Mahabharata · Chapter 13.271

śaratalpagataṃ bhīṣmaṃ pāṇḍavo'tha kurūdvahaḥ /
yudhiṣṭhiro hitaṃ prepsurapṛcchatkalmaṣāpaham //
yudhiṣṭhira uvāca /

kiṃ śreyaḥ puruṣasyeha kiṃ kurvansukhamedhate /
vipāpmā sa bhavetkena kiṃ vā kalmaṣanāśanam //
vaiśampāyana uvāca /

tasmai śuśrūṣamāṇāya bhūyaḥ śāntanavastadā /
daivaṃ vaṃśaṃ yathānyāyamācaṣṭa puruṣarṣabha //
bhīṣma uvāca /

ayaṃ daivatavaṃśo vai ṛṣivaṃśasamanvitaḥ /
trisandhyaṃ paṭhitaḥ putra kalmaṣāpaharaḥ paraḥ //

yadahnā kurute pāpamindriyaiḥ puruṣaścaran /
buddhipūrvamabuddhirvā rātrau yaccāpi sandhyayoḥ //

mucyate sarvapāpebhyaḥ kīrtayanvai śuciḥ sadā /
nāndho na badhiraḥ kāle kurute svastimānsadā //

tiryagyoniṃ na gacchecca narakaṃ saṅkarāṇi ca /
na ca duḥkhamayaṃ tasya maraṇe sa na muhyati //

devāsuragakururdevaḥ sarvabhūtanamaskṛtaḥ /
acintyothāpyanirdeśyaḥ sarvaprāṇo hyayonijaḥ //

pitāmaho jagannāthaḥ sāvitrī brahmaṇaḥ satī /
vedabhūratha kartā ca viṣṇurnārāyaṇaḥ prabhuḥ //

umāpatirvirūpākṣaḥ skandaḥ senāpatistathā /
viśākho hutabhugvāyuścandrasūryau prabhākarau //

śakraḥ śacīpatirdevo yamo dhūmorṇayā saha /
varuṇaḥ saha gauryā ca saha ṛddhyā dhaneśvaraḥ //

saumyā gauḥ surabhirdevī viśravāśca mahānṛṣiḥ /
saṅkalpaḥ sāgaro gaṅgā sravantyo'tha marudgaṇaḥ //

vālakhilyāstapaḥsiddhāḥ kṛṣṇadvaipāyanastathā /
nāradaḥ parvataścaiva viśvāvasurhahāhuhūḥ //

tumburuścitrasenaśca devadūtaśca viśrutaḥ /
devakanyā mahābhāgā divyāścāpsarasāṃ gaṇāḥ //

urvaśī menakā rambhā miśrakeśī hyalambuṣā /
viśvācī ca ghṛtācī ca pañcacūḍā tilottamā //

ādityā vasavo rudrāḥ sāśvinaḥ pitaropi ca /
dharmaḥ śrutaṃ tapo dīkṣā vyavasāyaḥ pitāmahaḥ //

śarvaryo divasāścaiva mārīcaḥ kaśyapastathā /
śukro bṛhaspatirbhaumo budho rāhuḥ śanaiścaraḥ //

nakṣatrāṇyṛtavaścaiva māsāḥ pakṣāḥ savatsarāḥ /
vainateyāḥ samudrāśca kadrujāḥ pannagāstathā //

śatadruśca vipāśā ca candrabhāgā sarasvatī /
sindhuśca devikā caiva prabhāsaṃ puṣkarāṇi ca //

gaṅgā mahānadī veṇā kāverī narmadā tathā /
kulampunā viśalyā ca karatoyāmbuvāhinī //

sarayūrgaṇḍakī caiva lohitaśca mahānadaḥ /
tāmrāruṇā vetravatī parṇāśā gautamī tathā //

godāvarī ca veṇyā ca kṛṣṇaveṇā tathā'drijā /
dṛṣadvatī ca kāverī cakṣurmandākinī tathā //

prayāgaṃ ca prabhāsaṃ ca puṇyaṃ naimiṣameva ca /
tacca viśveśvarasthānaṃ yatra tadvimalaṃ saraḥ //

puṇyatīrthaṃ susalilaṃ kurukṣetraṃ prakīrtitam /
sindhūttamaṃ tapo dānaṃ jambūmārgamathāpi ca //

hiraṇvatī vitastā ca tathā plakṣavatī nadī /
vedasmṛtirvedavatī mālavā'thāśvavatyapi //

bhūmibhāgāstathā puṇyā gaṅgādvāramathāpi ca /
ṛṣikulyāstathā medhyā nadyaḥ sindhuvahāstathā //

carmaṇvatī nadī puṇyā kauśikī yamunā tathā /
nadī bhīmarathī caiva bāhudā ca mahānadī //

māhendravāṇī tridivā nīlikā ca sarasvatī /
nandā cāparanandā ca tathā tīrthamahāhradaḥ //

gayā'tha phalgutīrthaṃ ca dharmāraṇyaṃ surairvṛtam /
tathā devanadī puṇyā saraśca brahmanirmitam //

puṇyaṃ trilokavikhyātaṃ sarvapāpaharaṃ śivam /
himavānparvataścaiva divyauṣadhisamanvitaḥ //

vindhyo dhātuvicitrāṅgastīrthavānauṣadhānvitaḥ /
merurmahendro malayaḥ śvetaśca rajatāvṛtaḥ //

śṛṅgavānmandaro nīlo niṣadho dardurastathā /
citrakūṭo'ñjanābhaśca parvato gandhamādanaḥ //

puṇyaḥ somagiriścaiva tathaivānye mahīdharāḥ /
diśaśca vidiśaścaiva kṣitiḥ sarve mahīruhāḥ //

viśvedevā nabhaścaiva nakṣatrāṇi grahāstathā /
pāntu naḥ satataṃ devāḥ kīrtitā'kīrtitā mayā //

kīrtayāno naro hyetānmucyate sarvakilbiṣaiḥ /
stuvaṃśca pratinandaṃśca mucyate sarvato bhayāt //

sarvasaṅkarapāpebhyo devatāstavanandakaḥ /
devatānantaraṃ viprāṃstapaḥsiddhāṃstapodhikān //

kīrtitānkīrtayiṣyāmi sarvapāpapramocanān /
yavakrīto'tha raimyaśca kakṣīvānauśijastathā //

bhṛgvaṅgirāstathā kaṇvo medhātithiratha prabhuḥ /
barhī ca guṇasampannaḥ prācīṃ diśamupāśritāḥ //

bhadrāṃ diśaṃ mahābhāgā ulmucuḥ pramucustathā /

mumucuśca mahābhāgaḥ svastyātreyaśca vīryavān //

mitrāvaruṇayoḥ putrastathā'gastyaḥ pratāpavān /
dṛḍhāyuścordhvabāhuśca viśrutāvṛṣisattamau //

paścimāṃ diśamāśritya ya edhante nibodha tān /
uṣaṅguḥ saha sodaryaiḥ parivyādhaśca vīryavān //

ṛṣirdīrghatamāścaiva gautamaḥ kāśyapastathā /
ekataśca dvitaścaiva tritaścaiva mahānṛṣiḥ //

atreḥ putraśca dharmātmā tathā sārasvataḥ prabhuḥ / uttarāṃ diśamāśritya ya edhante nibodha tān /

atrirvasiṣṭhaḥ śaktiśca pārāśaryaśca vīryavān /
viśvāmitro bharadvājo jamadagnistathaiva ca //

ṛcīkaputro rāmaśca ṛṣirauddālakistathā /
śvetaketuḥ kohalaśca vipulo devalastathā //

devaśarmā ca dhaumyaśca hastikāśyapa eva ca /
lomaśo nāciketaśca lomaharṣaṇa eva ca //

ṛṣirugraśravāścaiva bhārgavaścyavanastathā /
eṣa vai samavāyaśca ṛṣidevasamanvitaḥ //

ādyaḥ prakīrtito rājansarvapāpapramocanaḥ /
nṛgo yayātirnahuṣo yaduḥ pūruśca vīryavān //

dhundhumāro dilīpaśca sagaraśca pratāpavān /
kṛśāśvo yauvanāśvaśca citrāśvaḥ satyavāṃstathā //

duṣyanto bharataścaiva cakravartī mahāyaśāḥ /
pavano janakaścaiva tathā dṛṣṭaratho nṛpaḥ //

raghurnaravaraścaiva tathā daśaratho nṛpaḥ /
rāmo rākṣasahā vīraḥ śaśabindurbhagīrathaḥ //

hariścandro maruttaśca tathā da़ḍharatho nṛpaḥ /
mahodaryo hyalarkaśca ailaścaiva narādhipaḥ //

karandhamo naraśreṣṭhaḥ kadhmoraśca narādhipaḥ /
dakṣo'mbarīṣaḥ kukuro raivataśca mahāyaśāḥ //

kuru saṃvaraṇaścaiva māndhātā satyavikramaḥ /
mucukundaśca rājarṣirjahnurjāhnavisevitaḥ //

ādirājaḥ pṛthurvainyo mitrabhānuḥ priyaṅkaraḥ /
trasaddasyustathā rājā śveto rājarṣisattamaḥ //

mahābhiṣaśca vikhyāto nimī rājā tathā'ṣṭakaḥ /
āyuḥ kṣupaśca rājarṣiḥ kakṣeyusca narādhipaḥ //

pratardano divodāsaḥ sudāsaḥ kosaleśvaraḥ /
ailo nalaśca rājarṣirmanuścaiva prajāpatiḥ //

havidhraśca pṛṣadhraśca pratīpaḥ śāntanustathā /
ajaḥ prācīnabarhiśca tathaikṣvākurmahāyaśāḥ //

anaraṇyo narapatirjānujaṅghastathaiva ca /
kakṣasenaśca rājarṣirye cānye cānukīrtitāḥ //

kalyamutthāya yo nityaṃ sandhye dve'stamayodaye /
paṭhecchuciranāvṛttaḥ sa dharmaphalabhāgbhavet //

devā devarṣayaścaiva stutā rājarṣayastathā /
puṣṭimāyuryaśaḥ svargaṃ vidhāsyanti mameśvarāḥ //

mā vighnaṃ mā ca me pāpaṃ mā ca me paripanthinaḥ /
dhruvo jayo me nityaḥ syātparatra ca śubhā gatiḥ //

pālaya tvaṃ prajāḥ sarvāḥ śāntātmā tvanuśāsitā /
dvaipāyanaḥ svayañcakṣuḥ kṛṣṇaste'stu parāyaṇam //
vaiśampāyana uvāca /

ityuktvopāsanārthāya virarāma mahāmatiḥ //