Mahabharata · Chapter 13.247

triyakṣa tridaśaśreṣṭha tryambaka tridaśādhipa /
tripurāntaka kāmāṅgahara tripathagādhara //

dakṣayajñapraśamana sūlapāṇe'risūdana /
namaste lokapāleśa lokapālavaraprada //

naikaśākhamaparyantamadhyātmajñānamuttamam /
apratarkyamavijñeyaṃ sāṅkhyayogasamanvitam //

bhavatā paripṛṣṭena śṛṇvantyā mama bhāṣitam /
idānīṃ śrotumicchāmi sāyujyaṃ tvadgataṃ vibho //

kathaṃ paricarantyete bhaktāstvāṃ parameṣṭhinam / ācāraḥ kīdṛśasteṣāṃ kena tuṣṭo bhavedbhavān /
varṇyamānaṃ tvayā sākṣātprīṇayatyadhikaṃ hi mā //
maheśvara uvāca /

hanta te kathayiṣyāmi mama sāyujyamadbhutam /
yena te na nivartante yuktāḥ paramayoginaḥ //

avyakto'hamacintyo'haṃ pūrvairapi mumukṣubhiḥ /
sāṅkhyayogau mayā sṛṣṭau sarvaṃ cāpi carācaram //

arcanīyo'hamīśo'hamavyayo'haṃ sanātanaḥ /
ahaṃ prasanno bhaktānāṃ dadāmyamaratāmapi //

na māṃ viduḥ suragaṇā munayaśca tapodhanāḥ /
tvatpriyārthamahaṃ devi madvibhūtiṃ bravīmi te //

āśramebhyaścaturbhyo'haṃ caturo brāhmaṇāñśubhe /
madbhaktānnirmalānpuṇyānsamānīya tapasvinaḥ //

vyācakhye'haṃ tathā devi yogaṃ pāśupataṃ mahat /
gṛhītaṃ tacca taiḥ sarvaṃ mukhācca mama dakṣiṇāt //

śrutvā tattriṣu lokeṣu sthāpitaṃ cāpi taiḥ punaḥ /
idānīṃ ca tvayā pṛṣṭo vadāmyekamanāḥ śṛṇu //

ahaṃ pasupatirnāma madbhaktā ye ca mānavāḥ /
sarve pāśupatā jñeyā bhasmadigdhatanūruhāḥ //

rakṣārthaṃ maṅgalārthaṃ na pavitrārthaṃ ca bhāmini /
liṅgārthaṃ caiva bhaktānāṃ bhasma dattaṃ mayā purā //

tena sandigdhasarvāṅgā bhasmanā brahmacāriṇaḥ /
jaṭilā muṇḍitā vā'pi nānākāraśikhaṇḍinaḥ //

vikṛtāḥ piṅgalābhisca nagnā nānāprakāriṇaḥ /
bhaikṣaṃ carantaḥ sarvatra niḥspṛhā niṣparigrahāḥ //

mṛtpātrahastā madbhaktā manniveśitabuddhyaḥ /
caranto nikhilaṃ lokaṃ mama harṣavivardhanāḥ //

mama pāśupataṃ divyaṃ yogaśāstramanuttamam /
sūkṣmaṃ sarveṣu lokeṣu vimṛśantaścaranti te //

evaṃ nityābhiyuktānāṃ madbhaktānāṃ tapasvinām /
upāyaṃ cintayāmyāśu yena māmupayānti te //

sthāpitaṃ triṣu lokeṣu śivaliṅgaṃ mayā mama /
namaskāreṇa vā tasya mucyante sarvakilbiṣaiḥ //

iṣṭaṃ dattamadhītaṃ ca yajñāśca bahudakṣiṇāḥ /
śivaliṅgapraṇāmasya kalāṃ nārhanti ṣoḍaśīm //

arcayā śivaliṅgasya parituṣyāmyahaṃ priye /
śivaliṅgārcanāyāṃ tu vidānamapi me śṛṇu //

gokṣīranavanītābhyāmarcayedyaḥ śivaṃ mama /
iṣṭasya hayamedhasya yatphalaṃ tatphalaṃ bhavet //

ghṛtamaṇḍena yo nityamarcayedyaḥ śivaṃ mama /
sa phalaṃ prāpnuyānmartyo brāhmaṇasyāgnihotriṇaḥ //

kevalenāpi toyena snāpayedyaḥ śivaṃ mama /
sa cāpi labhate puṇyaṃ priyaṃ ca labhate naraḥ //

saghṛtaṃ guggulu samyagdhūpayedyaḥ śivāntike /
gosavasya tu yajñasya yatphalaṃ tasya tadbhavet //

yastu guggulapiṇḍena kevalenāpi dhūpayet /
tasya rukmapradhānasya yatphalaṃ tasya tadbhavet //

yastu nānāvidhaiḥ puṣpairmama liṅgaṃ samarcayet / sa hi dhenusahasrasya dattasya phalamāpnuyāt /

yastu deśāntaraṃ gatvā śivaliṅgaṃ samarcayet /
tasmātsarvamanuṣyeṣu nāsti me priyakṛttamaḥ //

evaṃ nānāvidhairdravyaiḥ śivaliṅgaṃ samarcayet /
matsamāno manuṣyeṣu na punarjāyate naraḥ //

arcanābhirnamaskārairupahāraiḥ stavairapi /
bhakto māmarcayennityaṃ śivaliṅgeṣvatandritaḥ //

palāśabilvapatrāṇi rājavṛkṣasrajaṃ tathā /
arkapuṣpāṇi medhyāni matpriyāṇi viśeṣataḥ //

phalaṃ vā yadi vā śākaṃ puṣpaṃ vā yadi vā jalam /
dattaṃ samprīṇayeddevi bhaktairmadgatamānasaiḥ //

mamābhiparituṣṭasya nāsti lokeṣu durlabham /
tasmātte satataṃ bhaktā māmevābhyarcayantyuta //

madbhaktā na vinaśyanti madbhaktā vītakalmaṣāḥ /
madbhaktāḥ sarvalokeṣu pūjanīyā viśeṣataḥ //

maddveṣiṇaści ye martyā madbhaktadveṣiṇaśca vā /
yānti te narakaṃ ghoramiṣṭvā kratuśatairapi //

etatte sarvamākhyātaṃ yogaṃ pāśupataṃ mahat /
madbhaktairmanujairdevi śrāvyametaddinedine //

śṛṇuyādyaḥ paṭhedvā'pi mamedaṃ dharmaniścayam /
svargaṃ kīrtiṃ dhanaṃ dhānyaṃ sa labheta narottamaḥ //