Mahabharata · Chapter 13.270

kāryate yacca kriyate saccāsacca kṛtākṛtam /
tatrāśvasīta satkṛtvā asatkṛtvā na viśvaset //

kāla evāntarāśaktirnigrahānugrahau dadat /
buddhimāviśya bhūtānāṃ dharmādharmau pravartate //

yadā tvasya bhavedbuddhirdharmārthasya pradarśanāt /
tadāśvasīta dharmātmā dṛḍhabuddhirna viśvaset //

etāvanmātrametaddhi bhūtānāṃ prājñalakṣaṇam /
kālayukto'pyubhayaviccheṣaṃ yuktaṃ samācaret //

yathā hyupasthitaiśvaryāḥ pūjayanti narā janān /
evamevātmanā'tmānaṃ pūjayantīha dhārmikāḥ //

bhāvaśuddhistu tapasā devatānāṃ ca mūjayā / sanātanena śuddhyā ca śrutadānajapairapi /
na hyaśuddhastu tāṃ dadyāddharmakāle kathañcana //

na hyadharmatayā dharmaṃ dadyātkālaḥ kathañcana /
tasmādviśuddhamātmānaṃ jānīyāddharmacāriṇam //

spraṣṭumapyasamartho hi jvalantamiva pāvakam /
adharmaḥ santato dharmaṃ kālena parirakṣitam //

kāryāvetau hi dharmoṇi dharmo hi vijayāvahaḥ /
trayāṇāmapi lokānāmālokaḥ kāraṇaṃ bhavet //

na tu kaścinnayetprājño gṛhītvaiva kare naram / ūhyamānastu dharmeṇa prāpnuyātparamacyutam /
viśvāsa eva kartavyo bahudharme śubhacchale //

śūdro'haṃ nādhikāro me cāturāśramyasevane /
iti vijñānamapare nātmanyupadadhatyuta //

viśeṣeṇa ca vakṣyāmi cāturvarṇyasya liṅgataḥ /
pañcabhūtaśarīrāṇāṃ sarveṣāṃ sadṛśātmanām //

lokadharme ca dharme ca viśeṣakaraṇaṃ kṛtam /
yathaikatvaṃ punaryānti prāṇinastatra vistaraḥ //

adhruvo hi kathaṃ lokaḥ smṛto dharmaḥ kathaṃ dhruvaḥ /
yatra kālo dhruvastāta tatra dharmaḥ sanātanaḥ //

sarveṣāṃ tulyadehānāṃ sarveṣāṃ sadṛśātmanām /
kālo dharmeṇa saṃyuktaḥ śeṣa eva svayaṃ guruḥ //

evaṃ sati na doṣo'sti bhūtānāṃ dharmasevane /
tiryagyonāvapi satāṃ loka eva mato guruḥ //