Mahabharata · Chapter 13.262

tūṣṇīmāsīdarjunastu pavanastvabravītpunaḥ /
śṛṇu me brāhmaṇeṣveva mukhyaṃ karma janādhipa //

madasyāsyamanuprāptā yadā sendrā divaukasaḥ /
tadaiva cyavanena dyaurhṛtā teṣāṃ vasundharā //

ubhau lokau hṛtau matvā te devā duḥkhitā'bhavan /
śokārtāśta mahātmānaṃ brahmāṇaṃ śaraṇaṃ yayuḥ //
devā ūcuḥ /

madāsyavyatiṣiktānāmasmākaṃ lokapūjita /
cyavanena hṛtā bhūmiḥ kapaiścaiva divaṃ prabho //
brahmovāca /

gacchadhvaṃ śaraṇaṃ viprānāśu sendrā divaukasaḥ /
prasādya tānubhau lokāvavāpsyatha yathāpuram //

te yayuḥ śaraṇaṃ viprānūcuste kāñjayāmahe /
ityuktāste dvijānprāhurjayateha kapāniti //

bhūgatānhi vijetāro vayamityabruvandvijāḥ /
tataḥ karma samārabdhaṃ brāhmaṇaiḥ kapanāśanam //

tacchrutvā preṣito dūto brāhmaṇebhyo dhanī kapaiḥ /
sa ca tānbrāhmaṇānāha dhanī kapavaco yathā //

bhavadbhiḥ sadṛśaḥ sarve kapāḥ kimiha vartate /
sarve vedavidaḥ prājñāḥ sarve ca kratuyājinaḥ //

sarve satyavratāścaiva sarve tulyā maharṣibhiḥ /
śrīścaiva ramate teṣu dhārayanti śriyaṃ ca te //

vṛthā dārānna gacchanti vṛthā māṃsaṃ na bhuñjate /
dīptamagniṃ juhvate ca gurūṇāṃ vacane sthitāḥ //

sarve ca niyatātmāno bālānāṃ saṃvibhāginaḥ / upetya śanakairyānti na sevanti rajasvalām /
svargātiṃ caiva gacchanti tathaiva śubhakarmiṇaḥ //

abhuktavatsu nāśnanti garbhiṇīvṛddhakādiṣu /
pūrvāhṇeṣu na dīvyanti divā caiva na śerate //

etaiścānyaiśca bahubhirguṇairyuktānkathaṃ kapān /
vijeṣyatha nivartadhvaṃ nivṛttānāṃ sukhaṃ hi vaḥ //
brāhmaṇā ūcuḥ /

kapānvayaṃ vijeṣyāmo ye devāste vayaṃ smṛtāḥ /
tasmādvadhyāḥ kapā'smākaṃ dhaninyāhi yathāgatam //

dhanī gatvā kapānāha na vo viprāḥ priyaṅkarāḥ /
gṛhītvā'strāṇyato viprānkapāḥ sarve samādravan //

samudagradhvajāndṛṣṭvā kapānsarve dvijātayaḥ /
vyasṛjañjvalitānagnīnkapānāṃ prāṇanāśanān //

brahmasṛṣṭā havyabhujaḥ kapānhatvā sanātanāḥ /
nabhasīva yathā'bhrāṇi vyarājanta narādhipa //

hatvā vai dānavāndevāḥ sarve sambhūya saṃyuge /
te nābhyajānanhi tadā brāhmaṇairnihatānkapān //

athāgamya mahātejā nārado'kathayadvibho /
yathā hatā mahābhāgaistejasā brāhmaṇaiḥ kapāḥ //

nāradasya vacaḥ śrutvā prītāḥ sarve divaukasaḥ /
praśaśaṃsurdvijāṃścāpi brāhmaṇāṃśca yaśasvinaḥ //

teṣāṃ tejastathā vīryaṃ devānāṃ vavṛdhe tataḥ /
avāpnuvaṃścāmaratvaṃ triṣu lokeṣu pūjitam //

ityuktavacanaṃ vāyumarjunaḥ pratyuvāca ha /
pratipūjya mahābāho yattacchṛṇu narādhipa //
arjuna uvāca /

jīvāmyahaṃ brāhmaṇārthaṃ sarvathā satataṃ prabho /
brahmaṇyo brāhmaṇebhyaśca praṇamāmi ca nityaśaḥ //

dattātreyaprasādācca mayā prāptamidaṃ balam /
loke ca paramā kīrtirdharmaścācarito mahān //

aho brāhmaṇakarmāṇi mayi māruta tattvataḥ /
tvayā proktāni kārtsnyena śrutāni prayatena ca //
vāyuruvāca /

brāhmaṇānkṣātrādharmeṇa pālayasvendriyāṇi ca /
viprebhyaste bhayaṃ ghoraṃ tattu kālādbhaviṣyati //