Mahabharata · Chapter 13.243

devadeva namaste'stu kālasūdana śaṅkara /
lokeṣu vividhā dharmāstvatprasādānmayā śrutāḥ //

viśiṣṭaṃ sarvadharmebhyaḥ śāśvataṃ dhruvamavyayam /
śrutumicchāmyahaṃ sarvamatra muhyati me manaḥ //

kecinmokṣaṃ praśaṃsanti kecidyajñaphalaṃ dvijāḥ /
vānaprasthaṃ punaḥ kecidgārhasthyaṃ kecidāśramam //

rājadharmāśrayaṃ kecitkecitsvādhyāyameva ca /
brahmacaryāśramaṃ kecitkecidvāksaṃyamāśrayam //

mātaraṃ pitaraṃ kecitsevamānā divaṃ gatāḥ /
ahiṃsayā paraḥ svarge satyena ca mahīyate //

āhave'bhimukhāḥ kecinnihatāstridivaṃ gatāḥ /
keciduñchavṛtte siddhāḥ svargamārgaṃ samāśritāḥ //

ārjavenāpare yuktā mahatāṃ pūjate ratāḥ /
ṛjavo nākapṛṣṭhe tu śuddhātmānaḥ pratiṣṭhitāḥ //

evaṃ bahuvidhairloke dharmadvāraiḥ susaṃvṛtaiḥ /
mamāpi matirāviddhā meghalekheva vāyunā //

etasminsaṃśayasthāne saṃśayacchedakāri yat /
vacanaṃ brūhi deveśa niścayajñānasañjñitam //
nārada uvāca /

evaṃ pṛṣṭaḥ svayā devyā mahādevaḥ pinākadhṛk /
provāca madhuraṃ vākyaṃ sūkṣmamadhyātmasaṃśritam //
maheśvara uvāca /

nyāyatastvaṃ mahābhāge śrotukāmā'si niścayam /
etadeva viśiṣṭaṃ te yattvaṃ pṛcchasi māṃ priye //

sarvatra vihito dharmaḥ svargalokaphalāśritaḥ /
bahudvārasya dharmasya nehāsti viphalāḥ kriyāḥ //

yasminyasmiṃśca viṣaye yoyo yāti viniścayam /
taṃ tamevābhijānāti nānyaṃ dharmaṃ śucismite //

śṛṇu devi samāsena mokṣadvārasamanuttamam /
etaddhi sarvadharmāṇāṃ viśiṣṭaṃ śubhamavyayam //

nāsti mokṣātparaṃ devi mokṣa eva parā gatiḥ /
sukhamātyantikaṃ śreṣṭhamanivṛttaṃ ca tadviduḥ //

nātra devi jarā mṛtyuḥ śoko vā duḥkhameva vā /
anuttamamacintyaṃ ca taddevi paramaṃ sukham //

jñānānāmuttamaṃ jñānaṃ mokṣajñānaṃ vidurbudhāḥ /
ṛṣibhirdevasaṅghaiśca procyate paramaṃ padam //

nityamakṣaramakṣobhyamajeyaṃ śāśvataṃ śivam /
viśanti tatpadaṃ prājñāḥ spṛhaṇīyaṃ surottamaiḥ //

duḥkhādiśca durantaśca saṃsāroyaṃ prakīrtitaḥ /
śokavyādhijarādoṣairmaraṇena ca saṃyutaḥ //

yathā jyotirgaṇā vyomni vivartante punaḥpunaḥ /
tasya mokṣasya mārgo'yaṃ śruyatāṃ śubhalakṣaṇe //

brahmādisthāvarāntaśca saṃsāro yaḥ prakīrtitaḥ /
saṃsāre prāṇinaḥ sarve nivartante yathā punaḥ //

tatra saṃsāracakrasya mokṣo jñānena dṛśyate /
adhyātmatatvavijñānaṃ jñānamityabhidhīyate //

jñānasya grahaṇopāyamācāraṃ jñāninastathā /
yathāvatsampravakṣyāmi tattvamekamanāḥ śṛṇu //

brāhmaṇaḥ kṣatriyo vā'pi bhūtvā pūrvaṃ gṛhe sthitaḥ /
ānṛṇyaṃ sarvataḥ prāpya tatastānsantyajedgṛhān //

tataḥ santyajya gārhasthyaṃ niścito vanamāśrayet //

vane guruṃ samājñāya dīkṣito vidhipūrvakam /
dīkṣāṃ prāpya yathānyāyaṃ svavṛttaṃ paripālayet //

gṛhṇīyādapyupādhyāyānmokṣajñānamaninditaḥ /
dvividhaṃ ca punarmokṣaṃ sāṅkhyayogamiti smṛtiḥ //

pañcaviṃśativijñānaṃ sāṅkhyamityabhidhīyate / aiśvaryaṃ devasārūpyaṃ yogaśāstrasya nirṇayaḥ /
tayoranyataraṃ jñānaṃ śṛṇuyācchiṣyatāṃ gataḥ //

nākālo nāpyakāṣāyī nāpyasaṃvatsaroṣitaḥ / nāsāṅkhyayogo nāśrāddhaṃ guruṇā snehapūrvakam /
samaḥ śītoṣṇaharṣādīnviṣaheta sa vai muniḥ //

amṛṣyaḥ kṣutpipāsābhyāmucitebhyo nivartayet /
tyajetsaṅkalpajāngranthīnsadā dhyānaparo bhavet //

kuṇḍikācamasaṃ śikyaṃ chatraṃ yaṣṭimupānahau /
celamityeva naiteṣu sthāpayetsāmyamātmanaḥ //

guroḥ pūrvaṃ samuttiṣṭhejjaghanyaṃ tasya saṃviśet /
naivāvijñāpya bhartāramāvaśyakamapi vrajet //

dvirahni snānaśāṭena sandhyayorabhiṣecanam /
ekakālāśanaṃ cās vihitaṃ yatibhiḥ purā //

bhaikṣaṃ sarvatra gṛhṇīyāccintayetsatataṃ niśi /
kāraṇe cāpi samprāpte na jñāpyeta kadācana //

brahmicaryaṃ vane vāsaṃ śaucamindriyasaṃyamaḥ /
dayā ca sarvabhūteṣu tasya dharmaḥ sanātanaḥ //

vimuktaḥ sarvapāpebhyo laghvāhāro jitendriyaḥ /
ātmayuktaḥ parāṃ buddhiṃ labhate pāpanāśinīm //

yadā bhāvaṃ na kurute sarvabhūteṣu pāpakam /
karmaṇā manasā vācā brhama sampadyate tadā //

aniṣṭhuro'nahaṅkāro nirdvandvo vītamatsaraḥ /
vītaśokabhayābādhaṃ padaṃ prāpnotyanuttamam //

tulyanindāstutirmaunī samaloṣṭāśmakāñcanaḥ /
samaḥ śatrau ca mitre ca nirvāṇamadhigacchati //

evaṃ yuktasamācārastatparo'dhyātmacintakaḥ /
jñānābhyāsena tenaiva prāpnoti paramāṃ gatim //