Mahabharata · Chapter 13.51

atha sā strī tamuvāca vipramevaṃ bhavatviti /
tailaṃ divyamupādāya snānaśāṭīmupānayat //

anujñātā ca muninā sā strī tena mahātmanā /
athāsya tailenāṅgāni sarvāṇyevābhyamṛkṣata //

śanaiścācchāditastatra snānaśālāmupāgamat /
bhadrāsanaṃ tataścitramṛṣiranvagamannavam //

athopaviṣṭaśca yadā tasminbhadrāsane tadā / snāpayāmāsa śanakaistamṛṣiṃ sukhahastavat /
divyaṃ ca vidhivaccakre sopacāraṃ munestadā //

jalena susukhoṣṇena tasyā hastasukhena ca /
vyatītāṃ rajanīṃ kṛtsnāṃ nājānātsa mahāvrataḥ //

tata utthāya sa munistadā paramavismitaḥ /
pūrvasyāṃ diśi sūryaṃ ca so'paśyaduditaṃ divi //

sandhyopāsanamityeva sarvapāpaharaṃ na me / tasya buddhiriyaṃ kintu mohastattvamidaṃ bhavet //

athopāsya sahasrāṃśuṃ kiṃ koramītyuvāca tām /
sā cāmṛtarasaprakhyaṃ kraṣerannamupāharat //

tasya svādutayā'nnasya na prabhūtaṃ cakāra saḥ /
vyagamaccāpyahaḥśeṣa tataḥ sandhyā'gamatpunaḥ //

atha sā strī bhagavantaṃ supyatāmityacodayat /
tatra vai śayane divye tasya tasyāśca kalpite //

[pṛthakrvaiva tathā suptau sā strī sa ca munistadā / tathā'rtharātre sā strī tu śayanaṃ tadupāgamat // ]
aṣṭāvakra uvāca /

na bhadre paradāreṣu mano me samprasajjati /
uttiṣṭha bhadre bhadraṃ te svāpaṃ vai viramasva ca //
bhīṣma uvāca /

sā tadā tena vipreṇa tathā dhṛtyā nivartitā /
svatantrā'smītyuvācarṣiṃ na dharmacchalamasti te //
aṣṭāvakra uvāca /

nāsti svatantratā strīṇāmasvatantrā hi yoṣitaḥ /
prajāpatimataṃ hyetanna strī svātantryamarhati //
stryuvāca /

bādhane maithunaṃ vipra mama bhaktiṃ ca paśya vai /
adharmaṃ prāpsyase vipra yanmāṃ tvaṃ nābhinandasi //
aṣṭāvakra uvāca /

haranti doṣajātāni naramindriyakiṅkaram /
prabhavāmi sadā dhṛtyā bhadre svaśayanaṃ vraja //
stryuvāca /

śirasā praṇame vipra prasādaṃ kartumarhasi /
bhūmau nipatamānāyāḥ śaraṇaṃ bhava me'nagha //

yadi vā doṣajātaṃ tvaṃ paradāreṣu paśyasi /
ātmānaṃ sparśayāmyadya pāṇiṃ gṛhṇīṣva me dvija //

na doṣo bhavitā caiva satyenaitadbravīmyaham / svatantrāṃ māṃ vijānīhi yo dharmaḥ sostu vai mayi /
tvayyāveśitacittā ca svatantrā'smi bhajasva mām //
aṣṭāvakra uvāca /

svatantrā tvaṃ kathaṃ bhadre brūhi kāraṇamatra vai /
nāsti triloke strī kācidyā vai svātantryamarhati //

pitā rakṣati kaumāre bhartā rakṣati yauvane / putrastu sthāvire bhāve na strī svātantryamarhati /
na vṛddhāmakṣatāṃ manye ca cecchā tvayi me'naghe
stryuvāca /

kaumāraṃ brahmacaryaṃ me kanyaivāsmi na saṃśayaḥ /
patnīṃ kuruṣva māṃ vipra śraddhāṃ vijahi mā mama //
aṣṭāvakra uvāca /

yathā mama tathā tubhyaṃ yathā tubhyaṃ tathā mama /
jijñāseyamṛṣestasya vighnaḥ satyaṃ nu kiṃ bhavet //

āścaryaṃ paramaṃ hīdaṃ kinnu śreyo hi me bhavet /
divyābharaṇavastrā hi kanyeyaṃ māmupasthitā //

kiṃ tvasyāḥ paramaṃ rūpaṃ jīrṇamāsītkathaṃ punaḥ /
kanyārūpamihādyaivaṃ kimivātrottaraṃ bhavet //

yathā me paramā śaktirna vyutthāne kathañcana /
na rocate hi vyutthānaṃ satyenāsādayāmyaham //