Mahabharata · Chapter 13.248

evamuktvā mahādevaḥ śrotukāmaḥ svayaṃ prabhuḥ /
anukūlāṃ priyāṃ bhāryāṃ pārśvastāmabhyabhāṣata //
maheśvara uvāca /

parāvarajñe dharmāṇāṃ tapovananivāsinām / dīkṣāvidhidamopete satataṃ vratacāriṇi /
pṛcchāmi tvāṃ varārohe pṛṣṭā vada mamepsitam //

sāvitrī brahmaṇaḥ patnī kauśikasya śacī śubhā /
lakṣmīrviṣṇoḥ priyā bhāryā dhṛtirbhāryā yamasya tu //

mārkaṇḍeyasya dhūmorṇā ṛddhirvaiśravaṇasya tu /
varuṇasya priyā gaurī savituśca suvarcalā //

rohiṇī śaśino bhāryā svāhā cāgneraninditā /
kāśyapasyāditiścaiva vasiṣṭhasyāpyarundhatī //

etāścānyāśca devyastu sarvāstāḥ patidevatāḥ /
śrūyante lokavikhyātāstvayā caiva sahoṣitāḥ //

tābhiśca pūjitā'pi tvamanuvṛttyanubhāṣaṇaiḥ /
tasmāttu paripṛcchāmi dharmajñe lokasammate //

strīdharmaṃ śrotumicchāmi tvayaiva samudāhṛtam /
sadhramacāriṇī me tvaṃ lokasandhāriṇī tathā //

ayaṃ hi strīgaṇastvāṃ tu anuyāti na muñcati /
tvatprasādāddhitaṃ śrotuṃ strīvṛttaṃ śubhalakṣaṇam //

tvayā coktaṃ viśeṣeṇa guṇabhūtaṃ hi tiṣṭhati /
striya eva sadā loke strīgaṇasya gatiḥ priye //

śaśvadgaurgoṣu gaccheta nānyatra ramate naraḥ /
evaṃ lokagatirdevi ādiprabhṛti vartate //

pramadoktaṃ tu yatkiñcittatstrīṣu bahumanyate /
na tathā manyate strīṣu puruṣoktamanindite //

tvayaiṣa vidito hyarthaḥ strīṇāṃ dharmaḥ sanātanaḥ /
tasmāttvāṃ prati pṛcchāmi pṛṣṭā vada mamepsitam //
nārada uvāca /

evamuktā tadā devī mahādevena śobhanā / sodvegā ca salajjā ca nāvadattatra kiñcana /
punaḥ punastadā devī devaḥ kimiti cābravīt //
umovāca /

bhagavandevadeveśa surāsuranamaskṛta / tvadantike mayā vaktuṃ strīṇāṃ dharmaḥ kathaṃ bhavet // maheśvara uvāca /

manniyogādavaśyaṃ tu vaktavyaṃ tu mama priye //
umovāca /

imā nadyo mahādeva sarvatīrthodakānvitāḥ /
upasparśanahetostvāṃ na tyajanti samīpataḥ //

etābhiḥ saha sammantrya pravakṣyāmi tavepsitam /
ayuktaṃ satsu tantreṣu tānatikramya bhāṣitum //

mayā sammānitāścaiva bhaviṣyanti saridvarāḥ //
nārada uvāca /

iti matvā mahādevī nadīrdevīḥ samāhvayat /
vipāśāṃ ca vitastyāṃ ca candrabhāgāṃ sarasvatīm //

śatadruṃ deviktāṃ sindhuṃ gautamīṃ kauśikīṃ tathā /
yamunāṃ narmadāṃ caiva kāverīmatha nimnagām //

tathā devanadīṃ gaṅgāṃ śreṣṭhāṃ tripathagāṃ śubhām / sarvatīrthodakavahāṃ sarvapāpavināśinīm /
etā nadīḥ samāhūya samudvīkṣyedamabravīt //
umovāca /

he puṇyāḥ saritaḥ śreṣṭhāḥ sarvapāpavināśikāḥ /
jñānavijñānasampannāḥ śṛṇudhvaṃ vacanaṃ mama //

ayaṃ bhagavatā praśna uktaḥ strīdharmamāśritaḥ /
na caikayā mayā sādyaṃ tasmādvastvānayāmyaham //

yuṣmābhistadvicāryaivaṃ vaktumicchāmi śobhanāḥ /
tatkathaṃ devadevāya vācyaḥ strīdharma uttamaḥ //
nārada uvāca /

iti pṛṣṭāstathā devyā mahānadyaścakampire /
tāsāṃ śreṣṭhatamā gaṅgā vacanaṃ tvavemabravīt //

dhanyāścānugṛhītāḥ sma anena vacanena te /
yā tvaṃ surāsurairmānyā nadīrādriyase'naghe //

tavaivārhati kalyāṇi evaṃ sāntvaprasādanam / aśakyamapi ye mūrkhāḥ svātmasambhāvanāyutāḥ /
vākyaṃ vadanti saṃsatsu svayameva yatheṣṭataḥ //

śakto yaścānahaṃvādī sudurlabhatamo mataḥ //

tvaṃ hi śaktā satī devī vaktuṃ praśnamaśeṣataḥ /
vyāhartuṃ necchasi strītvātsampūjayati nastathā //

tvaṃ hi devi mahādevī ūhāpohaviśāradā /
divyajñānayutā devi divyajñānendhanaidhitā //

tvamevārhasi tadvaktuṃ strīṇāṃ vṛttaṃ śubhāśubham / yācāmahe vayaṃ śrotumamṛtaṃ tvanmukhodgatam /
kuru devapriyaṃ devi vada strīdharmamuttamam //
nārada uvāca /

evaṃ prasāditā devī gaṅgayā lokapūjyayā /
prāha dharmamaśeṣeṇa strīdharmaṃ surasundarī //
umovāca /

bhagavandevadeveśa sureśvara maheśvara / tvatprasādātsuraśreṣṭha tavaiva priyakāmyayā /
tamahaṃ kīrtayiṣyāmi yathāvacchrotumicchasi //