Mahabharata · Chapter 13.259

imāṃ bhūmiṃ dvijātibhyo ditsurvai dakṣiṇāṃ purā /
aṅgo nāma nṛpo rājaṃstataścintāṃ mahī yayau //

dhāriṇīṃ sarvabhūtānāmayaṃ prāpya varo nṛpaḥ /
kathamicchati māṃ dātuṃ dvijebhyo brahmaṇaḥ sutām //

sāhaṃ tyaktvā gamiṣyāmi bhūmitvaṃ brahmaṇaḥ padam /
ayaṃ sarāṣṭro nṛpatirmārbhūditi tato'gamat //

tatastāṃ kaśyapo dṛṣṭvā vrajantīṃ pṛthivīṃ tadā /
praviveśa mahīṃ sadyo yuktātmā susamāhitaḥ //

ṛddhā sā sarvato jajñe tṛṇauṣadhisamanvitā /
dharmottarā naṣṭabhayā bhūmirāsīttamato nṛpa //

evaṃ varṣasahasrāṇi divyāni vipulavrataḥ /
triṃśataṃ kaśyapo rājanbhūmirāsīdatandritaḥ //

athāgamya mahārājannamaskṛtyi ca kaśyapam /
pṛthavī kāśyapī jajñe sutā tasya mahātmanaḥ //

eṣa rājannīdṛśo vai brāhmaṇaḥ kaśyapo'bhavat /
anyaṃ prabrūhi vā tvaṃ ca kaśyapātkṣatriyaṃ varam //

tūṣṇīṃ babhūva nṛpatiḥ pavanastvabravīdvacaḥ /
śṛṇu rājannucakṣyasya jātasyāṅgirase kule //

bhadrā somasya duhitā rūpeṇa paramā matā /
tasyāstulyaṃ patiṃ soma ucathyaṃ samapaśyata //

sā ca tīvraṃ tapastepe mahābhāgā yaśasvinī /
ucathyaṃ tu mahābhāgaṃ tatkṛte varayattadā //

tata āhūya cocathyaṃ dadāmīti yaśasvinīm /
bhāryārthe sa ca jagrāha vidhivadbhūridakṣiṇaḥ //

tāṃ tvakāmayata śrīmānvaruṇaḥ pūrvameva ha /
sa cāgamya vanaprasthaṃ yamunāyāṃ jahāra tām //

jaleśvarastu hṛtvā tāmanayastvaṃ puraṃ prati /
paramādbhutasaṅkāśaṃ ṣaṭsahasraśatahradam //

na hi ramyataraṃ kiñcittasmādanyatpurottamam /
vāsādairapsarobhiśca divyaiḥ kāmaiśca śobhitam //

tatra devastayā sārdhaṃ reme rājañjaleśvaraḥ /
tadākhyātamucathyāya tataḥ patnyavamardanam //

tacchrutvā nāradātsarvamucathyo nāradaṃ tadā /
provāca gaccha brūhi tvaṃ varuṇaṃ paruṣaṃ vacaḥ //

madvākyānmuñca me bhāryāṃ kasmāttāṃ hṛtavānasi /
lokapālosi lokānāṃ na lokasya vilopakaḥ //

somena dattā bhāryā me tvayā cāpahṛtā'dya vai /
ityukto vacanāttasya nāradena jaleśvaraḥ //

muñca bhāryāmucathyasya kasmāttvaṃ hṛtavānasi /
iti śrutvā vacastasya so'tha taṃ varuṇo'bravīt //

mamaiṣā supriyā bhāryā naināmutsraṣṭumutsahe / ityukto varuṇenātha nāradaḥ prāpya taṃ munim /
ucathyamabravīdvākyaṃ nātihṛṣṭamanā iva //

gale gṛhītvā kṣiptosmi varuṇena mahāmune /
na prayacchati te bhāryāṃ yatte kāryaṃ kuruṣva tat //

nāradasya vacaḥ śrutvā kruddhaḥ prājvaladaṅgirāḥ /
apibattejasā vāri viṣṭabhya sumahātapāḥ //

pīyamāne tu sarvasmiṃstoye'pi salileśvaraḥ /
suhṛdbhirbhikṣamāṇo'pi naivāmuñcata tāṃ tadā //

tataḥ kruddho'bravīdbhūmimucathyo brāhmaṇottamaḥ /
darśaya svasthalaṃ bhadre ṣaṭsahasraśatahradam //

tatastadīraṇaṃ jātaṃ samudrasyāvasarpataḥ /
tasmāddeśānnadīṃ caiva provācāsau dvijottamaḥ //

adṛśyā gaccha bhīru tvaṃ sarasvati marūnprati /
aṇuṇyabhūṣo bhavatu deśastyaktastayā śubhe //

tataścūrṇīkṛte deśeka bhadrāmādāya vāripaḥ /
adadāccharaṇaṃ gatvā bhāryāmāṅgirasāya vai //

pratigṛhya tu tāṃ bhāryāmucathyaḥ sumanā'bhavat /
mumoca ca jagadduḥkhānmarutaścaiva nirmalāḥ //

tataḥ sa labdhvā tāṃ bhāryāṃ varuṇaṃ prāha dharmavit /
ucathyaḥ sumahātejā yattucchṛṇu narādhipa //

mayaiṣā tapasā prāptā krośataste jalādhipa /
ityuktvā tāmupādāya svameva bhavanaṃ yayau //

eṣa rājannīdṛśo vai ucathyo brāhmaṇarṣabhaḥ /
bravīmi hānyaṃ brūhi tvamucathyātkṣatriyaṃ varam //