Mahabharata · Chapter 13.28

pitāmahavacaḥ śrutvā garuḍaḥ patatāṃvaraḥ /
jagāma gokulaṃ kiñcinnavanītajihīrṣayā //

navanītaṃ tathā'paśyanmathitaṃ kalaśe sthitam /
tadādāya tato'gacchadyatastadrakṣyate'mṛtam //

sa tatra gatvā patagastiryaktoyaṃ mahābalaḥ /
hutāśanamapakramya navanītamapātayat //

so rciṣmānmandavego'bhūtsarpiṣā tena tarpitaḥ /
dhūmaketurna jajvāla dhūmameva sasarja ha //

tamatītyāśu garuḍo hṛṣṭātmā jātavedasam /
rakṣāṃsi samatikrāmatpakṣavātena pātayan //

te patanti śirobhisca jānubhiścaraṇaistathā /
utsṛjya śastrāvaraṇaṃ pakṣipakṣasamāhatāḥ //

utplutya cāvṛtānnāgānhatvā cakraṃ vyatītya ca /
arāntareṇa śirasā bhittvā jālaṃ samādravat //

sa bhittvā śirasā jālaṃ vajravegasamo balī /
ujjahāra tataḥ śīghramamṛtaṃ bhujagāśanaḥ //

tadādāyādravacchīghraṃ garuḍaḥ śvasano yathā /
atha sannāhamakarodvṛtrahā vibudhaiḥ saha //

tato mātalisaṃyuktaṃ haribhiḥ svarṇamālibhiḥ /
āruroha rathaṃ śīghraṃ sūryāgnisamatejasam //

so'bhyadravatpakṣirājaṃ vṛtrahā pākaśāsanaḥ /
udyamya niśitaṃ vajraṃ vajrahasto mahābalaḥ //

tathaiva garuḍo rājanvajrahastaṃ samādravat /
tato vai mātaliṃ prāha śīghraṃ vāhaya vājinaḥ //

atha divyaṃ mahāghoraṃ garuḍāya sasarja ha /
vajraṃ sahasranayanastigmavegaparākramaḥ //

utsisṛkṣantamājñāya vajraṃ vai tridaśeśvaram /
tūrṇaṃ vegaparo bhūtvā jagāma patatāṃvaraḥ //

pitāmahanisargeṇa jñātvā labdhavaraḥ khagaḥ /
āyudhānāṃ varaṃ vajramatha śakramuvāca ha //

vṛtrahanneṣa vajraste varo labdhaḥ pitāmahāt /
ataḥ sammānamākāṅkṣanmuñcāmyekaṃ tanūruham //

etenāyudharājena yadi śaktosi vṛtrahan /
hanyāstvaṃ parayā śaktayā gacchāmyahamanāmayaḥ //

tattu tūrṇaṃ tadā vajraṃ svena vegena bhārata /
jaghāna parayā śaktyā na cainamadahadbhṛśam //

tato devarṣayo rājangacchanto vai vihāyasā /
dṛṣṭvā vajraṃ vivaktaṃ taṃ pakṣaiparṇe'bruvanvacaḥ //

suparṇaḥ pakṣigaruḍo yasya parṇe varāyudham /
viṣaktaṃ devarājasya vṛtrahantuḥ sanātanam //

evaṃ suparṇo vihago vainateyaḥ pratāpavān /
ṛṣayastaṃ vijānanti cāgneyaṃ vaiṣṇavaṃ punaḥ //

vedābhiṣṭutamatyarthaṃ svargamārgaphalapradam /
tanuparṇaṃ suparṇasya jagṛhurbarhiṇastathā //

mayūrāvismitāḥ sarve ādravanti sma vajriṇam //