Mahabharata · Chapter 13.44
aho śrāvitamākhyānaṃ bhavatā'tyadbhutaṃ mahat /
puṇyaṃ yaśasyamāyuṣyaṃ svargyaṃ svastyayanaṃ mahat //
etatpavitraṃ devānāmetadguhyaṃ parantapa /
etajjñānavatā jñeyameṣā gatiranuttamā //
ya imāṃ śrāvayedvidvānkathāṃ parvasuparvasu sa lokānprāpnuyātpuṇyāndevarṣibhirabhiṣṭutān //
śrāddhakāle ca viprāṇāṃ ya imāṃ śrāvayecchuciḥ /
na tatra rakṣasāṃ bhāgo nāsurāṇāṃ ca vidyate //
anasūyurjitakrodhaḥ sarvasatvahite rataḥ /
yaḥ paṭhetsatataṃ yuktaḥ sa vrajettatsalokatām //
vedānpārayate vipro rājā vijayavānbhavet /
vaiśyastu dhanadhānyāḍhyaḥ śūdraḥ sukhamavāpnuyāt //
bhīṣma uvāca /
tataste munayaḥ sarve sampūjya vinatāsutam /
svāneva cāśramāñjagmurbabhūvuḥ śāntitatparāḥ //
sthūladarśibhirākṛṣṭo durjñeyo hyakṛtātmabhiḥ /
eṣā dhutirmahārāja dharmyā dharmabhṛtāṃvara //
surāṇāṃ brahmaṇā proktā vismitānāṃ parantapa / mayāpyeṣā kathā tāta kathitā māturantike /
vasubhiḥ sattvasampannaistavāpyeṣā mayocyate //
tadagnihotraparamā japayajñaparāyaṇāḥ /
nirāśīrbandhanāḥ santaḥ prayāntyakṣarasātmatāṃ //
ārambhayajñānutsṛjya japahomaparāyaṇāḥ /
dhyāyanto manasā viṣṇuṃ gacchanti paramāṃ gatim //
tadeṣa paramo mokṣo mokṣadvāraṃ ca bhārata /
yathā viniścitātmāno gacchanti paramāṃ gatim //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0