Mahabharata · Chapter 13.30

brāhmaṇānāṃ tu ye loke pratiśrutya pitāmaha /
na prayacchanti lobhātte ke bhavanti mahāmate //

etanme tatvato brūhi dharme dharmabhṛtāṃvara /
pratiśrutya durātmāno na prayacchanti ye narāḥ //
bhīṣma uvāca /

yo na dadyātpratiśrutya svalpaṃ vā yadi vā bahu /
āśāstasya hatāḥ sarvāḥ klībasyeva prajāphalam //

yāṃ rātriṃ jāyate pāpo yāṃ ca rātriṃ vinaśyati /
etasminnantare yadyatsukṛtaṃ tasya bhārata //

yacca tasya hutaṃ kiñciddattaṃ vā bharatarṣabha /
tapastaptamatho vā'pi sarvaṃ tasyopahanyate //

athaitadvacanaṃ prāhurdharmaśāstravido janāḥ /
niśāsya bharataśreṣṭha buddhyā paramayuktayā //

api codāharantīmaṃ dharmaśāstravido janāḥ /
aśvānāṃ śyāmakarṇānāṃ sahasreṇa sa mucyate //

atraivodāharantīmamitihāsaṃ purātanam /
sṛgālasya ca saṃvādaṃ vānarasya ca bhārata //

tau sakhāyau purā hyāstāṃ mānuṣatve parantapa / anyāṃ yoniṃ samāpannau sṛgālīṃ vānarīṃ tathā /
sambhāṣaṇāttataḥ sakhyaṃ tatratatra parasparam //

tataḥ parāsūnkhādantaṃ sṛgālaṃ vānaro'bravīt /
śmaśānamadhye samprekṣya pūrvajātimanusmaran //

kiṃ tvayā pāpakaṃ pūrvaṃ kṛtaṃ karma sudāruṇam /
yastvaṃ śmaśāne mṛtakānpūtikānatsi kutsitān //

evamuktaḥ pratyuvāca sṛgālo vānaraṃ tadā /
brāhmaṇasya pratiśrutya na mayā tadupāhṛtam //

tatkṛte pāpikāṃ yonimāpannosmi plavaṅgama /
tasmādevaṃvidhaṃ bhakṣyaṃ bhakṣayāmi bubhukṣitaḥ //
bhīṣma uvāca /

sṛgālo vānaraṃ prāha punareva narottama /
kiṃ tvayā pātakaṃ karma kṛtaṃ yenāsi vānaraḥ //
vānara uvāca /

sa cāpyāha phalāhāro brāhmaṇānāṃ plavaṅgamaḥ / tasmānna brāhmaṇasvaṃ tu harttavyaṃ viduṣā sadā /
sīmāvivāde moktavyaṃ dātavyaṃ ca pratiśrutam //
bhīṣma uvāca /

ityetadbruvato rājanbrāhmaṇasya mayā śrutam /
kathāṃ kathayataḥ puṇyāṃ dharmajñasya purātanīm //

śrutaṃ cāpi mayā bhūyaḥ kṛṣṇasyāpi viśāmpate /
kathāṃ kathayataḥ pūrvaṃ brāhmaṇaṃ prati pāṇḍava //

na hartavyaṃ vipradhanaṃ kṣantavyaṃ teṣu nityaśaḥ /
bālāśca nāvamantavyā daridrāḥ kṛpaṇā api //

evameva ca māṃ nityaṃ brāhmaṇāḥ sandiśanti vai /
pratiśrutaṃ bhaveddeyaṃ nāśā kāryā dvijottame //

brāhmaṇo hyāśayā pūrvaṃ kṛtayā pṛthivīpate /
susamiddho yatā dīptaḥ pāvakastadvidhaḥ smṛtaḥ //

yaṃ nirīkṣeta saṅkruddha āśayā pūrvajātayā /
pradahecca hitaṃ rājankakṣamakṣayyabhugyathā //

sa eva hi yadā tuṣṭo vacasā pratinandati /
bhavatyagadasankāśo viṣaye tasya bhārata //

putrānpautrānpaśūṃścaiva bāndhavānsacivāṃstathā /
puraṃ janapadaṃ caiva śāntiriṣṭena poṣayet //

etaddhi paramaṃ tejo brāhmaṇasyeha dṛśyate /
sahasrakiraṇasyeva saviturdharaṇītale //

tasmāddātavyameveha pratiśrutya yudhiṣṭhira /
yadīcchecchobhanāṃ jātiṃ prāptuṃ bharatasattama //

brāhmaṇasya hi dattena dhruvaṃ svargo hyanuttamaḥ /
śakyaḥ prāptuṃ viśeṣeṇa dānaṃ hi mahatī kriyā //

ito dattena jīvanti devatāḥ pitarasthā /
tasmāddānāni deyāni brāhmaṇebhyo vijānatā //

mahaddhi bharataśreṣṭha brāhmaṇastīrthamucyate /
velāyāṃ na tu kasyāṃ cidgacchedvipro hyapūjitaḥ //