Mahabharata · Chapter 13.33

prāyaścittaṃ kṛtaghnānāṃ pratibrūhi pitāmaha /
mātṝḥ pitṝnguruṃścaiva ye'vamanyanti mohitāḥ //

ye cāpyante pare tāta kṛtaghnā nirapatrapāḥ /
teṣāṃ gatiṃ mahābāho śrotumicchāmi tatvataḥ //
bhīṣma uvāca /

kṛtaghnānāṃ gatistāta narake śāśvatīḥ samāḥ / mātāpitṛgurūṇāṃ ca ye na tiṣṭhanti śāsane /
krimikīṭapipīleṣu jāyante sthāvareṣu ca //

durlabho hi punasteṣāṃ mānuṣye punarudbhavaḥ /
atrāpyudāharantīmamitihāsaṃ purātanam //

vatsanābho mahāprājño maharṣiḥ saṃśitavrataḥ /
valmīkabhūto brahmarṣistapyate sumahattapaḥ //

tasmiṃśca tapyati tapo vāsavo bharatarṣabha /
vavarṣa samuhadvarṣaṃ savidyutstanayitnumān //

tatra saptāhavarṣaṃ tu mumuce pākaśāsanaḥ /
nimīlitākṣastadvarṣaṃ pratyagṛhyata vai dvijaḥ //

tasminpatati varṣe tu śītavātasamanvite /
viśīrṇadhvastaśikharo valmīko'śanitāḍitaḥ //

tāḍyamāne tatastasminvatsanābhe mahātmani /
kāruṇyāttasya dharmaḥ svamānṛśaṃsyamathākarot //

cintayānasya brahmarṣi tapantamatidhārmikam /
anurūpā matiḥ kṣipramupajātā svabhāvajā //

svaṃ rūpaṃ māhiṣaṃ kṛtvā ********* manoharam /
rakṣārthaṃ vatsanāmasya catuṣpāduparisthitaḥ //

yadā tvapagataṃ varṣaṃ vṛṣṭivātasamanvitam / tato mahiṣarupeṇa dharmo dharmabhṛtāṃvara /
śanairvalmīkamutsṛjya prādravadbharatarṣabha //

sthite'sminvṛṣṭisampāte vīkṣate sma mahātapāḥ /
diśaśca vipulāstatra girīṇāṃ śikharāṇi ca //

dṛṣṭvā ca pṛthivīṃ sarvāṃ salilena pariplutām /
jalāśayānsa tāndṛṣṭvā vipraḥ pramudito'bhavat //

acintayadvismitaści vipraḥ pramudito'bhavat // acintayadvistitaśca varṣātkenābhirakṣitaḥ /
tato'paśyatsa mahiṣamavasthitamadūrataḥ //

tiryagyonāvapi kathaṃ dṛśyate dharmavatsalaḥ //

ato nu bhadramahiṣaḥ śilāpaṭṭamavasthitaḥ /
pīvaraścaiva balyaśca bahumāṃso bhavedayam //

tasya buddhiriyaṃ jātā dharmasaṃsaktajā muneḥ /
kṛtaghnā narakaṃ yānti ye ca viśvastaghātinaḥ //

niṣkṛtiṃ naiva paśyāmi kṛtaghnānāṃ kathañcana /
krate prāṇiparityāgāddharmajñānāṃ vaco yathā //

akṛtvā bharaṇaṃ pitroradattvā gurudakṣiṇām /
kṛtaghnatāṃ ca samprāpya maraṇāntā ca niṣkṛtiḥ //

ākāṅkṣāyāmupekṣāyāṃ copapātakamuttamam /
tasmātprāṇānparityakṣye prāyaścittārthamityuta //

sa meruśikharaṃ gatvā nisyaṅkenāntarātmanā / prāyaścittaṃ kartukāmaḥ śarīraṃ tyaktumudyataḥ /
nigṛhītaśca dharmātmā haste dharmeṇa dharmavit //
dharmi uvāca /

vatsanābha mahāprājña bahuvarṣaśatāyuṣa /
parituṣṭosmi tyāgena nissaṅgena tathā'tmanaḥ //

evaṃ dharmabhṛtaḥ sarve vimṛśanti kṛtākṛtam /
na kaścidvatsanābhasya yasya nopahataṃ manaḥ //

yaścānavadyaścarati śakto dharmaṃ ca sarvaśaḥ /
nivartasva mahāprājñ pūtātmā hyasi śāśvataḥ //