Mahabharata · Chapter 13.29

tato vrajraṃ sahasrākṣo dṛṣṭvā saktaṃ varāyudham /
ṛṣīṃśca dṛṣṭvā sahasā suparṇamidamabravīt //

na te suparṇa paśyāmi prabhāvaṃ tena yodhaye / ityukte na mayā rakṣā śakyā kartumato'nyathā /
idaṃ vajraṃ mayā sārdhaṃ nivṛttaṃ hi yathāgatam //

tataḥ sahasranayane nivṛtte garuḍastathā /
kadrūmabhyagamattūrṇamamṛtaṃ gṛhya bhārataḥ //
garuḍa uvāca /

tadāhṛtaṃ mayā śīghramamṛtaṃ jananīkṛte /
adāsī sā bhavatvadya vinatā dharmicāriṇī //
kadrūruvāca /

svāgataṃ svāhṛtaṃ cedamamṛtaṃ vinatātmaja / adāsī jananī te'dya putra kāmavaśā śubhā /

evamukte tadā sā ca samprāptā vinatā gṛham // upanīya yathānyāyaṃ vihago balināṃvaraḥ /

smṛtvā nikṛtyā vijayaṃ mātuḥ sampratipadya ca // vadhaṃ ca bhujagendrāṇāṃ ye vālāstasya vājinaḥ /

babhūvurasitaprakhyā nikṛtyā vai jitaṃ tvayā // tāmuvāca tato nyāyyaṃ vihago balināṃvaraḥ /

uñjahārāmṛtaṃ tūrṇamutpapāta ca raṃhasā // tadgṛhītvā'mṛtaṃ tūrṇaṃ prayāntamaparājitam /

kimarthaṃ vainateya tvamāhṛtyāmṛtamuttamam /
punarharati durbuddhe mā jātu vṛjitaṃ kṛthāḥ //
suparṇi uvāca /

amṛtāharaṇaṃ me'dya yatkṛtaṃ jananīkṛte /
bhavatyā vacanādetadāharāmṛtamityuta //

āhṛtaṃ tadidaṃ śīghraṃ muktā ca jananī mama /
harāmyeṣa punastatra yata etanmayā'hṛtam //

yadi māṃ bhavatī brūyādamṛtaṃ me ca dīyatām / tathā kuryāṃ na vā kuryāṃ na hi tvamamṛtakṣamā /
mayā dharmeṇa satyena vinatā ca samuddhṛtā //
bhīṣma uvāca /

tato gatvā'tha garuḍaḥ purandaramuvāca ha / idaṃ mayā vṛtrahantarhṛtaṃ te'mṛtamuttamam /
mātrarthe hi tathaivedaṃ gṛhāṇāmṛtamāhṛtam //

mātā ca mama deveśa dāsītvamupajagmuṣī /
bhujaṅgamānāṃ māturvai sā muktā'mṛtadarśanāt //

etacchrutvā sahasrākṣaḥ suparṇamanumanyate /
uvāca ca mudā yukto diṣṭyādiṣṭyeti vāsavaḥ //

kraṣayo ye sahasrākṣamupāsanti suraiḥ saha /
te sarve ca mudā yuktā viśvedevāstathaiva ca //

tatastamṛṣayaḥ sarve devāśca bharatarṣabha /
ūcuḥ purandaraṃ dṛṣṭā garuḍo labhatāṃ varam //

tataḥ śacīpatirvākyamuvāca prahasanniva /
janiṣyati hṛṣīkeśaḥ svayamevaiṣa pakṣirāṭ //

keśavaḥ puṇḍarīkākṣaḥ śūraputrasya veśmani /
svayaṃ dharmasya rakṣārthaṃ vibhajya bhujagāśanaḥ //

eṣa te pāṇḍavaśreṣṭha garuḍo'tha patatrirāṭ /
suparṇo vainateyaśca kīrtito bhadramastu te //

tadetadbharataśreṣṭha mayā'khyānaṃ prakīrtitam / suparṇasya mahābāho kiṃ bhūyaḥ kathayāmi te //