyābhūddvijasya vai /
vipulasya pare loke yā gatiḥ sā bhavediti //

etacchrutvā tu vipulo viṣaṇṇavadano'bhavat /
evaṃ tīvratapāścāhaṃ kaṣṭaścāyaṃ pariśramaḥ //

mithunasyāsya kiṃ me syātkṛtaṃ pāpaṃ yathā gatiḥ /
aniṣṭā sarvabhūtānāṃ kīrtitā'nena me'dya vai //

evaṃ sañcintayanneva vipulo rājasattama /
avāṅmukho dīnamanā dadhyau duṣkṛtamātmanaḥ //

tataḥ ṣaḍanyānpuruṣānakṣaiḥ kāñcanarājataiḥ /
apaśyaddīvyamānānvai lobhāmarṣānvitāṃstathā //

kurvataḥ śapathaṃ tena yaḥ kṛto mithunena tu /
vipulaṃ vai samuddiśya tepi vākyamathābruvan //

lobhamāsthāya yo'smākaṃ viṣamaṃ kartumutsahet / vipulasya pare loke yā gatistāmavāpnuyāt /

etacchrutvā tu vipulo nāpaśyaddharmasaṅkaram //
janmaprabhṛti kauravya kṛtapūrvamathātmanaḥ //

sa pradadhyau tathā rājannagnāvagnirivāhitaḥ /
dahyamānena manasā śāpaṃ śrutvā tathāvidham //

tasya cintayatastāta bahvīrvāco niśamya tu /
idamāsīnmanasi ca rucyā rakṣaṇakāritam //

lakṣaṇaṃ lakṣaṇenaiva vadanaṃ vadanena ca /
vidhāya na mayā coktaṃ satyametadgurostathā //

etadātmani kauravya duṣkṛtaṃ vipulastadā /
amanyata mahābhāga tathā tacca na saṃśayaḥ //

sa campāṃ nagarīmetya puṣpāṇi gurave dadau /
pūjayāmāsa ca guruṃ vidhivatsa gurupriyaḥ //