Mahabharata · Chapter 13.55

śrutaṃ varṇāvarairdattaṃ havyaṃ kavyaṃ ca nārada /
samprayoge ca putrāṇāṃ kanyānāṃ ca bravīhi me //
nārada uvāca /

kanyāpradānaṃ pratrāṇāṃ strīṇāṃ saṃyogameva ca /
ānupūrvyānmayā samyagucyamānaṃ nibodha me //

jātamātrā tu dātavyā kanyakā sadṛśe vare /
kāle dattāsu kanyāsu pitā dharmeṇa yujyate //

yastu puṣpavatīṃ kanyāṃ bāndhavo na prayacchati /
māsimāsi gate bandhustasyā bhrauṇaghnyamāpnute //

yastu kanyāṃ gṛhe rundhyādgrāmyairbhogairvivarjitām /
avadhyātaḥ sa kanyāyā bandhuḥ prāpnoti bhrūṇahām //

dūṣitā pāṇimātreṇa mṛte bhartari dārikā /
saṃskāraṃ labhate nārī dvitīye sā punaḥ patau //

punarbhūrnāma sā kanyā saputrā havyakavyadā /
adūṣyā sā prasūtīṣu prajānāṃ dārakarmaṇi //
mārkaṇḍeya uvāca /

yā tu kanyā prasūyeta garbhiṇī yā tu vā bhavet /
kathaṃ dārakriyāṃ bhūyaḥ sā bhavedṛṣisattama //
nārada uvāca /

tatvārthaniścitaṃ śabdaṃ kanyakā nayate'gnaye /
tasmātkurvanti vai bhāvaṃ kumāryastā na kanyakāḥ //

brahmahatyātribhāgena garbhādhānaviśodhitaḥ /
gṛhṇīyāttāṃ caturbhāgaviśuddhāṃ sarjanātpunaḥ //
mārkaṇḍeya uvāca /

kathaṃ kanyāsu ye jātā bandhūnāṃ dūṣitāḥ sadā /
kasya te havyakavyāni pradāsyanti mahāmune //
nārada uvāca /

kanyāyāstu pituḥ putrāḥ kānīnā havyakavyadāḥ /
antarvatnayāstu yaḥ pāṇiṃ gṛhṇīyātsa sahoḍhajaḥ //
mārkaṇḍeya uvāca /

atha yenāhito garbhaḥ kanyāyāṃ tatra nārada /
kathaṃ putraphalaṃ tasya bhavedetatpracakṣva me //
nārada uvāca /

dharmācāreṣu te nityaṃ dūṣakāḥ kṛtaśodhanāḥ /
bījaṃ ca naśyate teṣāṃ moghaceṣṭā bhavanti te //
mārkaṇḍeya uvāca /

atha kācidbhavetkanyā krītā dattā hṛtā'pi vā /
kathaṃ putrakṛtaṃ tasyāstadbhaveddaṣisattama //
nārada uvāca /

krītā dattā hṛtā caiva yā kanyā pāṇivarjitā / kaumārī nāma sā bhāryā prasavedaurasānsutān /
na patnyarthe śubhā proktā tatkarmaṇyaparājite //
mārkaṇḍeya uvāca /

kena maṅgalakṛtyeṣu viniyujyanti kanyakāḥ /
etadicchāmi vijñātuṃ tatveneha mahāmune //
nārada uvāca /

nityaṃ nivasate lakṣmīḥ kanyakāsu pratiṣṭhitā /
śobhanā śubhayogyā ca pūjyā maṅgalakarmasu //

ākarasthaṃ yathā ratnaṃ sarvakāmaphalopagam /
tathā kanyā mahālakṣmīḥ sarvalokasya maṅgalam //

evaṃ kanyā parā lakṣmī ratistoṣaśca dehinām /
mahākulānāṃ cāritravṛttena nikaṣopalam //

ānayitvā svakādvarṇātkanyakāṃ yo bhajennaraḥ /
dātāraṃ havyakavyānāṃ putrakaṃ yā prasūyati //

sādhvī kulaṃ vardhayati sādhvī puṣṭigrahe parā /
sādhvī lakṣmī ratiḥ sākṣātpratiṣṭhā santatistathā //