Mahabharata · Chapter 13.57

śrutā bhāryāśca putrāśca vistareṇa mahāmune /
āśramasthāḥ kathaṃ nāryo na duṣyantīti brūhi bho //
nārada uvāca /

āśramasthāsu nārīṣu bāndhavatvaṃ praṇaśyati /
naṣṭavaṃśyā bhavantyetā bandhūnāmatha bhartṛṇām //

paradārā muktadoṣāstā nāryo'śramasaṃsthitāḥ /
svayamīśāḥ svadehānāṃ kāmyāstadgatamānasāḥ //

evaṃ nāryo na duṣyanti narāṇāṃ tatprasūtiṣu /
dharmapatnyo bhavantyetāḥ saputrā havyakavyadāḥ //
mārkaṇḍeya uvāca /

parasya bhāryā yā pūrvaṃ mṛte bhartari yā punaḥ /
anyaṃ bhajati bhartāraṃ sasutā asutā katham //
nārada uvāca /

asutā vā prasūtā vā gṛhasthānāṃ parastriyaḥ /
parāmṛṣṭeti tā varjyā dharmācāreṣu dūṣitāḥ //

na cāsāṃ havyakavyāni pratigṛhṇanti devatāḥ /
yastāsu janayetputrānna taiḥ putramavāpnuyāt //
mārkaṇḍeya uvāca /

parakṣetreṣu yo bījaṃ cāpalādvisṛjennaraḥ /
kathaṃ putraphalaṃ tasya bhavettadṛṣisattama //
nārada uvāca /

asvāmike parakṣetre yo naro bījamutsṛjet /
svayaṃvṛto'śramasthāyāṃ tadbījaṃ na vinaśyati //

parakṣetreṣu yo bījaṃ naro darpātsamutsṛjet /
kṣetrikasyaiva tadbījaṃ na bījī labhate phalam //

nātaḥ paramadharmyaṃ cāpyayaśasyaṃ tathottaram /
garbhādīnāṃ ca bahubhistāśca tyājyāḥ sameṣvapi //
mārkaṇḍeya uvāca /

atha ye paradāreṣu putrā jāyanti nārada /
kasya te bandhudāyādā bhavanti paramadyute //
nārada uvāca /

paradāreṣu jāyete dvau putrau kuṇḍagolakau /
jīvatyatha patau kuṇḍo mṛte bhartari golakaḥ //

te ca jātāḥ parakṣetre dehināṃ pretya ceha ca /
dattāni havyakavyāni nāśayantyatha dātṛṇām //

pituhi narakāyaite golakastu viśeṣataḥ /
caṇḍālatulyau tajjau hi paratreha ca naśyataḥ //
mārkaṇḍeya uvāca /

kasya te garhitāḥ putrāḥ pitṝṇāṃ havyakavyadāḥ /
yasya kṣetre prasūyante yo vā tāñjanayetsutān //
nārada uvāca /

kṣetrikaścaiva bījī ca dvāvetau nirayaṃ gatau /
na rakṣati ca yo dārānparadārāśca gacchati //

garhitāste narā nityaṃ dharmācārabahiṣkṛtāḥ /
kuṇḍo bhoktā ca bhogī ca kutsitāḥ pitṛdaivataiḥ //
mārkaṇḍeya uvāca /

tathaite garhitāḥ putrā havyakavyāni nārada /
kasya nityaṃ prayacchanti dharmo vā teṣu kiṃ phalaṃ //
nārada uvāca /

yātudhānāḥ piśācāśca pratigṛhṇanti tairhutam /
havyaṃ kavyaṃ ca tairdattaṃ ye ca bhūtā niśācarāḥ //
mārkaṇḍeya uvāca /

atha te rākṣasāḥ prītāḥ kiṃ prayacchanti dātṛṇām /
kiṃ vā dharmaphalaṃ teṣāṃ bhavettadṛṣisattama //
nārada uvāca /

na dattaṃ naśyate kiñcitsarvabhūteṣu dātṛṇām /
pretya ceha ca tāṃ puṣṭimupāśnanti pradāyinaḥ //
mārkaṇḍeya uvāca /

atha golakakuṇḍābhyāṃ santatiryā bhaviṣyati /
tayorye bāndhavāḥ kecitpradāsyanti kathaṃ nu taṃ //
nārada uvāca /

sādhvījātāḥ sutāsteṣāṃ tāṃ vṛttimanutiṣṭhatām /
prīṇanti pitṛdaivatyaṃ havyakavyasamāhitāḥ //

evaṃ golakakuṇḍābhyāṃ ye ca varṇāpadeśinaḥ / havyaṃ kavyaṃ ca śuddhānāṃ pratigṛhṇanti devatāḥ //