Mahabharata · Chapter 13.32

kīdṛśe puruṣe tāta strīṣu bharatarṣabha /
śrīḥ padmā vasate nityaṃ tanme brūhi pitāmaha //
bhīṣma uvāca /

atra te varṇayiṣyāmi yathāvṛttaṃ yathāśrutam /
rukmiṇī devakīputrasannidhau paryapṛcchata //

nārāyaṇasyāṅkagatāṃ jvalantīṃ dṛṣṭvā śriyaṃ padmasamānavaktrām /

kautūhalādvismitacārunetrā papraccha mātā makaradhvajasyaṣa //

kānīha bhūtānyupasevase tvaṃ santiṣṭhase kāni ca sevase tvam /
tāni trilokeśvarabhūtakānte tattvena me brūhi maharṣikanye //

evaṃ tadā śrīrābhibhāṣyamāṇā devyā samakṣaṃ garuḍadhvajasya /
uvāca vākyaṃ madhurābhidhānaṃ manoharaṃ candramukhī prasannā //
śrīruvāca /

vasāmi nityaṃ subhage pragalbhe dakṣe nare karmaṇi vartamāne /
akrodhane devapare kṛtajñe jitendriye nityamudīrṇasatve //

nākarmaśīle puruṣe vasāmi na nāstike sāṅkarike kṛtaghne /
na bhinnavṛtte na nṛśaṃsavṛtte na cāvinīte na guruṣvasūyake //

ye cālpatejobalasattvamānāḥ kliśyanti kupyanti ca yatratatra /
na caiva tiṣṭhāmi tathāvidheṣu nareṣu saṅguptamanoratheṣu //

yaścātmani prārthayate na kiñci- dyaśca svabhāvopahatāntarātmā /
dyaśca svabhāvopahatāntarātmā / nareṣu nāhaṃ nivasāmi smyak //

vasāmi dharmaśīleṣu dharmajñeṣu mahātmasu /
vṛddhaseviṣu dānteṣu satvajñeṣu mahātmasu //

avandhyakāleṣu sadā dānaśaucarataṣu ca /
brahmacaryatapojñānagodvijātipriyeṣu ca //

strīṣu kāntāsu śāntāsu devadvijaparāsu ca /
viśuddhagṛhabhāṇḍāsu godhānyābhiratāsu ca //

svadharmaśīleṣu ca dharmavitsu vṛddhopasevānirate ca dānte /
kṛtātmani kṣāntipare samarthe kṣāntāsu dāntāsu tathā'balāsu / satyasvabhāvārjavasaṃyutāsu vasāgi devadvijapūjikāsu //

prakīrṇabhāṇḍāmanavekṣyakāriṇīṃ sadā ca bhartuḥ pratikūlavādinīm /

lolāmadakṣāmavalepinīṃ ca vyapetaśaucāṃ kalahapriyāṃ ca /
nidrābhibhūtāṃ satataṃ śayānā- mevaṃvidhāṃ strīṃ parivarjayāmi //

satyāsu nityaṃ priyadarśanāsu saubhāgyayuktāsu guṇānvitāsu /
vasāmi nārīṣu pativratāsu kalyāṇaśīlāsu vibhūṣitāsu //

yāneṣu kanyāsu vibhūṣaṇeṣu yajñeṣu megheṣu ca vṛṣṭimatsu /
vasāmi phullāsu ca padminīṣu nakṣatravīthīṣu ca śāradīṣu //

gajeṣu goṣṭheṣu tathā'saneṣu saraḥsu phullotpalapaṅkajeṣu /
nadīṣu haṃsasvananāditāsu krauñcāvaghuṣṭasvaraśobhitāsu //

vikīrṇakūladrumarājitāsu tapasvisiddhadvijasevitāsu /
vasāmi nityaṃ subahūdakāsu simhairgajaiścākulitodakāsu //

matte gaje govṛṣabhe narendre simhāsane satpuruṣeṣu nityam //

yasmiñcano havyabhujaṃ juhoti gobrāhmaṇaṃ cārcati devatāśca
kāle ca puṣpairbalayaḥ kriyante tasmingṛhe nityamupaimi vāsam //

svādhyāyanityeṣu sadā dvijeṣu kṣatre ca dharmābhirate sadaiva /
vaiśye ca kṛṣyābhirate vasāmi śūdre ca śuśrūṣaṇanityayukte //

nārāyaṇe tvekamanā vasāmi sarveṇa bhāvena śarīrabhūtā /
tasminhi dharmaḥ sumahānniviṣṭo brahmiṇyatā cātra tathā priyatvam //

nāhaṃ śarīreṇa vasāmi devi naivaṃ mayā śakyamihābhidhātum /
bhāvena yasminnivasāmi puṃsi sa vardhate dharmayaśorthakāmaiḥ //