Mahabharata · Chapter 13.24

tataḥ kadrūrhasantī ca vinatāṃ dharmacāriṇīm /
dāsīvatpreṣayāmāsa sā ca sarvaṃ cakāra tat //

na vivarṇā na sankṣubdhā na ca kruddhā na duḥkhitā /
preṣyakarma cakārāsyā vinatā kamalekṣaṇā //

imā diśaścatasro'syāḥ preṣyabhāvena vartitāḥ /
atha sma vainateyaṃ vai baladarpau samīyatuḥ //

taṃ darpavaśamāpannaṃ paridhāvantamantikāt /
dadarśa nārado rājandevarṣirdarpasaṃyutam //

tamabravīcca devarṣirnāradaḥ prahasanniva /
kiṃ darpavaśamāpanno na vai paśyasi mātaram //

balena dṛptaḥ satatamahammānakṛtaḥ sadā /
dāsīṃ pannagarājasya māturantargṛhe satīm //

tamabravīdvainateyaḥ karma kiṃ tanmahāmate /
janayitrī mayi sute jātā dāsī tapasvinī //

athābravīdṛṣirvākyaṃ dīvyatī vijitā khaga /
nikṛtyā pannagendrasya mātrā putraiḥ purā saha //
garuḍa uvāca /

kathaṃ jitā nikṛtyā sā bhagavañjananī mama /
brūhi tanme yathāvṛttaṃ śrutvā vetsye tataḥ param //

tatastasya yathāvṛttaṃ sarvaṃ tannāradastadā /
ācakhyau bharataśreṣṭha yathāvṛttaṃ patatriṇaḥ //

tacchrutvā vainateyasya kopo hṛdi samāviśat /
jagarhe pannagānsarvānmātrā saha parantapaḥ //

tatastu roṣādduḥkhācca tūrṇamutpatyaka pakṣirāṭ /
jagāma yatra mātā'sya kṛcchre mahati vartate //

tatrāpaśyattato dīnāṃ jaṭilāṃ malināṃ kṛśām /
toyadena praticchannāṃ sūryābhāmiva mātaram //

tasya duḥkhācca roṣācca netrābhyāmaśru cāsravat /
pravṛttiṃ ca nivṛttiṃ ca pauruṣe pratitasthuṣaḥ //

anuktvā mātaraṃ kiñcitpatatrivarapuṅgavaḥ /
kadrūmeva sa dharmātmā vacanaṃ pratyabhāṣata //

yadi dharmeṇa me mātā jitā yadyapyadharmataḥ /
jyeṣṭhā tvamasi me mātā dharmaḥ sarvaḥ sa me mataḥ //

iyaṃ tu me syātkṛpaṇā mayi putre'mba duḥkhitā /
anujānīhi tāṃ sādhu matkṛte dharmadarśini //

kadrūḥ śrutvāsya tadvākyaṃ vainateyasya dhīmataḥ /
uvāca vākyaṃ duṣprajñā parītā duḥkhamūrcchitā //

nāhaṃ tava na te māturvainateya kathañcana /
kuryāṃ priyamaniṣṭātmā māṃ bravīṣi khaga dvijā //

tāṃ tadā bruvatīṃ vākyamaniṣṭaṃ krūrabhāṣiṇīm /
dāruṇāṃ sūnṛtābhistāmanunetuṃ pracakrame //
garuḍa ruvāca /

jyeṣṭhā tvamasi kalyāṇi māturme bhāmini priyā / sodaryī mama cāsi tvaṃ jyeṣṭhā mātā na saṃśayaḥ // 7--24-22x kadrūruvāca /

vihaṅgama yathākāmaṃ gaccha kāmagama dvija /
sūnṛtābhistvayā mātā nādāsī śakyamaṇḍaja //

amṛtaṃ yadyāharestvaṃ vihaṅgaṃ jananīṃ tava /
adāsīṃ mama paśyemāṃ vainateya na saṃśayaḥ //