Mahabharata · Chapter 13.240

bhagavansarvabhūteśa puramardana śaṅkara /
śrutaṃ pāpakṛtāṃ duḥkhaṃ yamaloke varaprada //

śrotumicchāmyahaṃ deva nṛṇāṃ sukṛtakarmaṇām /
kathaṃ te bhuñjate bhogānsvargaloke maheśvara //

kathitāḥ kīdṛśā lokā nṛṇāṃ sukṛtakāriṇām /
etanme vada devaśa śrotuṃ kautūhalaṃ hi me //
maheśvara uvāca /

śṛṇu kalyāṇi tatsarvaṃ yattvamicchasi śobhane /
vividhāḥ puṇyalokāste karmakarmaṇyatāṃ gatāḥ //

meruṃ hi kanakātmānaṃ paritaḥ sarvatodiśam /
bhadrāścaḥ ketumālaśca uttarāḥ kuravastathā //

jambūvanādayaḥ svargā ityete karmavarjitāḥ /
teṣu bhūtvā svayambhūtāḥ pradṛśyate yatastataḥ //

yojanānāṃ sahasraṃ ca ekaikaṃ mānamātrayā /
nityaṃ puṣpaphalopetāstatra vṛkṣāḥ samantataḥ //

āsaktavastrābharaṇāḥ sarve kanakasannibhāḥ / dvirephāścāṇḍajāstatra pravālamaṇisannibhāḥ /
vicitrāśca manojñāśca kūjitaiḥ śobhayanti tān //

kuśeśayavanacchannā nalinyaśca manoramāḥ /
tatra vāntyanilā nityaṃ divyagandhasukhāvahāḥ //

sarve cāmlānamālyāśca virajombarasaṃvṛtāḥ /
evaṃ bahuvidhā devi divyabhogāḥ sukhāvahāḥ //

striyaśca puruṣāścaiva sarve sukṛtakāriṇaḥ /
ramante tatra cānyonyaṃ kāmarāgasamanvitāḥ //

manoharā mahābhāgāḥ sarve lalitakuṇḍalāḥ /
evaṃ tatra sthitā martyāḥ pramadāḥ priyadarśanāḥ //

nānābhāvasamāyuktā yauvanasthāḥ sadaiva tu /
yuvatyaḥ kalpitāstatra kāmajā lalitāstathā //

manonukūlā madhurā bhogināmupakalpitāḥ /
pramadāścodbhavantyeva svargaloke yathā tathā //

evaṃvidhāḥ striyaścātra puruṣāśca parasparam /
ramante cendriyaiḥ svasthai śarīrairbhogasaṃskṛtaiḥ //

kāmaharṣaguṇābhyastā nānye krodhādayaḥ priye /
kṣutpipāsā na cāstyatri gātrakleśāśca śobhane //

sarvato ramaṇīyaṃ ca sarvatra kusumānvim / yāvatpuṇyaphalaṃ tāvaddṛśyante bahusaṅgatāḥ /
nirantaraṃ bhogayutā ramante svargavāsinaḥ //

tatra bhogānyathāyogaṃ bhuktvā puṇyakṣayātpunaḥ /
naśyanti jāyamānāste śarīraiḥ sahasā priye //

svargalokātparibhraṣṭāḥ jāyante mānuṣe punaḥ /
pūrvapuṇyāvaśeṣeṇa viśiṣṭāḥ sambhavanti te //

eṣā svargagatiḥ proktā pṛcchantyāstava bhāmini / ata ūrdhvaṃ padānyaṣṭau sukarmāṇi śṛṇu priye /
bhogayuktāni puṇyāni ucchritāni parasparam //

vidyādharāḥ kimpuruṣā yakṣagandharvakinnarāḥ /
apsarodānavā devā yathākramamudāhṛtāḥ //

teṣu sthāneṣu jāyante prāṇināḥ puṇyakarmaṇaḥ /
teṣāmapi ca ye lokāḥ svargalokopamāḥ smṛtāḥ //

svargavattatra te bhogānbhuñjate ca ramanti ca /
rūpasatvabalopetāḥ sarve dīrghāyuṣastathā //

teṣāṃ sarvakriyārambho mānuṣeṣviva dṛśyate /
atimānuṣamaiśvaryamatra māyābalātkṛtam //

jarāprasūtimaraṇaṃ teṣu sthāneṣu dṛśyate /
guṇā doṣāśca santyatra ākāśagamanaṃ tathā //

antardhānaṃ balaṃ sattvamāyuśca cirajīvitam /
tapoviśeṣajjāyante yathā karmṇi bhāmini //

devaloke pravṛttistu teṣāmeva vidhīyate / na tathā devaloko hi tadviśiṣṭāḥ surāḥ smṛtāḥ // i

tatra bhogamanirdeśyamamṛtatvaṃ ca vidyate /
vimānagamanaṃ nityamapsarogaṇasevitam //

evamanyacca tatkarma devatābhyo viśiṣyate /
pratyakṣaṃ tava tatsarvaṃ devaloke pravartanam //

tasmānna varṇaye devi viditaṃ ca tvayā śubhe /
tatsarvaṃ sukṛtaireva prāpyate cottamaṃ padam //