Mahabharata · Chapter 13.71

atrāpyudāharantīmamitihāsaṃ purātanam /
śakraśambarasaṃvādaṃ tannivodha yudhiṣṭhira //

śakro hyajñātarūpeṇa jaṭī bhūtvā suvāruṇaḥ /
viprarūpaṃ samāsthāya praśnaṃ papraccha śambaram //

kena śambara vṛttena svajātyānadhitiṣṭhasi /
śreṣṭhaṃ tvāṃ kena manyante tadvai prabrūhi tattvataḥ //
śambara uvāca /

nāsūyāmi sadā viprānbrāhmameva ca me matam /
śāstrāṇi vadato viprānsammanyāmi yathāsukham //

śrutvā ca nāvajānāmi nāparādhyāmi karhicit /
abhyarcyābhyanupṛcchāmi pādau gṛhṇāmi dhīmatām //

te visrabdhāḥ prabhāṣante saṃyacchanti ca māṃ sadā /
pramatteṣvapramatto'smi sadā supteṣu jāgṛmi //

te māṃ śāstrapathe yuktaṃ brahmaṇyamanasūyakam /
samāsiñcati śāstāraḥ kṣaudraṃ madhviva makṣikāḥ //

yacca bhāṣanti santuṣṭāstacca gṛhṇāmyamāyayā /
samādhimātmano nityamanulomamacintayam //

sohaṃ vāgagramṛṣṭānāṃ rasānāmavalehakaḥ /
svajātyānadhitiṣṭhāmi nakṣatrāṇīva candramāḥ //

etatpṛthivyāmamṛtametaccakṣuranuttamam /
yadbrāhmaṇamukhācchāstramiha śrutvā pravartate //

etatkāraṇamājñāya dṛṣṭvā devāsuraṃ purā /
yuddhaṃ pitā me hṛṣṭātmā vismitaḥ samapadyata //

dṛṣṭvā ca brāhmaṇānāṃ tu mahimānaṃ mahātmanām /
paryapṛcchatkathamamī siddhā iti niśākaram //
soma uvāca /

brāhmaṇāstapasā sarve sidhyante vāgbalāḥ sadā /
bhujavīryāśca rājāno vāgastrāśca dvijātayaḥ //

pravasanvāpyadhīyīta brāhmīrdurvasatīrvasan /
nirmanyurapi nirvāṇo yatiḥ syātsamadarśanaḥ //

api ca jñānasampannaḥ sarvānvedānpiturgṛhe /
ślāghamāna ivādhīyādgrāmya ityeva taṃ viduḥ //

bhūmiretau nigirati sarpo bilaśayāniva /
rājānaṃ cāpyayoddhāraṃ brāhmaṇaṃ cāpravāsinam //

abhimānaḥ śriyaṃ hanti puruṣasyālpamedhasaḥ /
garbheṇa duṣyate kanyā gṛhavāsena ca dvijaḥ //

vidyāvido lokavidastapodamasamanvitāḥ /
nityapūjyāśca vandyāśca dvijā lokadvayecchubhiḥ //

ityetanme pitā śrutvā somādadbhutadarśanāt /
brāhmaṇānpūjayāmāsa tathaivāhaṃ mahāvratān //
bhīṣma uvāca /

śrutvaitadvacanaṃ śakro dānavendramukhāccyutam /
dvijānsammpūjayāmāsa mahendratvamavāpa ca //