Mahabharata · Chapter 13.242

bhagavanmānuṣāḥ kecitkāladharmamupasthitāḥ /
prāṇamokṣaṃ kathaṃ kṛtvā paratri hitamāpnuyuḥ //
maheśvara uvāca /

hanta te kathayiṣyāmi śṛṇu devi samāhitā /
dvividhaṃ maraṇaṃ loke svabhāvādyatnatastathā //

tayoḥ svabhāvaṃ nāpāyaṃ yatnataḥ karaṇodbhavam /
etayorubhayordevi vidhānaṃ śṛṇu śobhane //

kalyākalyaśarīrasya yatnajaṃ dvividhaṃ smṛtam /
yatnajaṃ nāma maraṇamātmatyāgo mumūrṣayā //

tatrākalyaśarīrasya jarā vyādhiśca kāraṇam / mahāprasthānagamanaṃ tathā prāyopaveśanam /
jalāvagāhanaṃ caiva agnicityāṃ praveśanam //

evaṃ caturvidhaḥ prokta ātmatyāgo mumūrṣatām /
eteṣāṃ kramayogena vidhānaṃ śṛṇu śobhane //

svadharmayuktaṃ gārhasthyaṃ ciramūḍhvā vidhānataḥ /
tatrānṛṇyaṃ ca samprāpya vṛddho vā vyādhito'pi vā //

darśayitvā svadaurbalyaṃ sarvānevānumānya ca /
sarvaṃ vihāya bandhūṃśca kramāṇāṃ bharaṇaṃ tathā //

dānāni vidhivatkṛtvā dharmikāryarthamātmanaḥ /
anujñāpya janaṃ sarvaṃ vācā madhurayā bruvan //

ahataṃ vastramācchādya baddhvā tatkuśarajjunā /
upaspṛśca pratijñāya vyavasāyapurasaram //

parityajya tato grāmyaṃ dharmaṃ kuryādyathepsitam /
mahāprastānamiccheccetpratiṣṭhetottarāṃ diśam //

bhūtvā tāvannirāhāro yāvatprāṇavimokṣaṇam / ceṣṭāhānau śayitvā'pi tanmanāḥ prāṇamutsṛjet /
evaṃ puṇyakṛtāṃ lokānamalānpratipadyate //

prāyopaveśanaṃ cecchettenaiva vidhinā naraḥ /
deśe puṇyatame śreṣṭhe nirāhārastu saṃviśet //

aprāṇaṃ tu śucirbhūtvā kurvandānaṃ svaśaktitaḥ / puṇyaṃ parityajetprāṇāneṣa dharmaḥ sanātanaḥ /
evaṃ kalevaraṃ tyaktvā svargaloke mahīyate //

agnipraveśanaṃ cecchettenaiva vidhinā śubhe /
kṛtvā kāṣṭhamayaṃ cityaṃ puṇyakṣetre nadīṣu vā //

daivatebhyo namaskṛtvā kṛtvā cāpi pradakṣiṇam / bhūtvā śucirvyavasitaḥ praviśedagnisaṃstaram /
sopi lokānyathānyāyaṃ prāpnuyātpuṇyakarmaṇām //

jalāvagāhanaṃ cecchettenaiva vidhinā śubhe /
khyāte puṇyatame tīrthe nimajjetsukṛtaṃ smaran //

sopi puṇyatamām̐llokānniḥsaṅgātpratipadyate /
tataḥ kalyaśarīrasya santyāgaṃ śṛṇu tatvataḥ //

rakṣārthaṃ kṣatriyaḥ śreṣṭhaḥ prajāpālanakāraṇāt /
yodhānāṃ bhartṛpiṇḍārthaṃ gurvarthaṃ brahmacāriṇām //

gobrāhmaṇārthaṃ sarveṣāṃ prāṇatyāgo vidhīyate /
svarājyarakṣaṇārtaṃ vā kujanaiḥ pīḍitāḥ prajāḥ //

moktukāmastyajetprāṇānyuddhamārge yathāvidhi / susannaddho vyavasitaḥ sampraviśyāparāṅmukhaḥ /
evaṃ rājā mṛtaḥ sadyaḥ svargaloke mahīyate //

tādṛśī sugatirnāsti kṣatriyasya viśeṣataḥ /
bhṛtyo vā bhartṛpiṇḍārthaṃ bhartṛkarmaṇyupasthite //

kurvaṃstatra tu sāhāyyamātmaprāṇānapekṣayā /
svāmyarthaṃ santyajetprāṇānpuṇyām̐llokānsa gacchati //

spṛhaṇīyaḥ suragaṇaistatra nāsti vicāraṇā /
evaṃ gobrāhmaṇārthaṃ vā dīnārthaṃ vā tyajettanum //

sopi puṇyamavāpnoti ānṛśaṃsyavyapekṣayā /
ityete jīvitatyāge mārgāste samudāhṛtāḥ //

kāmakrodhādbhayādvā'pi yadi cetsantyajettanum /
so'nantaṃ narakaṃ yāti ātmahantṛtvakāraṇāt //

svabhāvaṃ maraṇaṃ nāma na tu cātmecchayā bhavet /
yathā mṛtānāṃ yatkāryaṃ tanme śṛṇu yathāvidhi //

tatrāpi maraṇaṃ tyāgo mūḍhatyāgādviśiṣyate /
bhūmau saṃveśayeddehaṃ narasya vinaśiṣyataḥ //

nirjīvaṃ vṛṇuyātsadyo vāsasā tu kalevaram /
mālyagandhairalaṅkṛtya suvarṇena ca bhāmini //

śmaśāne dakṣiṇe deśe citāgnau pradahenmṛtam /
athavā nikṣipedbhūmau śarīraṃ jīvavarjitam //

divā ca śuklapakṣaśca uttarāyaṇameva ca /
mumūrṣūṇāṃ praśastāni viparītaṃ tu garhitam //

audakaṃ cāṣṭakāśrāddhaṃ bahubhirbahubhiḥ kṛtam / āpyāyanaṃ mṛtānāṃ tatparaloke bhavecchubham /
etatsarvaṃ mayā proktaṃ mānuṣāṇāṃ hitaṃ vacaḥ //