Mahabharata · Chapter 13.25

tathetyuktvā tu vihagaḥ pratijñāya mahādyutiḥ /
amṛtāharaṇe vācaṃ tataḥ pitaramabravīt //

kāmaṃ vai sūnṛtā vāco visṛjya ca muhurmuhuḥ /
yaccāpyanujñāṃ māturvai na ca sā hyanumanyate //

sā mā bahuvidhā vāco vajrakalpā visṛjya vai /
bhagavanvinatā dāsī mama mātā mahādyute //

kadrūḥ preṣayate caiva dāsīyamiti cābravīt /
āharāmṛtamityeva mokṣyate vinatā tataḥ //

sohaṃ mātṛvimokṣārthamāhariṣya iti bruvan /
amṛtaṃ prārthitastūrṇamāhartuṃ pratinandya vai //
pitovāca /

amṛtaṃ tāta duṣprāpaṃ devairapi kutastvayā /
rakṣyate hi bhṛśaṃ putra rakṣibhistannibodha me //

guptamadbhirbhṛśaṃ sādhu sarvataḥ parivāritam /
anantaramatho guptaṃ jvalatā jātavedasā //

tataḥ śatasahasrāṇi ayutānyarbudāni ca /
rakṣantyamṛtamatyantaṃ kiṅkarā nāma rākṣasāḥ //

teṣāṃ śaktyṛṣṭiśūlāṃśca śataghnyaḥ paṭṭasāstathā /
āyudhā rakṣiṇāṃ tāta vajrakalpāḥ śilāstathā //

tato jālena mahatā avanaddhaṃ samantataḥ /
ayasmayena vai tāta vṛtrahantuḥ sma śāsanāt //

tattvamevaṃvidhaṃ tāta kathaṃ prārthayase'mṛtam / surakṣitaṃ vajrabhṛtāṃ vainateya vihaṅgama /
indreṇa devairnāgaiśca khaḍgairgirijalādibhiḥ //
garuḍa uvāca /

putragṛddhyā bravīṣyetacchṛṇu tāta viniścayam /
balavānupāyavānasmi bhūyaḥ kiṃ karavāṇi te //

tamabravītpitā hṛṣṭaḥ prahasanvai punaḥ punaḥ /
yadi tau bhakṣayestāta krūrau kacchapavāraṇau //

tathā balamameyaṃ te bhavitā tanna saṃśayaḥ /
amṛtasyaiva cāhartā bhaviṣyasi na saṃśayaḥ //
garuḍa uvāca /

kva tau krūrau mahābhāga vartete hastikacchapau /
bhakṣayiṣyāmyahaṃ tāta balasyāpyāyanaṃ prati //
kaśyapa uvāca /

parvato vai samudrānte nabhaḥ stabdhveva tiṣṭhati /
urago nāma duṣprāpaḥ purā devagaṇairapi //

gorutāni sa vistīrṇaḥ puṣpitadrumasānumān /
tatra panthāḥ kṛtastāta kuñjareṇa balīyasā //

gorutānyucchrayastasya nava sapta ca putraka /
gacchatā'gacchatā caiva kṣapitaḥ sa mahāgiriḥ //

tāvānbhūmisamastāta kṛtaḥ panthāḥ samutthitaḥ /
tena gatvā sa mātaṅgaḥ pipāsuryuddhamicchati //

tamatītya tu śailendraṃ hradaḥ kokanadāyutaḥ /
kanaketi ca vikhyātastatra kūrmo mahābalaḥ //

gorutāni sa vistīrṇaḥ kacchapaḥ kuñjaraśca saḥ /
āyāmataścāpi samau tejobalasamanvitau //

punarāvṛttimāpannau tāvetau madhukaiṭabhau /
janmāntare vipramūḍhau parasparavadhaiṣiṇau //

yadā sa nāgo vrajati pipāsustaṃ jalāśayam /
tadainaṃ kacchapo roṣātpratiyāti mahābalaḥ //

nakhaiśca daśanaiścāpi nimajyonmajya vā'sakṛt /
vidadārāgrahastena kuñjaraṃ taṃ jalecaraḥ //

nāgarāḍapi toyārthī pipāsuścaraṇairapi /
agrahastena dantābhyāṃ nivārayati vārijam //

sa tu toyādanuttiṣṭhanvārijo gajayūthapam /
nakhaiśca daśanaiścaiva dviradaṃ pratiṣedhati //

nivārito gajaśreṣṭhaḥ punargacchati svaṃ vanam /
pipāsuḥ klinnahastāgro rudhireṇa samukṣitaḥ //

tau gaccha sahitau putra yadi śaknoṣi bhakṣaya /
na tau pṛthaktayā śakyāvapramattau bale sthitau //