Mahabharata · Chapter 13.72

apūrvaṃ vā bhavetpātramathavā'pi ciroṣitam /
dūrādabhyāgataṃ vā'pi kiṃ pātraṃ syātpitāmaha //
bhīṣma uvāca /

kriyā bhavati keṣāñcidupāṃśuvratamuttamam /
yo no yāceta yatkiñcitsarvaṃ dadyāma ityapi //

apīḍayanbhṛtyavargamityevamanuśuśruma /
pīḍayanbhṛtyavargaṃ hi ātmānamapakarṣati //

apūrvaṃ cāpi yatpātraṃ yaccāpi syācciroṣitam /
dūrādabhyāgataṃ cāpi tatpātraṃ na vidurbudhāḥ //
yudhiṣṭhira uvāca /

apīḍayā ca bhūtānāṃ dharmasyāhiṃsayā tathā /
pātraṃ vidyāmatattvena yasmai dattaṃ na santapet //
bhīṣma uvāca /

ṛtvikpurohitācāryāḥ śiṣyasambandhibāndhavāḥ /
sarve pūjyāśca mānyāśca śrutavanto'nasūyakāḥ //

ato'nyathā vartamānāḥ sarve nārhanti satkriyām /
tasmādguṇaiḥ parīkṣeta puruṣānpraṇidhāya vai //

akrodhaḥ satyavacanamahiṃsā dama ārjavam /
adroho'nabhimānaśca hrīstitikṣā damaḥ śamaḥ //

yasminnotāni dṛśyante na cākāryāṇi bhārata /
svabhāvato niviṣṭāni tatpātraṃ mānamarhati //

tathā ciroṣitaṃ cāpi sampratyāgatameva ca /
apūrvaṃ caiva pūrvaṃ ca tatpātraṃ mānamarhati //

aprāmāṇyaṃ ca vedānāṃ śāstrāṇāṃ cābhilaṅghanam /
avyavasthā ca sarvatra etannāśanamātmanaḥ //

bhavetpaṇḍitamānī yo brāhmaṇo vedanindakaḥ /
ānvīkṣikīṃ tarkavidyāmanurakto nirarthikāṃ //

hetuvādānbuvansatsu vijetā'hetuvādakaḥ /
ākroṣṭā cātivaktā ca brāhmaṇānāṃ sadaivahi //

sarvābhiśaṅkī mūḍhaśca bālaḥ kaṭukavāgapi /
boddhavyastādṛśastāta naraṃ śvānaṃ hi taṃ viduḥ //

yathā śvā bhaṣituṃ caiva hantu caivāvasajjate / evaṃ sambhāṣaṇārthāya sarvaśāstravadhāya ca /
alpaśrutāḥ kutarkāśca dṛṣṭāḥ sṛṣṭāḥ kupaṇḍitāḥ //

śrutismṛtī cetihāsapurāṇāraṇyavedinaḥ / anurundhyādbahujñāṃśca sārajñāścaiva paṇḍitāḥ //

lokayātrā ca draṣṭavyā dharmaścātmahitāni ca /
evaṃ naro vartamānaḥ śāśvatīrvardhate samāḥ //

ṛṇamunmucya devānāmṛṣīṇāṃ ca tathaiva ca /
pitṝṇāmatha viprāṇāmatithīnāṃ ca pañcamam //

paryāyeṇa vimukto yaḥ sunirṇiktena karmaṇā /
evaṃ gṛhasthaḥ karmāṇi kurvandharmānana hīyate //