Mahabharata · Chapter 13.261

ityuktastvarjunastūṣṇīmabhūdvāyustamabravīt /
śṛṇu me haihayaśreṣṭha karmātreḥ sumahātmanaḥ //

ghore tamasyayudhyanta sahitā devadānavāḥ /
avidyata śaraistatra svarbhānuḥ somabhāskarau //

atha te tamasā grastā nihanyante sma dānavaiḥ /
devā nṛpatiśārdūla sahaiva balibhistadā //

asurervadhyamānāste kṣīṇaprāṇā divaukasaḥ /
apaśyanta tapasyantamatriṃ vipraṃ tapodhanam //

athainamabruvandevāḥ śāntakrodhaṃ jitendriyam /
asureriṣubhirviddhau candrādityāvimāvubhau //

vayaṃ vadhyāmahe cāpi śatrubhistamasā vṛte /
nādhigacchāma śāntiṃ ca bhayāttrāyasva naḥ prabho //
atriruvāca /

kathaṃ rakṣāmi bhavataste'bruvaṃścandramā bhava /
timiraghnaśca savitā dasyuhantā ca no bhava //

evamuktastadātrirvai tamonudabhavacchaśī /
apaśyatsaumyabhāvācca somavatpriyadarśanaḥ //

dṛṣṭvā nātiprabhaṃ somaṃ tathā sūryaṃ ca pārthiva /
prakāśamakarodatristapasā svena saṃyuge //

jagadvitimiraṃ cāpi pradīptamakarottadā /
vyajayacchatrusaṅghāṃśca devānāṃ svena tejasā //

atriṇā dahyamānāṃstāndṛṣṭvā devā mahāsurān / parākramaiste'piṃ tadā vyaghnannatrisurakṣitāḥ /
udbhāsitaśca savitā devāstrātā hatāsurāḥ //

atriṇā tvatha somatvaṃ kṛtamuttamatejasā /
dvijenāgnidvitīyeni japatā carmavāsasā //

phalabhakṣeṇa rājarṣe paśya karmātriṇā kṛtam / tasyāpi vistareṇoktaṃ karmātreḥ sumahātmanaḥ /
bravīmyanyaṃ brūhi vā tvamatritaḥ kṣatriyaṃ varam //

ityuktastvarjunastūṣṇīmabhūdvāyustato'bravīt /
śṛṇu rājanmahatkarma cyavanasya mahātmanaḥ //

aśvinoḥ pratisaṃśrutya cyavanaḥ pākaśāsanam /
provāca sahito devaiḥ somapāvaśvinau kuru //
indra uvāca /

asmābhirninditāvetau bhavetāṃ somapau katham /
devairna sammitāvetau tasmānmaivaṃ vadasva naḥ //

aśvibhyāṃ saha necchāmaḥ somaṃ pātuṃ mahāvrata /
yadanyadvakṣyase vipra tatkariṣyāma te vacaḥ //
cyavana uvāca /

pibetāmaśvinau somaṃ bhavadbhiḥ sahitāvimau /
ubhāvetāvapi surau sūryaputrau sureśvara //

kriyatāṃ madvaco devā yathā vai samudāhṛtam /
etadvaḥ kurvatāṃ śreyo bhavennaitadakurvatām //
indra uvāca /

aśvibhyāṃ saha somaṃ vai na pāsyāmi dvijottama /
pibantvanye yathākāmaṃ nāhaṃ pātumihotsahe //
cyavana uvāca /

na cetkariṣyasi vaco mayoktaṃ balasūdana /
mayā pramathitaḥ sadyaḥ somaṃ pāsyasi vai makhe //
vāyuruvāca /

tataḥ karma samārabdhaṃ hitāya sahasā'śvinoḥ /
cyavaneni tato mantrairabhibhūtāḥ surā'bhavan //

tattu karma samārabdhaṃ dṛṣṭvendraḥ krodhamūrcchitaḥ /
udyamya vipulaṃ śailaṃ cyavanaṃ samupādravat //

tathā vajrema bhagavānamarṣākulalocanaḥ /
tamāpatantaṃ dṛṣṭvaiva cyavanastapasā'nvitaḥ //

adbhiḥ siktvā'stamyayataṃ savajraṃ sahaparvatam /
athendrasya mahāghoraṃ so'sṛjacchatrumeva hi //

madaṃ nāmāhutimayaṃ vyāditāsyaṃ mahāmuniḥ /
tasya dantasahasraṃ tu babhūva śatayojanam //

dviyojanaśatāstasya daṃṣṭrāḥ paramadāruṇāḥ /
hanustasyābhavadbhūmāvāsyaṃ cāsyāspṛśaddivam //

jihvāmūle sthitāstasya sarve devāḥ savāsavāḥ /
timerāsyamanuprāptā yathā matsyā mahārṇave //

te sammantrya tato devā madasyāsya samīpagāḥ /
abruvansahitāḥ śakraṃ praṇamāsmai dvijātaye //

aśvibhyāṃ saha somaṃ ca pibāma vigatajvarāḥ /
tataḥ sa praṇataḥ śakraścakāra cyavanasya tat //

cyavanaḥ kṛtavānetāvaśvinau somapāyinau /
tataḥ pratyāharatkarma madaṃ ca vyabhajanmuniḥ //

akṣeṣu mṛgayāyāṃ ca pāne strīṣu ca vīryavān /
etairdoṣairnarā rājankṣayaṃ yānti na saṃśayaḥ //

tasmādetānnaro nityaṃ dūrataḥ parivarjayetad //

etatte cyavanasyāpi karmi rājanprakīrtitam /
bravīmyanyaṃ brūhi vā tvaṃ kṣatriyaṃ brāhmaṇādvaram //