Mahabharata · Chapter 13.260

ityuktaḥ sa nṛpastūṣṇīmabhūdvāyustato'bravīt /
śṛṇu rājannagastyasya mahātmyaṃ brāhmamasya ha //

asurairnirjitā devā nirutsāhāśca te kṛtāḥ /
yajñāścaiṣāṃ hṛtāḥ sarve pitṝṇāṃ ca svadhāstathā //

karmajyā mānavānāṃ ca dānavairhaihayarṣabha /
bhraṣṭaiśvaryāstato devāśceruḥ pṛthvīmiti śrutiḥ //

tataḥ kadācitte rājandīptamādityavarcasam /
dadṛśustejasāḥ yuktamagastyaṃ vipulavratam //

abhivādya tu taṃ devāḥ pṛṣṭvā kuśalameva ca /
idamūcurmahātmānaṃ vākyaṃ kāle janādhipa //

dānavairyudhi bhagnāḥ sma tathaiśvaryācci bhraṃśitāḥ /
tadasmānno bhayāttīvrāttrāhi tvaṃ munipuṅgavaḥ //

ityuktaḥ sa tadā devairagastyaḥ kupito'bhavat /
prajajvāla ca tejasvī kālāgniriva sankṣaye //

tena dīptāṃśujālena nirdagdhā dānavāstadā /
antarikṣānmahārāja nipetuste sahasraśaḥ //

dahyamānāstu te daityāstasyāgastyasya tejasā /
ubhau lokau parityajya gatāḥ kāṣṭhāṃ tu dakṣiṇām //

balistu yajate yajñamaśvamedhaṃ mahīṃ gataḥ /
yenye'dhastā mahīsthāśca tena dagdhā mahāsurāḥ //

tyaktalokāḥ punaḥ prāptāḥ suraiḥ śāntabhayairnṛpa /
athainamabruvandevā bhūmiṣṭhānasu rāñjahi //

ityuktaḥ prāha devānsa na śaktosmi mahīgatān /
dagdhuṃ tapo hi kṣīyenme na dhakṣyāmīti pārthiva //

evaṃ dagdhā bhagavatā dānavāḥ svena tejasā /
agastyena tadā rājaṃstapasā bhāvitātmanā //

īdṛśaścāpyagastyo hi kathitaste mayā'nagha /
bravīmyanyaṃ brūhi vā tvamagastyātkṣatriyaṃ varam //
bhīṣma uvāca /

ityuktaḥ sa tadā tūṣṇīmabhūdvāyustato'bravīt /
śṛṇu rājanvasiṣṭhasya mukhyaṃ karma yaśasvinaḥ //

vaikhānasavidhānena gaṅgātīraṃ samāśritāḥ / ādityāḥ satramāsanta saro vaikhānasaṃ prati /
vasiṣṭhaṃ manasā gatvā jñātvā tatvasya gocaram //

yajamānāṃstu tāndṛṣvā sarvāndīkṣānukarśitān /
hantumaicchanta śailābhā balino nāma dānavāḥ //

adūrāttu tatasteṣāṃ brahmadattavaraṃ saraḥ /
hatā hatā vai tatraite jīvantyāplutya dānavāḥ //

te pragṛhya mahāghorānparvatānparighāndrumān /
vikṣobhayantaḥ salilamutthitaṃ śatayojanam //

abhyadravanta devāṃste sahasrāṇi daśaiva hi /
tatastairarditā devāḥ śaraṇaṃ vāsavaṃ yayuḥ //

sa ca tairvyathitaḥ śakro vasiṣṭhaṃ saraṇaṃ yayau /
tato'bhayaṃ dadau tebhyo vasiṣṭho bhagavānṛṣiḥ //

tadā tānduḥkitānjñātvā ānṛśaṃsyaparo muniḥ /
ayatnenādahatsarvāñjvalatā svena tejasā //

kailāsaṃ prasthitāṃ caiva nadīṃ gaṅgāṃ mahātapāḥ /
ānayattatsaro divyaṃ tayā bhinnaṃ ca tatsaraḥ //

saro bhinnaṃ tayā nadyā sarayūḥ sā tato'bhavat /
hatāśca balino yatra sa deśe balino'bhavat //

evaṃ sendrā vasiṣṭhena rakṣitāstridivaukasaḥ /
brahmadattavarāścaiva hatā daityā mahātmanā //

etatkarma vasiṣṭhasya kathitaṃ hi mayā'nagha /
bravīmyanyaṃ brūhi vā tvaṃ vasiṣṭhātkṣatriyaṃ varam // 26 //