Mahabharata · Chapter 13.52

na bibheti kathaṃ sā strī śāpācca paramadyute /
kathaṃ nivṛtto bhagavāṃstadbhavānprabravītu me //
bhīṣma uvāca /

aṣṭāvakro'nvapṛcchattāṃ rūpaṃ vikuruṣe katham /
na cānṛtaṃ te vaktavyaṃ brūhi brāhmaṇakāmyayā //
stryuvāca /

dyāvāpṛthivyoryatraiṣā kāmyā brāhmaṇasattama /
śṛṇuṣvāvahitaḥ sarvaṃ yadidaṃ satyavikrama //

jijñāseyaṃ prayuktā me sthairyaṃ kartuṃ tavānagha /
avyutthānena te lokā jitāḥ satyaparākrama //

uttarāṃ māṃ diśaṃ viddhi dṛṣṭaṃ strīcāpalaṃ ca te /
sthavirāṇāmapi strīṇāṃ bādhate maithunajvaraḥ //

aviśvāso na vyasanī nātisakto'pravāsakaḥ / vidvānsuśīlaḥ puruṣaḥ sadāraḥ sukhamaśnute //

tuṣṭaḥ pitāmahaste'dya tathā devāḥ savāsavāḥ //

satvaṃ yena ca kāryeṇa samprāpto bhagavāniha /
preṣitastena vipreṇa kanyāpitrā dvijarṣabhaḥ //

preṣitaścopadeśāya tacca sarvaṃ śrutaṃ tvayā //

nitāntaṃ strī bhogaparā priyavādāpravāsanāt /
rakṣyate cākucelādyairaprasaṅgānuvartanaiḥ //

aparvasvaniṣiddhāsu rātriṣvapyanṛtau vrajet /
rātrau ca nātiniyamo na vai hyaniyamo bhavet //

kṣemairgamiṣyasi gṛhaṃ śramaśca na bhaviṣyati /
kanyāṃ prāpsyasi tāṃ vipra putriṇī ca bhaviṣyati //

kāmyayā pṛṣṭavāṃstvaṃ māṃ tato vyāhṛtamuttaram /
anatikramaṇīyā sākṛtsnairlokaistribhiḥ sadā //

gacchasva kṛtakṛtyastvaṃ kiṃ vā'nyacchrotumicchasi /
yāvadbravīmi viprarṣe aṣṭāvakra yathātatham //

ṛṣiṇā prasāditā cāsmi tava hetordvijarṣabha /
tasya sammānanārthaṃ me tvayi vākyaṃ prabhāṣitam //
bhīṣma uvāca /

śrutvā tu vacanaṃ tasyāḥ sa vipraḥ prāñjaliḥ sthitaḥ /
anujñātastayā cāpi svagṛhaṃ punarāvrajat //

gṛhamāgatya viśrāntaḥ svajanaṃ paripṛcchya ca /
abhyāgacchacca taṃ vipraṃ nyāyataḥ kurunandana //

pṛṣṭaśca tena vipreṇa dṛṣṭaṃ tvetannidarśanam /
prāha vipraṃ tadā vipraḥ suprītenāntarātmanā //

bhavatā'hamanujñātaḥ prāsthito gandhamādanam /
tasya cottarato deśe dṛṣṭaṃ me daivataṃ mahat //

tayā cāhamanujñāto bhavāṃścāpi prakīrtitaḥ /
śrāvitaścāpi tadvākyaṃ gṛhaṃ cābhyāgataḥ prabho //

tamuvāca tadā vipraḥ sutāṃ pratigṛhāṇa me /
nakṣatratithisaṃyoge pātraṃ hi paramaṃ bhavān //
bhīṣma uvāca /

aṣṭāvakrastathetyuktvā pratigṛhya ca tāṃ prabho /
kanyāṃ paramadharmātmā prītimāṃścābhavattadā //

kanyāṃ tāṃ pratigṛhyaiva bhāryāṃ paramaśobhanām /
uvāsa muditastatra śvāśrame vigatajvaraḥ //