Mahabharata · Chapter 13.58

śrutaṃ narāṇāṃ cāpalyaṃ parastrīṣu prajāyatām /
pramadānāṃ tu cāpalye doṣamicchāmi veditum //
nārada uvāca /

ekavarṇe vidoṣaṃ tu gamanaṃ pūrvakālikam /
dhātā ca samanujñāto viṣṇunā tattathā'karot //

bhagaliṅge mahāprājña pūrvameva prajāpatiḥ /
sasarja tābhyāṃ saṃyogamanujñātaścakāra saḥ //

atha viṣṇuprasādena bhago dattavaraḥ kila /
tena caiva prasādena sarvāṃllokānupāśnute //

tasmāttu puruṣe doṣo hyadhiko nātra saṃśayaḥ /
vinā garbhaṃ savarṇeṣu na tyājyā gamanātstriyaḥ //

prāyaścittaṃ yathānyāyaṃ daṇḍaṃ kuryātsa paṇḍitaḥ /
śvabhirvā daṃśanaṃ snānaṃ savanatritayaṃ niśi //

bhūmau ca bhasmaśayanaṃ dānaṃ bhogavivarjitam / doṣagauravataḥ kālo dravyagauravameva ca /
maryādā sthāpitā pūrvamiti tīrthāntaraṃ gate //

tadyoṣitīṃ tu dīrghāyo nāsti doṣo vyatikrame /
bhagatīrthāntare śuddho viṣṇostu vacanādiha //

rakṣyāścaivānyasaṃvādairanyagehādvicakṣaṇaiḥ /
āsāṃ śuddhau viśeṣeṇa karmaṇāṃ phalamaśnute //

naitā vācyā na vai vadhyā na kleśyāḥ śubhamicchatā / viṣṇuprasādādityeva bhagastīrthāntaraṃ gataḥ /
māsimāsi ṛtustāsāṃ duṣkṛtānyapakarṣati //

striyastoṣakarā nṝṇāṃ striyaḥ puṣṭipradāḥ sadā /
putrasetupratiṣṭhāśca striyo loke mahādyute //